KOE GAAHI SAME 74:1-23 TON1884 - Bible AI

¹1 Oku hanu ae balofita i he maumau oe fale tabu. 10 Oku ne kole ki he Otua ke ne tokoni koeuhi ko hono malohi lahi, 18 moe lauikovi a hono gaahi fili, bea koeuhi ko ene fānau, me one fuakava. E OTUA, koeha kuo ke liaki ai akimautolu o taegata? koeha oku kohu ai ho houhau ki he faga sibi o hoo goue?

²Manatu ki he fakataha o hoo kakai, aia naa ke fakatau i mua; koe faahiga o ho tofia, aia kuo ke huhui; ae mouga ni ko Saione, aia naa ke nofo ai.

³Hiki hake ho va‘e ki hono gaahi maumau kuo tuu mau be; io, ki he mea kotoabe kuo fai i he agakovi e he fili i he fale tabu.

⁴Oku ioho a ho gaahi fili i he lotolotoga o hoo gaahi fakataha; oku nau fokotuu e nau gaahi fuka koe gaahi fakailoga.

⁵Nae ogoogo ae tagata o fakatatau mo ene faa fai ke hiki ki oluga ae gaahi toki ki he gaahi akau lahi.

⁶Ka koeni, kuo nau maumau‘i aki ae gaahi toki moe hamala ae gaahi mea togitogi kotoabe.

⁷Kuo nau li ae afi ki ho fale tabu, kuo nau uli‘i ae afioaga o ho huafa o holoki hifo ia ki he kelekele.

⁸Naa nau behe i ho nau loto, Ke tau fakaauha fakataha akinautolu: kuo nau tutu o oji ae gaahi fale lotu oe Otua i he fonua.

⁹Oku ikai te mau kei mamata ki he e mau gaahi fakailoga: oku ikai ha balofita e toe: bea oku ikai ha toko taha iate kitautolu oku ne ilo be e fefe hono fuoloa.

¹⁰E Otua, e fefe hono fuoloa oe lauikovi ae fili? e kabe ki ho huafa e he fili o taegata?

¹¹Koeha oku ke too atu ai ho nima, io, ho nima toomatau? too mai ia mei ho fatafata.

¹²He koe Otua ko hoku Tu‘i talu mei mua, oku ne fai ae fakamoui i he lotolotoga o mamani.

¹³Naa ke vaeua ae tahi i ho malohi: naa ke foa‘i ae ulu oe gaahi talakoni i he gaahi vai.

¹⁴Oku ke foa‘i o laiki ae gaahi ulu o levaiatani, o ke age ia koe mea kai ki he kakai oku nofo i he toafa.

¹⁵Naa ke vaeua ae matavai moe vaitafe lahi: naa ke fakamomoa ae gaahi vaitafe lahi.

¹⁶Oku oou ae aho, bea oku oou foki moe bo: kuo ke teuteu ae māma moe laa.

¹⁷Kuo ke ai ae gaahi gataaga kotoabe oe fonua; kuo ke gaohi ae faahita‘u mafana moe faahita‘u momoko.

¹⁸E Jihova, manatu ki he mea ni, kuo lauikovi e he fili, bea kuo kabe ki ho huafa ae kakai vale.

¹⁹Oua naa tukuage ae laumalie o ho ofaaga ki he fuu toko lahi oe kau agakovi: oua naa galo iate koe ae fakataha o ho kakai majiva o taegata.

²⁰Ke ke tokaga ki he fuakava: he oku bito ae gaahi botu fakabouli o mamani i he gaahi nofoaga oe agamalohi.

²¹Oua naa ke tuku ke liu mai kuo ma ae kakai kuo taomia: tuku ke fakamalo ki ho huafa ae kau majiva moe vaivai.

²²E Otua, ke ke tuu hake, o lagomaki‘i hoo gaue aau: manatu ki he lauikovi‘i koe e he tagata vale i he aho kotoabe.

²³Oua naa galo ae le‘o o ho gaahi fili: koe maveuveu okinautolu oku tuu hake kiate koe oku tubulekina i he aho kotoabe.