KOE TOHI A HOSEA 7:1-16 TON1884 - Bible AI

¹1 Koe valoki ki he agahala kehekehe. 11 Koe houhau oe Otua kiate kinautolu koeuhi koe nau malualoi. I HE eku tokaga ke fakamoui a Isileli, nae toki ha ae agahala a Ifalemi, bea moe agakovi a Samelia: he oku nau fai kākā; bea oku hu ki loto ae kaihaa, bea oku maumau itua e he fakataha oe kau kaihaa.

²Bea oku ikai te nau tokaga i ho nau loto, oku ou manatu ki he e nau agakovi kotoabe: ko eni, oku kabui akinautolu e he e nau faiaga anautolu; oku i hoku ao ia.

³Oku nau fakafiefia‘i ae tu‘i i he e nau agakovi, bea moe houeiki i he e nau gaahi loi.

⁴Koe kau feauaki akinautolu kotoabe: o hage koe gotoumu kuo fakaafu e he tagata ta‘o ma, oku ne tuku ia hili ene natu ae ma, kae oua ke tubu.

⁵I he aho o ho tau tu‘i kuo fakakona ia e he houeiki aki ae gaahi hina uaine; naa ne mafao hono nima moe kau manuki.

⁶Kuo nau teuteu ho nau loto hage koe gotoumu, i he e nau kei lama: oku mohe i he bo kotoa e nau tagata ta‘o ma; i he bogibogi oku vela ia hage koe afi ulo.

⁷Oku nau vela kotoabe hage koe gotoumu; kuo nau kai o oji e nau kau fakamāu; kuo higa ho nau gaahi tu‘i kotoabe: oku ikai ha toko taha iate kinautolu oku ui kiate au.

⁸Kuo fakataha ia moe kakai a Ifalemi; koe foi ma taefokihi a Ifalemi.

⁹Kuo kai hono malohi e he kau muli, ka oku ikai te ne ilo; io, koe louulu hinehina oku iate ia i heni mo ena, ka oku ikai te ne ilo ia.

¹⁰Bea koe fielahi a Isileli, oku fakatohifo ia i hono ao: bea oku ikai te nau tafoki kia Jihova ko ho nau Otua, be kumi kiate ia i he gaahi mea ni kotoabe.

¹¹Oku hage foki a Ifalemi koe lube vale oku ikai hano loto: oku nau ui ki Ijibite, bea nau alu ki Asilia.

¹²Oka nau ka alu teu fola hoku kubega kiate kinautolu; teu omi akinautolu ki lalo o hage koe faga manu buna oe lagi: teu tautea akinautolu, o fakatatau moe fanogo ae nau fakataha.

¹³Malaia kiate kinautolu! he kuo nau hola meiate au: fakaauha akinautolu! koeuhi kuo nau talagataa kiate au: ne ogo a eku huhui akinautolu, kuo nau lea loi kiate au.

¹⁴Bea oku ikai te nau tagi kiate au, aki ho nau loto i he e nau kaila i ho nau mohega: oku nau fakataha akinautolu ki he koane moe uaine, bea oku nau agatuu kiate au.

¹⁵Ne ogo eku nonoo mo fakamalohi ho nau nima, ka oku nau filioi kovi kiate au.

¹⁶Oku nau tafoki, kae ikai ki he Fugani Maoluga: oku nau hage koe kaufana kākā: e to i he heleta ho nau houeiki, koe mea i he ita a ho nau elelo; ko ho nau manuki eni i he fonua ko Ijibite.