KOE KAU FAKAMAU 20:1-48 TON1884 - Bible AI

¹1 Oku fakamatala i he fakataha lahi hono kovi. 8 Koe tuutuuni oe fakataha. 12 Oku tali fefeka ae kakai Benijimani ho nau eke e he kakai Isileli. 18 Oku to ae kau Isileli e toko fa mano i he tau e ua. 26 Oku nau hele‘i o fakaauha ae kau Benijimani, koe toko onogeau be oku toe. BEA nae toki alu ai kitua ae fānau a Isileli, bea katoa fakataha ae kakai o loto taha, mei Tani o a‘u ki Beasiba, moe fonua ko Kiliati, kia Jihova i Misiba.

²Bea nae ha‘u foki ae kakai malohi kotoabe, i he gaahi faahiga kotoabe o Isileli ki he fakataha oe kakai oe Otua, koe kau tagata tau e toko fa kilu nae too heleta.

³(Bea nae fanogo ae fānau a Benijimani kuo alu hake ki Misiba ae fānau a Isileli.) Bea nae behe e he fānau a Isileli, Tala kiate kimautolu, nae fefe‘i ae agakovi ni?

⁴Bea nae lea ae tagata Livai, aia koe unoho oe fefine nae fakabogi, o ne behe, Naaku hoko ki Kibea aia oku kau mo Benijimani, ko au mo hoku unoho, ke mau mohe.

⁵Bea nae tuu hake ae kau tagata Kibea kiate au, o nau ohofi mo kabui ae fale i he bouli, o nau tokaga ke tamate‘i au: bea naa nau tohotoho a hoku unoho, bea ne mate ia.

⁶Bea naaku too hoku unoho o tafatafa‘i, bea ave ia ki he fonua kotoabe oe tofia o Isileli: he kuo nau fai ae agahala moe mea kovi lahi i Isileli.

⁷Vakai, koe fānau a Isileli akimoutolu kotoabe; mou fakaha i heni ho mou loto, mo hoo mou fakakaukau.

⁸Bea nae tuu hake loto taha be ae kakai kotoabe, o behe, E ikai alu ha tau niihi ki fale, bea e ikai ha tau taha e afe ki hono fale.

⁹Ka ko eni ae mea te tau fai ki Kibea; te tau fai ae talotalo o alu hake ki ai;

¹⁰Bea te tau fili ae kau tagata e toko hogofulu mei he toko teau i he gaahi faahiga kotoabe o Isileli, moe toko teau i he toko afe, moe toko afe mei he toko mano kotoabe, koeuhi ke nau tokonaki meakai ki he kakai, koeuhi ka nau ka hoko ki Kibea o Benijimani, ke nau fai o fakatatau ki he agakovi kuo nau fai i Isileli.

¹¹Koia nae katoa ae kau tagata kotoabe o Isileli o tuu hake ki he kolo, o nau kau loto taha o hage koe tagata be taha.

¹²Bea nae fekau e he gaahi faahiga o Isileli ae kau tagata ki he faahiga katoa o Benijimani, o behe, Koeha ae agakovi ni aia kuo fai iate kimoutolu?

¹³Bea koeni, tuku mai kiate kimautolu ae kau tagata, ae fānau oe kovi, aia oku i Kibea, koeuhi ke mau tamate‘i akinautolu, kae fakagata ae kovi mei Isileli. Ka nae ikai tokaga e he fānau a Benijimani ki he lea a ho nau kaiga koe fānau a Isileli.

¹⁴Ka nae fakakatoa fakataha akinautolu e he fānau a Benijimani mei he gaahi kolo ki Kibea, ke nau alu o tau‘i ae fānau a Isileli.

¹⁵Bea nae lau ae fānau a Benijimani i he kuoga koia mei he gaahi kolo, koe toko ua mano moe toko ono afe, koe kau tagata nae too heleta, ka nae kehe ae kakai o Kibea, aia ko ho nau toko lahi koe kau tagata e toko fitugeau kuo fili.

