KOE TOHI A ESELA 4:1-24 TON1884 - Bible AI

¹1 Koe fie taofi e he niihi ae laga hake oe fale tabu. 17 Koe tuutuuni a Atakisekisi. 23 Kuo taofi ae laga fale. BEA i he fanogo e he gaahi fili o Juta mo Benijimani oku laga ae fale tabu kia Jihova koe Otua o Isileli e he fānau nae fakabobula:

²Naa nau ha‘u ai kia Selubebeli, bea ki he kau tuu ki mua i he kau mātua, o nau behe kiate kinautolu, Tuku ke mau laga mo kimoutolu: he oku mau kumi ki ho mou Otua, o hage ko kimoutolu; bea kuo mau feilaulau kiate ia talu ae gaahi aho o Esahatoni koe tu‘i o Asilia, aia nae omi akimautolu ki heni.

³Ka nae lea a Selubebeli, mo Jesua, mo hono toe oe kau mātua tuu kimua o Isileli, o behe kiate kinautolu, Oku ikai te mou kau jii mo kimautolu i he laga ae fale ki ho mau Otua; ka te mau fai fakataha ekimautolu be ae laga fale kia Jihova koe Otua o Isileli, o hage koe fekau ae tu‘i ko Kolesi koe tu‘i o Beasia kiate kimautolu.

⁴Bea nae toki fakavaivai e he kakai oe fonua ae nima oe kakai o Juta, o fakamamahi akinautolu i he laga fale,

⁵Bea naa nau totogi ki he kau fakakaukau ke taofi kiate kinautolu, mo fakataeaoga e nau tuutuuni, i he gaahi aho kotoabe o Kolesi koe tu‘i o Beasia, o hoko moe bule a Talaiasi koe tu‘i o Beasia.

⁶Bea i he bule a Ahasivelo, i hono kamataga o ene bule, naa nau tohi kiate ia ae tohi talakovi‘i ae kakai o Juta mo Jelusalema.

⁷Bea nae tohi i he gaahi aho o Atakisekisi e Bisilami, mo Mitilitati mo Tabeli, mo hono toe oe nau kaumea, kia Atakisekisi koe tu‘i o Beasia; bea nae fai ae tohi i he lea faka‐Silia, bea nae fakamatala ia i he lea faka‐Silia.

⁸Nae tohi e he eiki fakamāu ko Lihumi mo Simisai koe tagata tohi ae tohi fakakovi‘i o Jelusalema kia Atakisekisi koe tu‘i o behe:

⁹Bea nae tohi ai e Lihumi koe eiki fakamāu mo Simisai koe tagata tohi, mo hono toe oe nau kaumea: koe kau Tinaie moe kau Afasatikai, koe kau Tabilai moe kau Afalisai, koe kau Akivi, moe kau Babilone, moe kau Susa, moe kau Tehavi, moe kau Elami,

¹⁰Mo hono toe oe gaahi buleaga aia nae omi e he eiki lahi mo ogolelei ko Asinaba, bea tuku ki he gaahi kolo o Samelia, mo hono toe oku i he botu kauvai ni oe vaitafe, bea i he kuoga koia.

¹¹Ko hono hiki eni oe tohi aia naa nau ave kiate ia, io kia Atakisekisi koe tu‘i: Ko hoo kau tamaioeiki koe kau tagata i he botu kauvai ni oe vaitafe, bea i he kuoga koeni.

¹²Ke ilo e he tu‘i, koeuhi koe kau Jiu nae alu hake meiate koe kiate kimautolu kuo nau hoko ki Jelusalema, bea oku nau laga ae kolo agakovi moo faa agatuu, bea kuo nau fokotuu hake hono gaahi a maka, bea kuo nau fakahoko hono gaahi tuuga.

¹³Koeni ke ilo e he tu‘i, kabau e laga ae kolo ni, bea toe fokotuu a hono gaahi a maka, e ikai te nau kei totogi, bea tukuhau, be totogi fakatau, bea te ke maumau ai ae tukuhau ki he gaahi tu‘i.

¹⁴Bea koeni, koe mea i he e mau ma‘u ho mau tokoni mei he fale oe tu‘i, bea nae ikai tāu mo kimautolu ke mamata ki he fakaogokovi oe tu‘i, koia kuo mau fekau ai o fakaha ia ki he tu‘i;

¹⁵Koeuhi ke fai ae kumi i he tohi fakamanatu a hoo gaahi tamai: koia te ke ilo ai i he tohi oe tohi fakamanatu, mo ke ilo koe kolo ni koe kolo agatuu, bea kovi ki he gaahi tu‘i moe gaahi fonua, bea naa nau laga‘i ae agatuu i ai i mua: koe mea koia nae fakaauha ai ae kolo ni.

¹⁶Oku mau fakababau ki he tu‘i, kabau e toe laga ae kolo ni, bea fokotuu hono a maka, koe mea koia e ikai te ke ma‘u ai ha tofia i he botu kauvai ni oe vaitafe.

¹⁷Bea nae ave e he tu‘i a hono tali kia Lihumi koe eiki fakamāu, mo Simisai koe tagata tohi, bea ki hono toe oe nau kaumea nae nofo i Samelia, bea ko hono toe nae nofo ki he kauvai e taha oe vaitafe, o behe, Mou fiemalie, be i he kuoga ni.

¹⁸Koe tohi naa mou fai o omi kiate au nae lau totonu ia i hoku ao.

¹⁹Bea neu fekau, bea nae fai ae kumi, bea kuo ilo koe kolo ni nae fai ae agatuu i mua ki he gaahi tu‘i, bea nae fai i ai ae agatuu moe agakovi.

²⁰Bea nae i ai i mua ae gaahi tu‘i malohi lahi foki nae bule i Jelusalema, aia nae bule ki he gaahi fonua kotoabe i he kauvai e taha oe vaitafe; bea nae atu kiate kinautolu ae totogi, moe tukuhau, moe totogi fakatau.

²¹Bea koeni mou fekau ki he kau tagata ke tuku, bea ke oua naa laga ae kolo ni, kae oua ke hoko atu ha fekau e taha meiate au.

²²Bea koeni, vakai, oua naa mou liaki ae mea ni: koeha ka tubu ai ae kovi ke kovi ai ae gaahi tu‘i?

²³Bea koeni i he lau hono hiki oe tohi ae tu‘i ko Atakisekisi i he ao o Lihumi mo Simisai koe tagata tohi, mo ho nau kaumea, naa nau alu fakatootoo hake ki Jelusalema ki he kakai Jiu, bea taofi fakamalohi be akinautolu ke tuku.

²⁴Bea nae toki tuku ai ae gaue ki he fale oe Otua aia oku i Jelusalema. Koia nae tuku ia o a‘u ki hono ua ta‘u oe bule a Talaiasi koe tu‘i o Beasia.