KOE TAGILAULAU A JELEMAIA 3:1-66 TON1884 - Bible AI

¹1 Oku tagi ae kau fai totonu koeuhi koe nau gaahi mamahi. 22 Koe mea i he aloofa ae Eiki oku tuu mau e nau amanaki. 37 Oku nau fakaha ae agatonu ae Otua. 55 Oku nau kole ae fakahaofi, 64 moe tautea ki ho nau kau fili. KO au koe tagata kuo mamata ki he mamahi i he mea ta a hono houhau.

²Kuo ne tataki au mo omi au ki he bouli kae ikai ki he māma.

³Koe mooni kuo ne liliu kiate au, oku ne liliu hono nima kiate au i he aho kotoa.

⁴Ko hoku kili mo hoku kakano kuo ne gaohi ke motua; kuo ne feji‘i hoku gaahi hui.

⁵Kuo ne laga‘i mea kiate au, bea kuo ne takatakai au aki ae kona moe mamahi.

⁶Kuo ne fokotuu au i he gaahi botu fakabouli, o hage ko kinautolu nae bekia i mua.

⁷Kuo ne a‘i takatakai au bea oku ikai teu faa hao kitua: kuo ne fakamamafa a eku ha‘i ukamea.

⁸O kau ka tagi foki mo kalaga, oku ne taetokaga‘i eku kole.

⁹Kuo ne a‘i hoku gaahi hala aki ae gaahi maka kuo ta, kuo ne fakabiko‘i hoku gaahi hala.

¹⁰Naa ne hage ha beaa oku toitoi kiate au, bea hage ha laione i he gaahi botu lilo.

¹¹Kuo ne mimio‘i hoku gaahi aluaga, bea kuo ne haehae au fakaikiiki: kuo ne gaohi au ke lala be.

¹²Kuo ne teke a ene kaufana bea kuo ne fokotuu au koe fakailoga ki he gahau.

¹³Kuo ne bule ki he gaahi gahau o ene tagai ke aji ki hoku gaahi koga loto.

¹⁴Koe manukiaga au ki hoku kakai; bea koe nau taaga i he aho kotoabe.

¹⁵Kuo ne fakafonu au aki ae kona, kuo ne fakakona‘i au aki ae kona i‘i.

¹⁶Kuo ne feji‘i foki hoku kau nifo aki ae kilikili, kuo ne bani au aki ae efu.

¹⁷Bea kuo ke hiki hoku laumalie ke mamao mei he melino: nae galo iate au ae monuia.

¹⁸Bea neu behe, ko eku malohi mo eku amanaki kuo auha mei a Jihova;

¹⁹I he eku manatu ki hoku mahaki bea mo eku mamahi, ae kona bea moe ahu.

²⁰Oku kei manatu ki ai hoku laumalie, bea oku agavaivai ia iate au.

²¹Koia oku ou fakamanatu ki hoku loto, bea koia oku ou kei ma‘u ai ae amanaki.

²²Koe mea i he aloofa a Jihova oku ikai te tau auha, koeuhi oku ikai ke gata ene manavaofa.

²³Oku foou ia i he bogibogi kotoabe, oku lahi hoo agatonu.

²⁴Oku behe e hoku laumalie, Ko hoku tofia a Jihova: koia teu amanaki lelei iate ia.

²⁵Oku lelei a Jihova kiate kinautolu oku tatali kiate ia, ki he laumalie oku kumi kiate ia.

²⁶Oku lelei ki he tagata ke ne amanaki, bea ne tatali fakatatoka foki ki he fakamoui mei a Jihova.

²⁷Oku lelei ki he tagata ke ne fua ae haamo i he ene kei talavou.

²⁸Oku ne nofo toko taha be, bea oku logobe, koeuhi kuo ne fua ia eia be.

²⁹Oku ne ai hono gutu i he efu, koe mea naa oku kei ai ha amanaki.

³⁰Oku ne tuku hono kouahe kiate ia oku ne ta‘i ia: oku ne bito aubito i he lau‘i kovi.

³¹He koeuhi e ikai liaki ke lauikuoga e Jihova:

³²He kabau te ne fakamamahi, ka te ne manavaofa foki o fakatatau ki hono lahi o ene gaahi aloofa.

