KOE GAUE 11:1-30 TON1884 - Bible AI

¹1 Oku talatalaaki‘i a Bita i he ene alu ki he gaahi Jenitaile, 5 oku ne fakamatala hono uhiga, 18 oku fiemalie ai ae kau abosetolo. 19 Kuo mafola ae ogoogolelei ki Finesi, mo Salo, mo Aniteoke, bea fekau atu a Banebasa ke ne tokoni ae gaahi, kakai koia. 26 Oku tomua ui i Aniteoke ae kau akoga koe Kalisiano. 27 Oku ave e nau tokoni ofa ki he kaiga lotu i Jutea i he gaahi aho oe hoge. BEA fanogo ae kau abosetolo moe kaiga nae i Jutea, kuo ma‘u e he kakai Jenitaile foki ae folofola ae Otua.

²Bea kuo hoko a Bita ki Jelusalema, bea kikihi mo ia akinautolu nae i he kamu,

³O nau behe, Naa ke alu ki he kau tagata taekamu, o keinaga mo kinautolu.

⁴Bea fakaha e Bita mei hono tubuaga, o fakamatala hokohoko kiate kinautolu, o behe,

⁵Naaku i he kolo ko Joba, o fai eku lotu; bea i he āvea hoku loto neu mamata i he mea nae ha mai, Koe mea o hage ha fuu tubenu, nae tukutuku hifo mei he lagi, kuo fakakave‘i hono kaba e fa; bea a‘u hifo ia kiate au:

⁶Bea kuou fakamamau hoku mata ki ai, o tokaga, beau mamata ki he manu vee fa oe fonua, moe manu fekai, moe manu totolo, moe manu buna oe atā.

⁷Bea neu fanogo ki he le‘o, oku behe mai kiate au, Tuu, Bita; o tamate‘i o kai.

⁸Bea neu behe, Eiki, e ikai aubito: he oku heeki ai ke kai e hoku gutu ha mea oku ikai gofua be taemaa.

⁹Ka nae behe mai e he le‘o mei he lagi kiate au ko hono tuo ua, Koia kuo fakamaa e he Otua, oua naa ke behe oku ikai gofua.

¹⁰Bea nae fai ae mea ni o tuo tolu: bea toe fuji hake kotoabe ki he lagi.

¹¹Bea vakai, kuo ha‘u fakafokifa ae kau tagata e toko tolu ki he fale oku ou i ai, kuo fekau mai kiate au mei Sesalia.

¹²Bea nae fekau e he Laumalie keu alu mo kinautolu, bea oua naaku manavahe. Bea naa mau o mo au ae kaiga e toko ono ni, bea mau hu ki he fale oe tagata:

¹³Bea ne fakaha eia kiate kimautolu kuo ne mamata ia ki ha agelo i hono fale, nae tuu, o behe kiate ia, Ke ke fekau ki Joba ha kau tagata ke omi a Saimone, ko hono higoa e taha ko Bita;

¹⁴Bea e fakaha eia kiate koe ae gaahi lea e moui ai koe mo ho fale kotoabe.

¹⁵Bea i he eku kamata lea, nae to hifo kiate kinautolu ae Laumalie Maonioni, o hage kiate kitautolu i he kamataaga.

¹⁶Beau toki manatu ki he folofola ae Eiki, i he ene behe, Koe mooni nae babitaiso e Jone aki ae vai; kae babitaiso aki akimoutolu ae Laumalie Maonioni.

¹⁷Bea koeuhi kuo foaki e he Otua kiate kinautolu ae foaki, o hage ko kitautolu, nae tui ki he Eiki ko Jisu Kalaisi; bea kohai au, keu faa taofia ae Otua?

¹⁸Bea kuo nau fanogo ki he gaahi mea ni, naa nau fakalogobe, o fakamalo ki he Otua, o nau behe, Ta kuo tuku foki e he Otua ki he gaahi Jenitaile ae fakatomala ki he moui.

¹⁹Bea ko kinautolu nae fakamovetevete i he fakataga nae tubu ia Setiveni, naa nau fonoga atu o a‘u ki Finesi, mo Saibalo, mo Aniteoke, o malaga aki ae folofola ka ki he kakai Jiu be.

²⁰Bea ko ho nau niihi koe kau tagata mei Saibalo mo Sailine, bea i he e nau hoko ki Aniteoke, naa nau lea ki he kau Elinisito, o malaga aki ae Eiki ko Jisu.

²¹Bea nae iate kinautolu ae nima oe Eiki: bea nae tui ae toko lahi, mo tafoki ki he Eiki.

²²Bea kuo ogo mai ae mea ni ki he jiaji i Jelusalema: bea naa nau fekau atu a Banebasa, ke alu ia o a‘u ki Aniteoke.

²³Bea kuo hoko atu ia, o mamata ki he aloofa ae Otua, nae fiefia ia, mo ne ako kiate kinautolu kotoabe, ke nau bikitai ki he Eiki i he loto mau.

²⁴He koe tagata lelei ia, bea fonu i he Laumalie Maonioni moe tui: bea nae ului ki he Eiki ae kakai toko lahi.

²⁵Bea toki alu a Banebasa ki Tasusi, o kumi kia Saula:

²⁶Bea kuo ne ilo ia, naa ne omi ia ki Aniteoke. Bea naa na faa fakataha moe jiaji i he ta‘u kotoa, o ako ki he kakai toko lahi. Bea nae tomua ui i Aniteoke ae kau akoga koe Kalisitiane.

²⁷Bea i he gaahi aho koia, nae ha‘u ae kau balofita mei Jelusalema ki Aniteoke.

²⁸Bea nae tuu hake ho nau toko taha ko Akabusi hono higoa, o ne kikite i he Laumalie, e to ha hoge lahi ki mamani kotoabe: aia nae fakamooni i he gaahi aho o Kalotiusi Sisa.

²⁹Bea loto ae kau akoga ke taki taha foaki, o fakatatau mo ene ma‘umea, ke atu koe tokoni ki he kaiga oku nofo i Jutea:

³⁰Bea naa nau fai ia, bea ave ia ki he mātua i he nima o Banebasa mo Saula.