KOE GAAHI SAME 78:1-72 TON1884 - Bible AI

¹1 Koe eginaki ke tokaga ki he fono ae Otua, bea malaga aki ia. 9 Koe fakamatala ki he houhau oe Otua ki he taetui moe talagataa. 67 Kuo liaki e he Otua ae kakai Isileli, bea fili eia a Juta, mo Saione, mo Tevita. FAKAFANOGO a hoku kakai ki he eku akonaki: fakatokaga‘i ho mou teliga ki he gaahi lea a hoku gutu.

²Teu mafaa hoku gutu i he fakatātā: teu fakaha ae gaahi lea fufu mei mua:

³Aia kuo tau fanogo ki ai bea ilo‘i, bea nae tala ia kiate kitautolu e he e tau gaahi tamai.

⁴E ikai te tau fufu ia mei he e nau fānau, ka e fakaha ki he toutagata e hoko ae ogoogolelei o Jihova, mo hono malohi, moe gaahi gaue mana naa ne fai.

⁵He naa ne fokotuu mau ae fono ia Jekobe, o ne tuutuuni ae akonaki i Isileli, aia naa ne fekau‘i e tau gaahi tamai, koeuhi ke nau fakailo ia ki he e nau fānau:

⁶Koeuhi ke ilo ia e he toutagata e hoko, io, ae fānau e fanau‘i; aia te nau tubu hake o fakaha ia ki he e nau fānau:

⁷Koeuhi ke nau amanaki lelei mau ai be ki he Otua, bea oua naa fakagalogalo‘i ae gaahi gaue ae Otua, ka e tauhi ene gaahi fekau:

⁸Kae oua naa tatau moe nau gaahi tamai, koe toutagata baogataa mo agatuu; koe toutagata nae ikai te nau teuteu ho nau loto ke lelei, bea nae ikai tuu mau ho nau laumalie i he Otua.

⁹Koe fānau a Ifalemi nae too mahafu tau, moe gaahi kaufana, naa nau hola i he aho oe tau.

¹⁰Nae ikai te nau fai ki he fuakava ae Otua, bea nae ikai jii te nau loto ke aeva i he ene akonaki;

¹¹Bea naa nau fakagalogalo‘i ene gaahi gaue, mo ene gaahi mana naa ne fakaha kiate kinautolu.

¹²Naa ne fai ae gaahi mea fakaofo i he ao oe nau gaahi tamai, i he fonua ko Ijibite, i he goue o Soani.

¹³Nae vaeua eia ae tahi, bea ne bule ke nau alu atu ai; bea ne gaohi ae tahi ke tuu fakatafugofuga be.

¹⁴Naa ne tataki foki akinautolu i he aho aki ae ao, bea i he bo aki ae māma oe afi.

¹⁵Nae fahi‘i eia ae gaahi makatuu i he toafa, bea age ae inu kiate kinautolu o hage oku mei he loloto lahi.

¹⁶Naa ne omi foki kiate kinautolu ae gaahi vaitafe mei he makatuu, o ne bule ke tafe hifo ae gaahi vai o hage koe gaahi vaitafe lahi.

¹⁷Bea naa nau toe fai aganala kiate ia, i he e nau fakahouhau ki he Fugani Maoluga i he toafa.

¹⁸Bea naa nau ahiahi‘i ae Otua i ho nau loto, i he e nau lea ke ma‘u ae kakano i he e nau holi kovi.

¹⁹Io, naa nau lauikovi‘i ae Otua; naa nau behe, E faa teuteu e he Otua ae keinagaaga i he toafa?

²⁰Vakai, nae ta‘i eia ae makatuu, bea buna mei ai ae gaahi vai, bea bito o fetafeaki ae gaahi vaitafe; te ne faa tuku mai foki ae ma? e faa tokonaki eia ae kakano ma a hono kakai?

