KOE TOHI A ISAIA 23:1-18 TON1884 - Bible AI

¹1 Koe fakaauha mamahi o Taia. 17 Koe nau foki mamahi mai. KOE tala mamafa oku kau ki Taia. Tagi, akimoutolu ae gaahi vaka o Tasisi; he kuo liaki ia, koia oku ikai ai ha fale, be ha hu ki loto: oku fakaha ia kiate kinautolu mei he fonua ko Kitimi.

²Mou fakalogo be, akimoutolu ae kakai oe motu; akoe kuo fakama‘umea‘i e he kakai fakatau o Saitoni, akinautolu oku faa folau i he tahi.

³Ko ene koloa koe tubu oe tega i Sihoa i he vee vai lahi, moe ututa‘u mei he vaitafe; bea koe fakatauaga ia oe gaahi buleaga.

⁴Ke ma akoe, E Saitoni: he kuo lea ae tahi, io ae malohi oe tahi, o behe, Oku ikai teu laga, be fanau‘i ae fānau, bea oku ikai teu tauhi ha kau talavou, be akonaki‘i ha kau taahine.

⁵O hage koe ogoogo nae kau ki Ijibite, e behe e nau mamahi lahi i he ogoogo o Taia.

⁶Alu hake akimoutolu ki Tasisi; tagilāulāu, akimoutolu koe kakai oe motu.

⁷Ko hoo mou kolo fakafiefia aeni, aia nae tuu i he gaahi aho i mua? ko hono va‘e oona te ne ave ia ki he mamao ke aunofo ai.

⁸Kohai kuo ne tuutuuni ae mea ni ki Taia, koe kolo nae faa fakanofo ae gaahi bule, ko hono kakai fakatau koe houeiki, bea ko kinautolu oku fefakatau aki i ai koe kau ogoogo i mamani?

⁹Ko Jihova oe gaahi kau tau kuo ne tuutuuni ki ai, ke fakama ae laukau oe nāunāu kotoabe, bea ke fakamatavalea‘i ae kakai ogoogo kotoabe o mamani.

¹⁰E ofefine o Tasisi, ke ke alu i ho fonua o hage ha vaitafe kuo maumau‘i hono kauvai.

¹¹Naa ne mafao hono nima i he tahi, naa ne lulululu ae gaahi buleaga: kuo tuku mai e Jihova ha fekau oku kau ki he kolo fakatau, ke maumau‘i hono gaahi botu malohi.

¹²Bea naa ne behe, E ikai te ke toe fiefia, akoe koe taahine kuo taomia, ae ofefine o Saitoni: ke ke tuu hake, alu atu ki Kitimi; bea naa mo ia e ikai te ke ma‘u i ai ha mālōlō.

¹³Vakai ki he fonua oe kakai o Kalitia; nae ikai ko ha kakai akinautolu, ka i he ene toki laga‘i ia ma anautolu oku nofo i he toafa e he kakai o Asilia: ko kinautolu ia naa nau fokotuu hono gaahi fale leo, mo nau laga hake hono gaahi fale fakaeieiki; ka naa ne omi ia ki he fakaauha.

¹⁴Tagi, akimoutolu ae gaahi vaka o Tasisi: he kuo maumau‘i ho botu malohi.

¹⁵Bea e hoko o behe i he aho koia, e fakagalo a Taia i he ta‘u e fitugofulu, o hage koe gaahi aho o ha tu‘i e taha: bea hili ae ta‘u e fitugofulu e hiva a Taia o hage koe fefine agahala.

¹⁶Too ha haabe mo ke fealuaki i he kolo, akoe koe fefine agahala nae fakagalo hifo; ta ae mea ta ke ogo malie, hiva aki ae gaahi hiva lahi, koeuhi ke fakamanatu‘i koe.

¹⁷Bea e hoko o behe hili ae ta‘u e fitugofulu, e aahi a Jihova ki Taia, bea e foki ia ki he ene totogi, bea te ne fai hala moe gaahi buleaga kotoabe o mamani oku i he fuga oe kelekele.

¹⁸Ka ko ene koloa mo ia oku ne ma‘u e fakatabu‘i ma a Jihova: e ikai tanaki be fakamaoboobo ia; he ko ene koloa e anautolu ia oku nofo i he ao o Jihova, ke mahu ae kai, bea tologa ae kofu.