KOE TOHI A ISAIA 1:1-31 TON1884 - Bible AI

¹1 Oku lāuga a Isaia i he agatuu a Juta. 5 Bea tagi ia i ke e nau mamahi. 10 Oku ne valoki‘i e nau gaue kotoabe. 16 Oku ne eginaki aki ae gaahi talaofa mo ne fakailo ae houhau ke nau fakatomala. 21 I he ene mamahi koeuhi koe nau agakovi, oku ne fakaha ae gaahi fakamāu ae Otua. 25 Oku ne fakailo ae ofa, 28 mo ne fakaha ae fakaauha ki he agakovi. KOE mea nae ha mai kia Isaia koe foha o Amosi, aia naa ne mamata oku kau ki Juta mo Jelusalema i he gaahi aho o Usia, mo Jotame, mo Ahasi, bea mo Hesekaia, koe gaahi tu‘i o Juta.

²Mou fanogo, ae gaahi lagi, bea fakafanogo mo mamani: he oku folofola a Jihova, Kuou fafaga mo tauhi ae fānau, bea kuo nau agatuu kiate au.

³Oku ilo e he bulu aia oku aana ia, bea moe asi ae fale manu o ene eiki: ka oku ikai ilo e Isileli, oku ikai tokaga a hoku kakai.

⁴Oiau! ae buleaga agakovi, koe kakai māfajia i he hia, koe hako fai mea kovi, koe fānau oku fakahala: kuo nau liaki a Jihova, kuo nau fakahouhau‘i ae Toko Taha Maonioni o Isileli, kuo nau fakaholomui.

⁵Koeha e toe teia ai akimoutolu? e tubulaki be hoo mou agatuu: oku mahaki ae ulu kotoabe, bea vaivai moe loto kotoabe.

⁶Mei he aofi va‘e o a‘u ki he ulu oku ikai ha haohaoa i ai; ka koe lavea, moe volu, moe bala kovi: oku heeki ai fakamaobo, be nonoo, be feau aki ae lolo faitoo.

⁷Kuo lala ho mou fonua, kuo vela ho mou gaahi kolo i he afi: bea ko ho mou fonua, oku kai o oji e he kakai muli i ho mou ao, bea oku lala ia, o hage kuo fakaauha e he kau muli.

⁸Bea kuo tuku ae ofefine o Saione o hage koe fale jii i he goue vaine, o hage koe fale leo i he goue kukumiba, o hage koe kolo kuo kabui e he tau.

⁹Ka ne ikai tuku kiate kitautolu e Jihova oe gaahi kau tau ha toko jii, behe, kuo tau hage ko Sotoma, bea kuo tau tatau mo Komola.

¹⁰Fanogo ki he folofola a Jihova, akimoutolu ae kau bule o Sotoma; fakafanogo ki he fono a ho tau Otua, akimoutolu koe kakai o Komola.

¹¹Oku behe e Jihova, Koeha hono aoga o hoo mou gaahi feilaulau lahi kiate au? Kuou fiu i he feilaulau aki ae faga sibi tagata, moe gako oe manu jino; bea oku ikai teu fiemalie i he toto oe faga bulu, be koe faga lami, be koe faga koji tagata.

¹²Oka mou ka ha‘u ke fakaha akimoutolu i hoku ao, kohai kuo ne fekau ke omi ae mea ni i ho mou nima, ke malaki hoku gaahi botu tabu?

¹³Oua naa toe omi ae gaahi feilaulau taeaoga; koe mea fakalielia kiate au ae tutu oe akau namu lelei; koe gaahi mahina foou moe gaahi aho tabu, moe ui ke fakataha, oku ikai teu faa kataki; bea naa moe fakataha ke lotu koe agahala ia.

¹⁴Oku fehia a hoku laumalie ki hoo mou gaahi mahina foou mo hoo mou gaahi katoaga: koe mea fakamamahi ia kiate au; kuou fiu i hono kataki.

¹⁵Oka mou ka mafao ho mou nima, teu fufu hoku fofoga iate kimoutolu: io, oka mou ka hu o liuga lahi, e ikai teu fanogo: he oku bito ho mou nima i he toto.

¹⁶Fufulu akimoutolu, o gaohi ke mou maa; hiki ke mamao meiate au ae kovi o hoo mou faiaga; tuku ae fai kovi;

¹⁷Ako ke mou fai lelei: kumi ki he agatonu, tokoni akinautolu kuo fakamalohia, fakamāu ki he tamai mate, lagomaki‘i ae fefine kuo mate hono unoho.

¹⁸Oku behe e Jihova, Mou ha‘u, bea ke tau alea fakataha: he ne ogo ae tatau o hoo mou agahala moe kulaahoaho, e hoko ia ke hinehina o hage koe uha hinaekiaki; kabau oku kulokula ia o hage koe kulamumu, e tatau ia moe fulufulu‘i sibi.

¹⁹Kabau te mou loto ki ai mo talagofua, te mou kai hono lelei oe fonua:

²⁰Ka i hoo mou talagataa mo agatuu, e auha ai akimoutolu i he heleta: he kuo folofola behe ae fofoga o Jihova.

²¹Hono ikai liliu fau ae kolo nae agatonu koe faa feauaki! nae fonu ia i he fakamāu; nae nofo ai ae maonioni; ka oku i ai ni ae kau fakabo.

²²Kuo hoko hoo siliva koe taeaoga, mo hoo uaine kuo hui aki ae vai:

²³Oku agatuu ho mou houeiki, bea kaumea moe kau kaihaa: oku nau manako kotoabe ki he gaahi foaki, o nau muimui ki he totogi: oku ikai te nau fakamāu ki he tamai mate, bea oku ikai a‘u kiate kinautolu ae mamahi ae fefine kuo mate hono unoho.

²⁴Koia oku behe e he Eiki, ko Jihova oe gaahi kau tau, koe Toko Taha Mafimafi o Isileli, Io, teu fakafiemalie‘i au iate kinautolu oku agatuu mai, bea teu totogi e au ki hoku gaahi fili.

²⁵Bea e toe ala hoku nima kiate koe, bea fakamaa mooni hoo uli, bea ave mo hoo kovi kotoabe:

²⁶Bea teu toe fakanofo hoo kau fakamāu o hage koia i mua, bea mo hoo kau fakakaukau boto o hage koia i he kamataga: bea hili ia e ui koe, Koe kolo maonioni, koe kolo agatonu.

²⁷E huhui a Saione aki ae fakamāu, mo ene kakai ului aki ae maonioni.

²⁸Bea e fakaauha fakataha ae kau talagataa moe agahala, bea e auha akinautolu oku liaki a Jihova.

²⁹He te nau ma i he gaahi akau naa mou holi ki ai, bea te mou bubutuu i he gaahi goue kuo mou fili.

³⁰He te mou tatau moe akau kuo mae hono lau, bea hage koe goue oku ikai hano vai.

³¹Bea e tatau ae malohi moe kaka, bea mo ene gaue o hage koe kalofiama, bea te na vela fakataha, bea e ikai tamate‘i ia e ha toko taha.