KOE TOHI A ESELA 7:1-28 TON1884 - Bible AI

¹1 Oku alu hake ki Jelusalema a Esela. 11 Koe fekau agaofa a Atakisekisi kia Esela. 27 Oku fakafeta‘i e Esela ki he Otua i he ene ofa. BEA hili ae gaahi mea ni, i he bule a Atakisekisi koe tu‘i o Beasia, ko Esela koe foha o Selaia, koe foha o Asalia, koe foha o Hilikia,

²Koe foha o Salumi, koe foha o Satoki, koe foha o Ahitube,

³Koe foha o Amalia, koe foha o Asalia, koe foha o Milaioti,

⁴Koe foha o Selaia, koe foha o Usa, koe foha o Buki,

⁵Koe foha o Abisua, koe foha o Finiasi, koe foha o Eliesa, koe foha o Elone koe taulaeiki lahi:

⁶Koe Esela ni nae alu hake ia mei Babilone; bea koe tagata tohi ia nae boto i he fono o Mosese, aia nae foaki kiate ia e Jihova koe Otua o Isileli: bea nae tuku kiate ia e he tu‘i aia kotoabe naa ne kole, o fakatatau ki he kau ae nima o Jihova ko hono Otua kiate ia.

⁷Bea nae alu hake ae niihi oe fānau a Isileli, bea oe kau taulaeiki moe kau Livai, moe kau hiva, moe kau leo mataba, moe kau Netenimi, ki Jelusalema, i hono fitu ta‘u o Atakisekisi koe tu‘i.

⁸Bea nae ha‘u ia ki Jelusalema i hono nima oe mahina, i hono fitu ta‘u oe tu‘i.

⁹He nae kamata ene fonoga hake, mei Babilone i he uluaki aho i hono uluaki oe mahina, bea i hono uluaki aho i hono nima oe mahina nae hoko ia ki Jelusalema, o fakatatau, ki he kau lelei ae nima o hono Otua kiate ia.

¹⁰He nae oji hono teu‘i hono loto e Esela ke kumi i he fono a Jihova, bea ke fai ia, bea ke akonaki i Isileli ae gaahi tuutuuni, moe gaahi fakamāu.

¹¹Bea ko hono hiki eni oe tohi nae atu e he tu‘i ko Atakisekisi kia Esela koe taulaeiki, koe tagata tohi ia, io koe tagata tohi ae gaahi lea oe gaahi fekau a Jihova, bea mo ene gaahi tuutuuni ki Isileli.

¹²Ko Atakisekisi, koe tu‘i oe gaahi tu‘i, kia Esela koe taulaeiki, koe tagata tohi oe fono ae Otua oe lagi, ke iate koe ae fiemalie lelei, i he kuoga koeni.

¹³Oku ou fai ae fono, koeuhi ko kinautolu oe kakai o Isileli, bea mo ene kau taulaeiki, moe kau Livai, i hoku buleaga, aia oku tokaga i ho nau loto lelei ke alu hake ki Jelusalema, ke nau alu mo koe.

¹⁴Bea koe mea i he alu koe mei he tu‘i bea mo ene kau fakakaukau e toko fitu, ke fehui ki Juta mo Jelusalema, o fakatatau ki he fono a ho Otua aia oku i ho nima;

¹⁵Bea ke fetuku ae siliva moe koula, aia kuo atu fiemalie be e he tu‘i mo ene kau fakakaukau ki he Otua o Isileli, aia oku i Jelusalema hono fale nofoaga.

¹⁶Bea moe siliva moe koula kotoabe aia ke ke faa ilo i he botu kotoabe o Babilone, moe mea atu loto lelei be ae kakai, bea moe kau taulaeiki, oku atu loto lelei be ma ae fale o ho nau Otua aia oku i Jelusalema:

¹⁷Koeuhi ke ke fakatau vave aki ae gaahi baaga ni ae faga bulu, moe faga sibi tagata, moe faga lami, mo ho nau gaahi feilaulau meakai, moe gaahi feilaulau mea inu, bea ke atu ia ki he fuga oe feilaulauaga oe fale o ho mou Otua aia oku i Jelusalema.

¹⁸Bea koia e mata lelei kiate koe, mo ho gaahi kaiga ke fai ki hono toe oe siliva moe koula, mou fai ia o fakatatau ki he finagalo o ho mou Otua.

¹⁹Koe gaahi ibu foki nae tuku kiate koe ki he gaue oe fale o ho Otua, ke ke atu ia i he ao oe Otua o Jelusalema.

²⁰Bea moia kotoabe oku aoga ki he fale o ho Otua, aia te ke loto ki ai ke foaki, foaki ia mei he fale koloa oe tu‘i.

²¹Bea ko au, io ko au Atakisekisi koe tu‘i, oku ou fai ae fono ki he kau tauhi koloa kotoabe aia oku i he botu ki tua i he vaitafe, ke iloga aia oku fie ma‘u e Esela koe taulaeiki, koe tagata tohi oe fono ae Otua oe lagi, ke fai vave ia kiate ia,

²²O fai hake ki he taleniti siliva e teau, moe buha fua oe uite e teau, bea ki he kaloni e fitugeau ma nimagofulu oe uaine, bea ki he kaloni e fitugeau ma nimagofulu oe lolo, moe masima e ikai lau ki hono lahi.

²³Koia kotoabe oku fekau e he Otua oe lagi, tuku ke fai vave ia ma ae fale oe Otua oe lagi: he koeha ka tuu ai ae houhau ki he buleaga oe tu‘i be ki hono gaahi foha?

²⁴Bea oku mau fakababau foki kiate kimoutolu, koe mea ki he kau taulaeiki moe kau Livai, moe kau hiva, moe kau leo mataba, moe kau Netenimi, be koe kau tauhi oe fale ni oe Otua, oku ikai gofua ke tala totogi, be ha tukuhau, be ha fakafatogia, kiate kinautolu.

²⁵Bea ko koe, e Esela, o hage koe boto a ho Otua, oku i ho nima, ke ke fakanofo ae kau bule, moe kau fakamāu, aia ke nau fakamāu ae kakai kotoabe oku i he tua vaitafe, akinautolu oku ilo lelei ae fono a ho Otua; bea mou ako ia, kiate kinautolu oku ikai te nau ilo ki ai.

²⁶Bea iloga aia oku ikai fai ki he fono o ho Otua, moe fono ae tu‘i, ke fakahoko vave ae fakamāu kiate ia, be ko ha mea ki he mate, be ki he kabuji ia, be ki he faao o ene gaahi mea, be ki he fakahu ki he fale fakabobula.

²⁷Fakafetai kia Jihova koe Otua oe tau gaahi tamai, aia kuo ne ai ae mea behe ni ki he loto oe tu‘i, ke fakamatamata lelei ki he fale o Jihova aia oku i Jelusalema:

²⁸Bea kuo ne tuku ae agaofa kiate au i he ao oe tu‘i, moe ene kau fakakaukau, bea i he ao oe houeiki ogoogolahi ae tu‘i. Bea nae fakamalohi‘i au i he iate au ae nima o Jihova ko hoku Otua, bea neu tanaki fakataha mei Isileli ae kau tagata tuu ki mua ke mau alu hake mo au.