KOE GAAHI SAME 44:1-26 TON1884 - Bible AI

¹1 Koe fakamanatu e he jiaji ki he ene lelei i mua. 7 Oku lāuga ia i he ene tuutamaki ni. 17 Oku fakaha eia ene agatonu, 24 bea ne kole fakamatoato ke malu‘i ia. E OTUA, naa mau fanogo aki ho mau teliga, bea kuo tala kiate kimautolu e he e mau gaahi tamai, ae gaue naa ke fai i ho nau gaahi aho, i he gaahi kuoga i mua.

²Naa ke kabuji kitua ae hiteni aki ho nima, mo ke to akinautolu: naa ke tautea ae kakai, bea mafola atu akinautolu.

³He nae ikai te nau ma‘u ae fonua i he heleta anautolu, bea nae ikai fakamoui akinautolu e ho nau nima: ka ko ho aofi nima, mo ho nima toomatau, moe māma o ho fofoga, koeuhi naa ke ofa kiate kinautolu.

⁴He ko koe ko hoku Tu‘i, E Otua: ke ke fekau ae fakamoui kia Jekobe.

⁵Koe mea iate koe te mau tulaki ho mau gaahi fili: koe mea i ho huafa te mau malamalaki ki lalo akinautolu oku tuu hake kiate kimautolu.

⁶Koeuhi e ikai teu falala ki he eku kaufana, bea e ikai fakamoui au e he eku heleta.

⁷Ka ko koe kuo ke fakamoui akimautolu mei ho mau gaahi fili, bea kuo ke tuku ke ma akinautolu nae fehia kiate kimautolu.

⁸Oku mau vikiviki i he Otua i he aho kotoa, o fakamalo ki ho huafa o taegata. Sila.

⁹Ka kuo ke liaki, bea tuku ke ma akimautolu; bea ikai te ke alu atu moe mau gaahi kogakau.

¹⁰Oku ke bule ke mau foki mai mei he fili: bea ko kinautolu oku fehia kiate kimautolu oku nau maumau ma anautolu.

¹¹Kuo ke foaki akimautolu o hage koe faga sibi kuo fili ki he kai; bea kuo ke fakahe‘i akimautolu ki he hiteni.

¹²Oku ke fakatau hoo kakai tae ha totogi, bea oku ikai te ke fakalahi hoo koloa aki ho nau totogi.

¹³Oku ke gaohi akimautolu koe manukiaga o ho mau gaahi kaugaabi, koe mea manuki moe taukaeaga okinautolu oku nofo takatakai iate kimautolu.

¹⁴Oku ke gaohi akimautolu koe lumaaga oe hiteni, koe kalokaloaga oe ulu i he ao oe kakai.

¹⁵Oku i hoku ao mau ai be eku kovi, bea kuo ufiufi aki au ae ma o hoku mata,

¹⁶Koeuhi koe le‘o oia oku ne taukae mo kabe; koe mea i he fili moe fakafajifaji.

¹⁷Kuo hoko ae mea ni kotoabe kiate kimautolu; ka nae ikai te mau fakagalogalo‘i koe, bea nae ikai te mau fai kākā i hoo fuakava.

¹⁸Oku ikai foki kimui ho mau loto, be afe mei ho hala ho mau aluaga;

¹⁹Kuo ke fejifeji akimautolu i he botu oe faga talakone, mo ufiufi aki akimautolu ae ata oe mate.

²⁰Kabau kuo mau fakagalo‘i ae huafa o ho mau Otua, be mafao atu ho mau nima ki ha otua kehe;

²¹Ikai e eke ia e he Otua? he oku ne ilo‘i ae gaahi mea fufu oe loto.

²²Io, koeuhi ko koe oku tamate‘i akimautolu i he aho kotoabe; oku lau akimautolu o hage koe faga sibi ke tamate‘i.

²³Ke ke a, koeha oku ke mohe ai, E Jihova? tuu hake, oua naa ke liaki akimautolu o taegata.

²⁴Koeha oku ke fufu ai ho fofoga, o fakagalo‘i ho mau tautea mo ho mau taomia?

²⁵He kuo lolohifo ho mau laumalie ki he efu: kuo biki ho mau kete ki he kelekele.

²⁶Tuu hake ko ho mau tokoni, bea huhui akimautolu koeuhi ko hoo aloofa.