¹⁶Bea i he kakai ni kotoabe nae i ai ae kau tagata ogoogo e toko fitugeau nae nima hema; nae boto kotoabe akinautolu i he makata, bea naa moe laulahi o ha foi louulu e taha, nae ikai ke hala ai.

¹⁷Bea nae lau hono toe oe kakai Isileli, kae tuku kehe a Benijimani, koe kau tagata e toko fa kilu nae faa too ae heleta; ko kinautolu ni kotoabe koe kau tagata tau.

¹⁸Bea nae tuu hake ae fānau a Isileli, bea alu hake ki he fale oe Otua, o nau kole ae boto i he Otua, o behe, Kohai iate kimautolu e alu a muomua hake ki he tau o tuu hake ki he fānau a Benijimani? Bea behe e Jihova, Ke alu muomua a Juta.

¹⁹Bea nae tuu hake ae fānau a Isileli i he abogibogi, bea teu tau ki Kibea.

²⁰Bea alu kitua ae kau tagata o Isileli ke tau‘i a Benijimani; bea nae fakanofo ae tau ae fānau a Isileli ke tau‘i akinautolu i Kibea.

²¹Bea nae ha‘u kituaa ae fānau a Benijimani mei Kibea, o nau ta hifo ki he kelekele i he kau Isileli i he aho koia ae toko ua mano moe toko ua afe.

²²Bea nae fakaaiai akinautolu e he kau tagata Isileli, o toe fakalaga ae tau i he botu koia naa nau tali teuteu ai i he uluaki aho.

²³(Bea nae alu hake ae fānau a Isileli o tagi i he ao o Jihova o a‘u ki he efiafi, bea kole ae fakakaukau ia Jihova, o behe, Teu toe alu ke tau‘i a Benijimani ko hoku tokoua? Bea behe e Jihova, Alu hake o tau‘i ia.)

²⁴Bea nae unuunu atu ae fānau a Isileli ke tau‘i ae fānau a Benijimani i hono ua oe aho.

²⁵Bea nae alu kitua a Benijimani mei Kibea ke tau‘i akinautolu i hono ua oe aho, bea toe ta hifo ki he kelekele i he fānau a Isileli ae toko taha mano moe toko ua afe; koe kau too heleta akinautolu kotoabe.

²⁶Bea nae toki alu hake ae fānau kotoabe a Isileli, moe kakai kotoabe, o hoko ki he fale oe Otua, o tagi, o nau nofo i ai i he ao o Jihova, o aukai i he aho koia o a‘u ki he efiafi, bea nae atu ae gaahi feilaulau tutu moe gaahi feilaulau fakalelei i he ao o Jihova.

²⁷Bea nae fehui ae fānau a Isileli kia Jihova, (he nae i ai ae buha oe fuakava oe Otua i he gaahi aho koia.

²⁸Bea nae tuu i hono haohaoga o ia a Finiasi, koe foha o Eliesa, koe foha o Elone, i he gaahi aho koia,) o behe, Teu toe alu kitua ke tau‘i ae fānau a Benijimani ko hoku tokoua, be teu tukuā? Bea behe e Jihova, Alu hake; he teu tukuage akinautolu ki ho nima abogibogi.

²⁹Bea nae fakatoka ae malumu e Isileli ke takatakai a Kibea.

³⁰Bea nae alu hake ae fānau a Isileli ke tau‘i ae fānau a Benijimani i hono tolu oe aho, o nau fokotuu teuteu be akinautolu ki Kibea, o hage koia naa nau fai.

³¹Bea nae alu kitua ae fānau a Benijimani ke tau‘i ae kakai, bea kuo matoho akinautolu mei he kolo: bea naa nau kamata teia ae kakai, o tamate‘i, o hage koe nau fuofua fai, i he gaahi hala lahi, (aia koe hala e taha ki he fale oe Otua, moe taha ki Kibea i he goue,) koe kau tagata Isileli e toko tolugofulu nai.

³²Bea behe e he fānau a Benijimani, Kuo ta hifo akinautolu i ho tau ao, o hage ko hono fuofua fai. Ka nae behe e he fānau a Isileli, Tau hola, bea toho aki akinautolu mei he kolo ki he gaahi hala lahi.

