KOE GAAHI SAME 63:1-11 TON1884 - Bible AI

¹1 Koe holi a Tevita ki he Otua. 5 Koe aga o ene fakafetai ki he Otua. 9 Ko ene amanaki ki he malaia o hono gaahi fili, kae moui be ia. E OTUA, ko hoku Otua koe; teu kumi vave kiate koe: oku fieinu hoku laumalie kiate koe, oku holi hoku kakano kiate koe i he fonua momoa mo fieinua, aia oku ikai ha vai i ai;

²Ke mamata ki hoo mafimafi mo ho nāunāu, o hage ko eku mamata ai kiate koe i he fale tabu.

³Oku lelei lahi hake a hoo aloofa i he moui, koia e fakafetai ai a hoku lougutu kiate koe.

⁴Koia e behe be eku fakafetai kiate koe lolotoga eku moui: teu hiki hake hoku nima i ho huafa.

⁵E makona lelei hoku laumalie o hage koe mea i he gako moe mea momona; bea e fakafetai kiate koe a hoku gutu i he lougutu fiefia.

⁶I he eku manatu kiate koe i hoku mohega, o fakalaulauloto kiate koe i he gaahi lakaga leo i he bouli.

⁷Koe mea i hoo faa tokoni au, koia teu fiefia ai i he malu o ho kabakau.

⁸Oku bikitai mau be hoku laumalie kiate koe: oku boubou au e ho nima toomatau.

⁹Ka ko kinautolu oku kumi hoku laumalie ke fakaauha ia, te nau alu hifo ki he gaahi botu i lalo i he fonua.

¹⁰Te nau to i he heleta: te nau hoko koe inaji oe faga fokesi.

¹¹Ka e fiefia ae tu‘i i he Otua; koia kotoabe oku fuakava iate ia e fiefia ia; ka e tabuni ae gutu okinautolu kotoabe oku lea loi.