KOE TOHI A ISAIA 22:1-25 TON1884 - Bible AI

¹1 Oku mamahi ae balofita i he tau‘i a Jelusalema e he kakai o Besia. 8 Oku ne valoki‘i ho nau boto fakatagata moe fiefia fakamāma. 15 Oku ne kikite ki he majiva o Sebina. 20 Bea ko hono fetogi ko Iliakimi, o ne fakatātā ki he buleaga o Kalaisi. KOE tala mamafa oku kau ki he telea oe mea ha mai. Koeha kuo hoko kiate koe, koeuhi ke alu ai hoo kakai kotoabe ki he gaahi tua fale?

²Akoe oku ke fonu i he logoaa, koe kolo maveuveu, koe kolo oe fakavā: ko hoo kakai kuo mate nae ikai mate i he heleta, be mate i he tau.

³Kuo hola fakataha hoo kau bule kotoabe, kuo ha‘ijia akinautolu e he kau tagata fana: ko kinautolu kotoabe oku ilo iate koe kuo ha‘i fakataha, akinautolu kuo hola mei he mamao.

⁴Koia naaku behe, Jio kehe meiate au; teu tagi mamahi, oua naa ahiahi ke fakafiemalie‘i au, koeuhi koe maumau oe ofefine o hoku kakai.

⁵He koe aho oe mamahi ia, moe malaki hifo, bea moe faigataa, koeuhi koe Eiki ko Jihova oe gaahi kau tau i he telea oe mea ha mai, i he maumau‘i ae gaahi a maka, bea moe tagi ki he gaahi mouga.

⁶Bea nae too e Ilami ae hofagahau moe gaahi saliote ae tagata moe tagata heka hose, bea too e Kili ae kofu oe fakaū.

⁷Bea e behe, e fonu ho gaahi telea lelei i he gaahi saliote, bea e fakate ae kau tau heka hose i he mataba.

⁸Bea e tatala ae mea ufiufi o Juta, bea te ke vakai i he aho koia ki he mahafu tau i he fale oe vao lahi.

⁹Bea te mou mamata ki he gaahi ava i he kolo o Tevita, koeuhi oku lahi ia: bea te mou tanaki fakataha ae gaahi vai ki he luo vai ki lalo.

¹⁰Bea kuo mou lau ae gaahi fale o Jelusalema, bea kuo mou veteki ae gaahi fale ke fakamalohi aki ae a maka.

¹¹Bea te mou gaohi ae keli i he vahaa oe ogo a maka ki he vai oe luo vai motua: ka oku heeki te mou vakai kiate ia aia nae gaohi ia, be fakaabaaba kiate ia aia nae fakatubu ia i mua aubito.

¹²Bea i he aho koia nae ui e he Eiki ko Jihova oe gaahi kau tau ke tagi, bea ke tagilāulāu, bea ke fafai ae ulu, bea ke vala aki ae tauagaa.

¹³Bea vakai nae i ai ae fiemalie moe fiefia, koe tamate‘i oe faga bulu, moe tamate‘i oe faga sibi, moe kai ae kakano, moe inu uaine: ke tau kai mo inu; he koe abogibogi te tau mate.

¹⁴Bea nae fakaha e Jihova oe gaahi kau tau ki hoku teliga, Koe mooni e ikai te mou maa i he hia ni kae oua ke mou mate, oku behe e he Eiki ko Jihova oe gaahi kau tau.

¹⁵Oku behe e he Eiki ko Jihova oe gaahi kau tau, Alu, ke ke hoko ki he tagata tauhi koloa ni, io kia Sebina, aia oku bule ki he fale, bea ke behe,

¹⁶Koeha oku ke ma‘u i heni? bea kohai oku ke ma‘u i heni? Koeuhi kuo ke ta moou i heni ha fonualoto, o hage koia oku ta moona ha fonualoto i he maoluga, bea oku togi ha nofoaga moona i he maka?

¹⁷Vakai, e ave koe e Jihova i he fakabobula fakamanavahe, bea koe mooni te ne taomia koe.

¹⁸Koe mooni te ne foki mai bea li malohi koe o hage ko ha mea fuobotoboto ki ha fonua lahi: bea te ke mate ai, bea e hoko i ai a hoo gaahi saliote lelei koe fakama oe fale o hoo eiki.

¹⁹Bea teu kabuji koe mei hoo botu, bea te ne toho hifo koe mei ho buleaga.

²⁰Bea e hoko o behe i he aho koia, teu ui eku tamaioeiki ko Iliakimi koe foha o Hesekaia:

²¹Bea teu fakakofu aki ia a ho kofu tōtōlōfa, bea teu fakamalohi aki ia ho noo, bea teu tuku hoo bule ki hono nima: bea te ne hoko koe tamai ki he kakai o Jelusalema, bea ki he fale o Juta.

²²Bea koe ki oe fale o Tevita teu ai ki hono uma; koia te ne too, bea e ikai tabuni e ha taha; bea te ne tabuni, bea e ikai too e ha taha.

²³Bea teu fakamau ia o hage ha fa‘o i ha botu oku mau; bea te ne hoko koe nofoaga lelei lahi ki he fale o ene tamai.

²⁴Bea te nau tautau iate ia ae lelei kotoabe oe fale o ene tamai, koe hako moe fānau, ae gaahi ibu jii kotoabe, mei he kihii ibu inu, o a‘u ki he gaahi ibu kehe kotoabe.

²⁵Oku behe e Jihova oe gaahi kau tau, i he abo koia e too ae fa‘o nae takamau ki he botu mau, bea e tuuji ki lalo, bea homo ia; bea koe kavega nae i ai e tuuji ke motu; he kuo folofola behe a Jihova.