³³He oku ikai te ne fie tautea, be fakamamahi ae fānau ae tagata.

³⁴Ke laiki i hono lalo va‘e ae gaahi bobula kotoabe o mamani,

³⁵Ke fakaafe ae totonu oe tagata i he ao oe fofoga oe Fugani Maonioni,

³⁶Ke kākā‘i ae tagata i hono fakamau‘i oku ikai lelei ai a Jihova.

³⁷Kohai ia oku fakaha, bea oku hoko ia, o kabau oku ikai ke fekau e Jihova?

³⁸Oku ikai ke alu mei he fofoga oe Fugani Maoluga ae lelei moe kovi.

³⁹Koeha oku lāuga ai ae tagata moui, ae tagata koeuhi koe tautea o ene gaahi agahala?

⁴⁰Ke tau kumi mo ahiahi‘i ho tau gaahi aluaga bea toe tafoki kia Jihova.

⁴¹Ke tau hiki hake ho tau loto mo ho tau nima ki he Otua i he gaahi lagi.

⁴²Kuo mau fai talagataa, bea kuo mau agatuu: oku heeki ai te ke fakamolemole.

⁴³Kuo ke uufi aki ae houhau, bea fakataga‘i akimautolu: kuo ke tamate‘i bea nae ikai te ke manavaofa.

⁴⁴Kuo ke ufiufi koe aki ae ao, ke oua naa aji atu ae mau kole.

⁴⁵Kuo ke gaohi akimautolu koe efe moe otoota i he lotolotoga oe kakai.

⁴⁶Kuo mafaa ae gutu a ho mau kau fili kotoabe kiate kimautolu.

⁴⁷Kuo hoko mai ae manavahe moe tauhele kiate kimautolu, ae lala moe auha.

⁴⁸Oku tafe hifo hoku mata, hage koe gaahi vaitafe, koeuhi koe auha ae ofefine o hoku kakai.

⁴⁹Oku tafe hifo a hoku mata, bea ikai oji, oku ikai jii ke tuku.

⁵⁰Ke oua ke afio mai a Jihova bea vakai mei he lagi.

⁵¹Ko hoku mata oku ne ue‘i hoku loto, koeuhi koe gaahi ofefine kotoabe o eku kolo.

⁵²Nae tuli fakamamahi au e hoku kau fili hage ha manu buna, tae haano uhiga.

⁵³Kuo nau motuhi eku moui i he fale fakabobula, bea kuo li ha maka kiate au.

⁵⁴Nae melemo hoku ulu i he gaahi vai; bea neu toki behe, Kuo motuhi au.

⁵⁵E Jihova neu ui ki ho huafa mei he fale fakabobula tau mamao.

⁵⁶Kuo ke fanogo ki hoku le‘o; Oua naa ke fufu ho fofoga ki he eku mānava, ki he eku tagi.

⁵⁷Naa ke unuunu mai o ofi i he aho koia neu ui kiate koe: naa ke behe, Oua naa manavahe.

⁵⁸E Jihova kuo ke lagomaki‘i hoku laumalie; kuo ke huhui eku moui.

⁵⁹E Jihova kuo ke afio‘i ki he kovi kuo fai kiate au, fakamāu ekoe eku mea.

⁶⁰Kuo ke afio ki he e nau lili kotoabe, moe nau gaahi filioi kiate au.

⁶¹E Eiki kuo ke fanogo ki he e nau taukae bea moe nau gaahi filioi kiate au;

⁶²Ae lougutu onautolu nae tuu hake kiate au, bea moe nau fakatubu mea kiate au i he aho kotoabe.

⁶³Vakai ki he e nau nofo hifo moe nau tuu hake; ko au koe nau taaga.

⁶⁴E Eiki ke ke tuku kiate kinautolu ha totogi, o fakatatau ki he gaue a ho nau nima.

⁶⁵Tuku kiate kinautolu ae mamahi oe loto, a hoo malaia kiate kinautolu.

⁶⁶Fakataga mo fakaauha akinautolu i he houhau mei he lalo lagi a Jihova.