KOE TOHI A ISAIA 53:1-12 TON1884 - Bible AI

¹I he lāuga ae balofita ki he tae tui, oku ne fakaha ae gaahi mamahi o Kalaisi bea mo hono mahuiga oia. KOHAI kuo ne tui ki he e mau ogoogo? bea kuo fakaha ki ahai ae nima o Jihova?

²He te ne tubu hake i hono ao o hage koe akau mategofua, bea hage koe aka mei he kelekele momoa: oku ikai ha jino lelei be ha toulekeleka iate ia, bea ka tau ka mamata kiate ia, oku ikai ha fakaofoofa ke tau manako ai kiate ia.

³Oku fehianekina ia bea liaki e he tagata; koe tagata oe gaahi mamahi, bea maheni ai moe loto mamahi: bea hage naa tau fufu ho tau mata meiate ia; kuo manuki ia, bea nae ikai te tau tokaga kiate ia.

⁴Koe mooni kuo ne too kiate ia ae tau gaahi vaivai, o ne fua e tau gaahi mamahi: ka naa tau mahalo kuo tautea mo ta‘i ia mei he Otua, bea mamahiia.

⁵Ka nae lavea ia koeuhi koe tau gaahi agahala, nae fakavolu ia koeuhi koe tau gaahi hia: nae iate ia ae tautea koeuhi ke tau fiemalie; bea i hono gaahi ta oku tau moui ai.

⁶Kuo tau he kotoabe o hage koe faga sibi; kuo tau afe taki taha kotoabe ki hono hala; bea kuo hilifaki kiate ia e Jihova ae hia atautolu kotoabe.

⁷Nae fakamalohia, bea nae mamahi ia, ka nae ikai te ne mafaa hono fofoga: oku tataki ia o hage koe lami ke tamate‘i, bea hage koe sibi oku noa i he ao oe tagata koji, bea nae ikai mafaa hono fofoga.

⁸Nae ave ia mei he fale fakabobula, bea mei he fakamāu: bea kohai te ne fakaha hono tubuaga? he nae tuuji ia mei he fonua oe moui: nae teia ia koeuhi koe agahala a hoku kakai.

⁹Bea nae tuutuuni hono tanuaga moe kakai agahala, bea fakataha moe ma‘umea i he ene bekia; koeuhi nae ikai te ne fai kovi, bea nae ikai ha kākā i hono fofoga.

¹⁰Ka nae finagalo a Jihova ke fakavolu ia; kuo ne tuku kiate ia ae mamahi: oka ke ka gaohi hono laumalie koe feilaulau koeuhi koe hia, te ne mamata ki hono hako, te ne fakatolotologa hono gaahi aho, bea koe finagalo o Jihova e monuia ia i hono nima.

¹¹He te ne vakai ki he fua oe mamahi lahi o hono laumalie, bea fiemalie ai ia: i he ilo kiate ia e fakatonuhia e he eku tamaioeiki maonioni ae toko lahi; he te ne fua e nau gaahi hia.

¹²Koia teu vahe‘i kiate ia ha inaji fakataha moe kakai ogoogo, bea te ne vahevahe ae koloa fakataha moe kakai malohi; koeuhi naa ne liligi hono laumalie ki he mate: bea nae lau ia fakataha moe kau agahala; bea naa ne fua ae hia oe toko lahi, bea ne hufokina ae kakai agahala.