²¹Koia nae fanogo ki ai a Jihova, bea houhau ia: koia nae tutu ai ae afi kia Jekobe, bea nae tubu hake foki ae tubutamaki ki Isileli;

²²Koeuhi nae ikai te nau tui ki he Otua, bea nae ikai ha falala ki he ene fakamoui:

²³Ne ogo ene fekau‘i ae gaahi ao i oluga, mo ene too ae gaahi mataba oe lagi,

²⁴O ne tuku ke to hifo ae mana kiate kinautolu ke nau kai, bea ne foaki kiate kinautolu ae uite oe lagi.

²⁵Nae kai e he tagata ae mea kai ae kau agelo: naa ne tuku atu ae mea kai ke nau makona ai.

²⁶Nae bule eia ke maili ae matagi hahake i he lagi: bea ne omi moe matagi toga i he ene mafimafi.

²⁷Nae fakato hifo eia ae kakano kiate kinautolu o tatau moe efu, moe faga manu kabakau o hage koe oneone oe tahi:

²⁸Bea naa ne tuku ke to ia i he lotolotoga o ho nau fale fehikitaki, o takatakai i ho nau gaahi nofoaga.

²⁹Koia naa nau kai, bea nau makona: he naa ne age kiate kinautolu e nau holi.

³⁰Nae ikai te nau mavahe mei he e nau holi kovi. Ka i he kei i ho nau gutu ae maaga,

³¹Nae hoko ae houhau oe Otua kiate kinautolu, o ne tamate‘i ae fugani kakai jino iate kinautolu, bea ne ta hifo ae kau tagata kuo fili i Isileli.

³²Nae hoko ae gaahi mea ni, ka naa nau kei fai agahala be, o ikai tui ki he ene gaahi gaue mana.

³³Koia naa ne fakaoji ai ho nau gaahi aho i he mea vaiga be, mo ho nau gaahi ta‘u i he mamahi.

³⁴Bea i he ene tamate‘i akinautolu, naa nau toki kumi kiate ia: o nau tafoki o fehui fakavave ki he Otua.

³⁵Bea naa nau manatu ko ho nau maka ae Otua, bea ko ko nau huhui ae Otua maoluga.

³⁶Ka naa nau labu kiate ia i ho nau gutu, o nau loi kiate ia aki ho nau elelo.

³⁷He nae ikai totonu ho nau loto kiate ia, bea nae ikai te nau tuu mau i he ene fuakava.

³⁸Ka nae fonu ia i he aloofa, o ne fakamolemole e nau hia, bea nae ikai fakaauha akinautolu: io, nae liuga lahi ene fakaafe hono houhau, bea nae ikai te ne ue‘i hake hono houhau kotoabe.

³⁹He naa ne manatu koe kakano be akinautolu; koe matagi oku mole atu, bea ikai toe ha‘u.

⁴⁰Nae liuga fiha e nau fakahouhau kiate ia i he toafa, bea fakamamahi‘i ia i he botu lala!

⁴¹Io, naa nau foki kimui bea ahiahi‘i ae Otua, o nau hūhūmama‘i ae Toko Taha Maonioni o Isileli.

⁴²Nae ikai te nau manatu ki hono nima, be koe aho naa ne fakamoui ai akinautolu mei he fili.

⁴³Mo ene fai ene gaahi fakailoga i Ijibite, mo ene gaahi mea mana i he goue o Soani:

⁴⁴Naa ne liliu ho nau gaahi vaitafe koe toto; mo ho nau gaahi vai lahi, nae ikai te nau faa inu ai.

⁴⁵Nae fekau atu eia kiate kinautolu ae gaahi lago kehekehe, aia nae keina akinautolu; moe faga boto, aia nae fakakovi‘i akinautolu.

⁴⁶Nae tuku foki eia ae fua oe nau goue ki he unufe, moe nau gaue ki he faga hee.

⁴⁷Naa ne tamate‘i e nau gaahi vaine aki ae uhamaka, moe nau akau koe sukamino aki ae momoko lahi.

⁴⁸Nae tuku foki eia e nau faga manu ki he uhamaka, moe nau faga sibi ki he gaahi faijijili vela.