³³Bea nae tuu hake ae kau tagata kotoabe mei ho nau botu, bea tali tau be akinautolu i Beali‐tama: bea nae hiki ae malumu mei ho nau gaahi botu, io mei he gaahi goue mohuku o Kibea.

³⁴Bea naa nau ha‘u ke tau‘i a Kibea ae kau tagata fili e toko taha mano mei Isileli kotoabe, bea nae fakamanavahe ae tau: ka nae ikai te nau ilo kuo ofi ae kovi kiate kinautolu.

³⁵Bea nae teia a Benijimani e Jihova i he ao o Isileli: bea tamate‘i e he fānau a Isileli i he aho koia ae toko ua mano moe toko nima afe moe toko teau i he kakai Benijamani: nae too heleta akinautolu kotoabe.

³⁶Bea kuo mamata ae fānau a Benijimani kuo teia akinautolu: he nae matamata hola ae kau tagata Isileli i he ao oe kau Benijimani, koeuhi naa nau falala ki he malumu nae toka aia naa nau tuku o ofi ki Kibea.

³⁷Bea nae fai fakatootoo e he malumu, o oho atu ki Kibea; bea alu atu be ae malumu, o teia ae kolo kotoabe aki ae mata oe heleta.

³⁸Bea koeni, nae ai ae fakailoga nae fokotuu e he kau tagata Isileli moe malumu, koeuhi ke nau tutu ae afi ke ulo lahi moe ohuafi ke alu hake mei he kolo.

³⁹Bea i he kamata hola a Isileli i he tau, bea kamata ta‘i akinautolu e Benijimani, bea tamate‘i i he kau tagata Isileli ae kau tagata e toko tolugofulu nai: he naa nau behe, Koe mooni kuo ta hifo akinautolu i ho tau ao, o hage koe uluaki tau.

⁴⁰Bea i he kamata alu hake ae ulo afi mei he kolo moe gaahi bou ohuafi, bea tagaki kimui ae kau Benijimani o jio kimui iate kinautolu, bea vakai, kuo alu hake ki lagi ae ulo oe kolo.

⁴¹Bea i he tafoki ae kakai Isileli, nae ofo ae kau Benijimani: he naa nau vakai kuo hoko ae kovi kiate kinautolu.

⁴²Koia naa nau fulitua ki he kau tagata Isileli i he hala ki he toafa; ka nae lava‘i akinautolu e he tau; bea mo kinautolu nae hola kitua mei he gaahi kolo naa nau tamate‘i i ho nau lotolotoga.

⁴³Nae behe e nau akilotoa ae kau Benijimani o takatakai, bea tuli akinautolu, o malakaki faigofua hifo akinautolu o hagatonu ki Kibea o haga ki he hoboagalaa.

⁴⁴Bea nae to ai ae kau tagata Benijimani koe toko taha mano moe toko valu afe; koe kau tagata to‘a akinautolu kotoabe.

⁴⁵Bea naa nau tafoki o hola atu ki he toafa ki he maka ko Limoni: bea naa nau tamate‘i i he gaahi hala lahi ae kau tagata e toko nima afe; bea nae tuli malohi akinautolu o a‘u ki Kitomi, bea nae tamate‘i ae toko ua afe o kinautolu.

⁴⁶Koia ko kinautolu kotoabe nae to i he kakai Benijimani i he aho koia koe kau tagata e toko ua mano, moe toko nima afe aia nae too heleta: koe kau tagata to‘a akinautolu kotoabe.

⁴⁷Ka nae tafoki ae kau tagata e toko onogeau o hola ki he toafa o a‘u ki he maka ko Limoni, bea ne nau nofo i he maka ko Limoni i he mahina e fa.

⁴⁸Bea nae toe tafoki kimui ae kau tagata o Isileli ki he fānau a Benijimani, o teia akinautolu aki ae mata oe heleta, ae kau tagata oe kolo kotoabe, moe faga manu, moe mea kotoabe naa nau ilo: bea naa nau tutu foki ae kolo kotoabe naa nau hoko ki ai aki ae afi.