KOE TOHI A ISAIA 3:1-26 TON1884 - Bible AI

¹1 Koe maveuveu lahi oku hoko i he agahala. 9 Koe bauu ae kakai. 12 Koe fakamalohi moe manumanu ae kau bule. 16 Koe gaahi tautea e hoko koeuhi koe laukau ae kakai fefine. VAKAI, he koe Eiki ko Jihova oe gaahi kau tau, oku ne too atu mei Jelusalema bea mo Juta ae falalaaga moe tokoni, ae tokoni kotoabe oe mea kai, moe tokoni kotoabe oe vai,

²Koe tagata malohi, bea moe tagata tau, koe fakamāu, bea moe balofita, ae fakamakukaga, bea moe mātua,

³Koe eiki tau ae toko nimagofulu, bea moe tagata ogoogolelei, bea moe tagata akonaki boto, bea moe tagata boto i he faiva, bea moe tagata lea malie.

⁴Bea teu fakanofo ae tamaiki ko ho nau houeiki, bea e bule kiate kinautolu ae kau valevale.

⁵Bea e fefakamamahiaki ae kakai iate kinautolu. bea mo ho nau kaugaabi: e aga fielahi ae tamajii ki he motua, moe agakovi kiate ia oku ogoogolelei.

⁶Bea e buke e ha tagata a hono tokoua i he fale o ene tamai, o ne behe, Oku iate koe ae gaahi kofu, ke ke hoko ko ho mau bule, bea too e ho nima ae mau malaia ni:

⁷I he aho koia te ne fuakava, o behe, E ikai teu hoko koe fakamoui; he oku ikai ha ma be ha kofu i hoku fale: oua naa gaohi au koe bule oe kakai.

⁸He kuo malaia a Jelusalema, bea kuo higa mo Juta: he ko ho nau elelo moe nau faiaga oku kovi kia Jihova, ke fakahouhau‘i ae fofoga o ene afio.

⁹Koe aga o ho nau mata koe fakailoga onautolu; bea oku nau fakaha ae nau agahala o hage ko Sotoma, oku ikai te nau fufu ia. E malaia ho nau laumalie! he kuo nau fakahoko ae kovi kiate kinautolu.

¹⁰Mou behe ki he maonioni, e hoko be ae lelei: he te nau kai ae fua oe nau faiaga.

¹¹E malaia ae agahala! e hoko ae kovi kiate ia: he koe totogi o hono nima e age kiate ia.

¹²Ka ko hoku kakai, kuo fakamalohi‘i akinautolu e he tamaiki, bea oku bule‘i akinautolu e he kau fefine. E hoku kakai, oku fakahala‘i koe e hoo kau takimua, o nau fakakehe ae aluaga o ho gaahi hala.

¹³Oku tuu hake a Jihova ke folofola, oku tuu ia ke fakamāu ae kakai.

¹⁴E fakamāu e Jihova ae kau mātua o hono kakai, bea mo ho nau houeiki: he kuo mou kai o oji ae goue vaine; oku i ho mou fale ae koloa kuo faao mei he kakai majiva.

¹⁵Oku behe e Jihova koe Eiki oe gaahi kau tau, Koeha hono uhiga o hoo mou taomia a hoku kakai, o momoji ae mata oe majiva?

¹⁶Bea oku behe e Jihova, Koeuhi oku fielahi ae gaahi ofefine o Saione, mo nau aeva fakamofutofuta moe mata holi kovi, mo alu fakatekiteki be, mo fakabakihi ho nau va‘e:

¹⁷Koia e ta‘i e he Eiki ae tumuaki oe gaahi ofefine o Saione aki ae bala, bea e fakatelefua‘i akinautolu e Jihova.

¹⁸I he aho koia e too e Jihova iate kinautolu ae teuga tatagi o ho nau va‘e, moe mea fau oe ulu, moe nau teuga o hage koe mahina,

¹⁹Ae kahoa, bea moe gaahi vesa, bea moe gaahi bulou,

²⁰Ae gaahi tatā, bea moe teuga o ho nau va‘e, moe gaahi fua moe aiaga kakala, bea moe gaahi hau ki ho nau teliga,

²¹Ae gaahi mama, moe teuga oe ihu,

²²Moe tuului o ho nau kofu, bea moe kofu tua, bea moe gaahi bulubulu, bea moe gaahi kato baaga,

²³Ae gaahi jioata, bea moe kofu lineni, bea moe gaahi kofu oe ulu, bea moe gaahi bulou.

²⁴Bea e hoko o behe, e fetogi aki ae namu kakala ae namukū; bea e fetogi aki ae noo lelei ae noo mahae; bea e liliu ae ulu lau lelei koe tula; bea e fetogi ae kofu fatafata aki ae kofu oe tauagaa; bea e fetogi aki ae hoihoifua ae fohia i he laa.

²⁵E to ho kau tagata i he heleta, mo hoo kau malohi i he tau.

²⁶Bea e mamahi mo tagi hono gaahi mataba; bea i he ene lala te ne nofo i he kelekele.