KOE GAUE 16:1-40 TON1884 - Bible AI

¹1 Oku kamu e Baula a Timote, 7 bea ue‘i ia e he Laumalie ki he gaahi fonua, 14 oku ne fakalotu‘i a Litea, 16 bea ne kabuji ae laumalie kikite. 19 Koe mea ia oku kauimaea ai mo fakahu ki he fale fakabobula a Baula mo Sailosi. 26 Oku fakaava ae gaahi mataba oe fale fakabobula. 31 Oku liliu ae leohi oe fale fakabobula. 37 bea hao akinaua. BEA toki a‘u atu ia ki Teabe mo Lisita: bea vakai, nae i ai ae akoga e toko taha, ko Timote hono higoa, koe tama ae fefine Jiu, nae tui; ka ko ene tamai koe Kiliki:

²Bea nae fakaogolelei ia e he kaiga i Lisita mo Ikoniume.

³Bea nae loto a Baula ke na o mo ia; bea ne ave o kamu ia, koeuhi koe kakai Jiu nae nofo i he gaahi botu koia: he naa nau ilo kotoabe ko ene tamai koe Kiliki.

⁴Bea i he e nau alu i he gaahi kolo, naa nau tuku kiate kinautolu ae fono aia nae fokotuu e he kau abosetolo moe mātua i Jelusalema, ke nau fai.

⁵Bea nae ajili ai ae tuu mau ae gaahi jiaji i he tui, bea nae fakatokolahi akinautolu e he aho kotoabe.

⁶Bea kuo oji a Filijia moe fonua ko Kaletia i he e nau alu, bea nae taofi e he Laumalie Maonioni ke oua naa nau malaga aki ae folofola i Esia,

⁷Hili e nau a‘u ki Misia, naa nau fai ke nau o ki Bitinia: ka nae taofi akinautolu e he Laumalie.

⁸Bea kuo tukuage a Misia, naa nau alu hifo ki Taloasi.

⁹Bea nae ha mai ha mea kia Baula i he bouli; Nae tuu mai ae tagata Masitonia, o kole kiate ia, o behe, Ha‘u ki Masitonia, o tokoni mai kiate kimautolu.

¹⁰Bea hili ene mamata ki he mea ha mai, naa mau ahiahi ke o leva ki Masitonia, bea mau matuaki ilo loto kuo ui e he Eiki ke mau malaga aki ae ogoogolelei kiate kinautolu.

¹¹Bea kuo mau tuku folau mei Taloasi, bea mau la taha ki Samotesia, bea i he aho naa na feholo‘i ki Neaboli;

¹²Bea mei ai ki Filibai, aia koe kolo lahi i he botu koia o Masitonia, bea koe kolo faka‐Loma: bea naa mau nofo i he kolo koia i he aho niihi.

¹³Bea naa mau alu i he aho sabate ki he tuaa kolo ki he vee vaitafe, koe botu nae faa fai ai ae lotu; bea naa mau nonofo, o lea ki he kau fefine nae fealuaki ai.

¹⁴Bea nae fanogo ae toko taha, koe fefine nae fakatau mea kulokula, aia nae higoa ko Litea, bea koe faa lotu ia ki he Otua, mei he kolo ko Taiataila; bea nae matala e he Eiki hono loto ke ne tokaga ki he gaahi mea nae lea aki e Baula.

¹⁵Bea kuo babitaiso ia, mo hono fale, bea ne kole, o behe mai, Kabau oku mou behe mooni, oku ou tui mooni ki he Eiki, mou ha‘u ki hoku fale, o nofo ai. Bea naa ne fakaafe akimautolu.

¹⁶Bea behe, i he e mau aluage ki he lotu, nae fakafetaulaki mai kiate kimautolu ha taahine kaunaga nae ulujino ai ae laumalie kikite, bea nae lahi ae koloa nae ma‘u e he ene kau matābule iate ia, i he ene kikite loi;

¹⁷Ko ia ia nae muimui ia Baula mo kimautolu, o behe ene kalaga, Koe kau tamaioeiki ae kau tagata ni ae Otua fugani maoluga, bea oku nau fakaha mai kiate kitautolu ae hala oe moui.