⁴⁹Nae li eia ae kakaha o ene ita kiate kinautolu, ae houhau lahi, moe tubutamaki, moe mamahi, i he ene fekau atu kiate kinautolu ae kau agelo oe kovi.

⁵⁰Naa ne tofa ae hala ki hono houhau; bea nae ikai te ne fakahaofi e nau moui mei he mate, ka naa ne tukuage e nau moui ki he mahaki lahi;

⁵¹O ne ta‘i ae uluaki fanau kotoabe i Ijibite; koe fugani malohi i he gaahi nofoaga o Hami.

⁵²Ka naa ne bule ke alu atu a hono kakai oona o hage koe faga sibi, o ne fakahinohino akinautolu i he toafa o hage koe fuu faga sibi.

⁵³Bea nae tataki fiemalie atu eia akinautolu, koia nae ikai ai te nau manavahe: ka nae lemohekina e he tahi a ho nau gaahi fili.

⁵⁴Bea nae omi eia akinautolu o ofi ki hono fale tabu, io, ki he mouga ni aia kuo fakatau e hono nima toomatau.

⁵⁵Nae kabuji foki eia ae hiteni mei ho nau ao, o ne vahe‘i kiate kinautolu ae tofia aki ae afo, bea ne bule ke nofo ae gaahi faahiga o Isileli i ho nau gaahi fale fehikitaki.

⁵⁶Ka naa nau kei ahiahi‘i mo fakahouhau‘i ae Otua fugani maoluga, o ikai tauhi ene gaahi fekau:

⁵⁷Ka naa nau foki kimui, o fai taeagatonu o hage koe nau gaahi tamai: nae alu kehe akinautolu o hage koe kaufana taka kehe.

⁵⁸Naa nau fakahouhau ia aki ho nau gaahi botu maoluga o nau fakafuaa ia aki e nau gaahi tamabua kuo ta.

⁵⁹Bea i he ogo‘i e he Otua ae mea ni, nae houhau ai ia, o fehia lahi ki Isileli:

⁶⁰Koia naa ne liaki ai ae fale fehikitaki o Sailo, ae nofoaga koia nae fokotuu eia i he lotolotoga oe kakai;

⁶¹O ne tukuage hono malohi ke bobula, mo hono nāunāu ki he nima oe fili.

⁶²Nae fakatukutuku‘i foki eia hono kakai ki he heleta; bea nae houhau ia ki hono tofia.

⁶³Nae kai ke oji e he afi ho nau kau talavou; bea nae ikai unoho e nau kau taahine.

⁶⁴Nae to e nau kau taulaeiki i he heleta; bea nae ikai fai ha tagi e ho nau unoho.

⁶⁵Bea nae toki a ai ae Eiki o hage ko ha taha nae mohe, bea hage koe tagata malohi oku kalaga koe mea i he uaine.

⁶⁶Bea nae ta‘i eia hono gaahi fili i ho nau botu kimui: naa ne tuku akinautolu ke manukia mau ai be.

⁶⁷Bea naa ne liaki ae fale fehikitaki o Josefa, bea nae ikai te ne fili ae faahiga o Ifalemi:

⁶⁸Ka naa ne fili ae faahiga o Juta, koe mouga ko Saione aia naa ne ofa ki ai.

⁶⁹Bea naa ne laga hono fale tabu o hage koe gaahi fale maoluga, o hage koe fonua aia kuo fokotuu mau ke taegata.

⁷⁰Nae fili foki eia a Tevita ko ene tamaioeiki, o ne too ia mei he gaahi loto a sibi:

⁷¹Naa ne omi ia mei he ene muimui i he faga sibi fefine nae talitali bo, ke ne fafaga a Jekobe ko hono kakai, mo Isileli ko hono tofia.

⁷²Bea naa ne fafaga akinautolu o fakatatau ki he agatonu o hono loto; o ne tataki akinautolu i he boto o hono nima.