¹⁸Bea aho lahi mo ene fai behe be. Bea kuo mamahi ai a Baula, bea tafoki ia ki mui, o ne behe ki he laumalie, Oku ou fekau kiate koe, i he huafa o Jisu Kalaisi, ke ke alu kitua iate ia. Bea ne alu kitua ia i he feituulaa be koia.

¹⁹Bea kuo ilo e he ene kau matābule kuo oji ai e nau ma‘umea, bea nau buke a Baula mo Sailosi, o toho ki he botu fakatau, ki he kau fakamāu,

²⁰Bea omi akinaua ki he kau bule, mo nau behe, Koe Jiu ae ogo tagata ni, bea oku na veuveuki lahi e tau kolo,

²¹O na ako aki ae mea oku ikai gofua ke tau tui ki ai, be fai, he koe kakai Loma akitautolu.

²²Bea feohofi ae kakai kiate kinaua: bea nae haehae ho nau kofu e he kau bule, mo fekau ke haha akinaua.

²³Bea oji e nau haha o lahi akinaua, naa nau tuku akinaua ki he fale fakabobula, mo nau fekau ki he leo ke ne leohi mau akinaua:

²⁴Bea i he ene ma‘u ae fekau koia, naa ne fakahu akinaua ki he fale fakabobula i loto, bea ne fakama‘u ho na va‘e ki he akau.

²⁵Bea i he tuuabo malie, nae lotu mo hiva fakafetai ki he Otua a Baula mo Sailosi, bea nae fanogo ae kau bobula kiate kinaua.

²⁶Bea fakafokifa nae ai ae mofuike lahi, aia nae gau‘eue ai ae tuuga oe fale fakabobula: bea nae ava leva ae mataba kotoabe, bea movete ae ha‘i o nautolu taki taha kotoabe.

²⁷Bea i he a ae leo oe fale fakabobula mei he ene mohe, bea ne mamata kuo ava ae mataba oe fale fakabobula, naa ne unuhi ae heleta ke tamate‘i aki ia, he naa ne mahalo kuo feholaki ae kau bobula.

²⁸Ka nae kalaga aki e Baula ae le‘o lahi, o behe, Oua naa ke fai ha kovi kiate koe: he oku mau katoa i heni.

²⁹Bea nae toki ui eia ke omi ha māma, bea oho ia ki loto, bea ha‘u tetetete, o fakatomabee i he ao o Baula mo Sailosi,

³⁰O ne omi akinaua kitua, mo ne behe, Ogo eiki, koeha teu fai keu moui ai?

³¹Bea naa na behe, Tui ki he Eiki ko Jisu Kalaisi, bea te ke moui, mo ho fale.

³²Bea ne na lea aki ae folofola ae Eiki kiate ia, mo kinautolu kotoabe i hono fale.

³³Bea naa ne ave akinaua, o fufulu ho na lavea i he feituubo be koia; bea nae babitaiso ia, bea mo hono fale kotoabe.

³⁴Bea kuo ne omi akinaua ki hono fale, bea ne tuku ae mea kai kiate kinaua, bea fiefia ia, mo ne tui ki he Otua, aia mo hono fale kotoabe.

³⁵Bea bogibogi ai, nae fekau e he kau bule ae kau tagata fekau, ke nau behe, Tuku ke o ae ogo tagata na.

³⁶Bea tala atu ia e he leo oe fale fakabobula kia Baula, Kuo fekau mai e he kau bule ke tukuage akimoua: bea koia ke mo o, bea alu i he fiemalie.

³⁷Ka nae behe e Baula kiate kinautolu, Koe ogo Loma akimaua, bea kuo nau haha fakaha mo taefakamāu akimaua, mo li ki he fale fakabobula: bea oku nau kabuji fakafufu eni akimaua? e ikai; kae ha‘u be akinautolu o ave akimaua kitua.

³⁸Bea nae tala e he kau tagata fekau ae lea ni ki he kau bule: bea naa nau manavahe i he e nau fanogo koe ogo Loma akinaua.

³⁹Bea naa nau ha‘u o kole kiate kinaua, mo omi akinaua kitua, bea kole ke na o i he kolo.

⁴⁰Bea naa na omi mei he fale fakabobula, o na o kia Litea: bea hili e nau feiloaki moe kaiga, mo fakafiemalie‘i akinautolu, naa na fonoga atu.