KOE TOHI A ISIKIELI 11:1-25 TON1884 - Bible AI

¹1 Koe fielahi ae houeiki. 4 Koe nau agahala mo hono fakamāu‘i. 13 I he tagi a Isikieli oku fakaha e he Otua a ene fakamoui ha toega, 21 moe tautea oe kau agahala. 22 Oku mahui ae nāunāu oe Otua mei he kolo. 24 Oku toe ave a Isikieli ki he fakabobula. KOENI foki nae hiki hake au e he laumalie o ne omi au ki he mataba fakahahake oe fale o Jihova aia oku haga ki he feituu hahake: bea vakai, nae i he huaga oe mataba ae kau tagata e toko uofulu ma toko nima; bea naaku mamata oku i ai a Jesania koe foha o Asuli mo Beletaia koe foha o Benaia koe houeiki oe kakai.

²Bea ne toki behe kiate au, Foha oe tagata koe kau tagata ena oku fakatubu ae kovi, o nau fakakaukau kovi i he kolo ni:

³O nau behe, Oku ikai ofi ha mea: ka tau laga fale akitautolu: koe kulo ae kolo ni ka koe kakano akitautolu.

⁴Koia ke ke kikite kiate kinautolu, kikite, e foha oe tagata.

⁵Bea nae hoko mai kiate au ae Laumalie o Jihova o ne behe kiate au, Lea, oku behe e Jihova; Koeni, kuo mou lea behe e fale o Isileli: he oku ou ilo kotoabe ae gaahi mea oku hu mai ki ho mou loto.

⁶Kuo mou fakatokolahi hoo mou mate tamate‘i i he kolo ni bea kuo mou fakafonu aki ae mate tamate‘a a hono gaahi hala.

⁷Koia oku behe a Jihova koe Otua; Ko hoo mou mate aia kuo mou fokotuu i loto i ai, koe kakano akinautolu, bea koe kolo ni koe kulo ia: ka teu omi ki tua akimoutolu mei ai.

⁸Kuo mou manavahe ki he heleta; bea teu omi ae heleta kiate kimoutolu, oku behe e Jihova koe Otua.

⁹Bea teu omi ki tua akimoutolu mei he lotolotoga oia, mo tukuage akimoutolu ki he nima oe kau muli, bea teu fai ae fakamalaia kiate kimoutolu.

¹⁰Bea e tulaki hifo akimoutolu i he heleta; teu fakamāu akimoutolu i he gataaga o Isileli; bea te mou ilo ko au ko Jihova.

¹¹E ikai hoko eni ko hoo mou kulo, bea e ikai hoko akimoutolu koe kakano i loto i ai; ka teu fakamāu akimoutolu i he gataaga o Isileli:

¹²Bea te mou ilo ko Jihova au: he kuo ikai te mou aeva i he eku fekau, be fai ki he eku fakamāu, ka kuo mou fai ki he aga ae hiteni oku nofo takai iate kimoutolu.

¹³Bea nae hoko o behe, i he eku kikite, nae mate a Beletaia koe foha o Benaia. Bea naaku to hifo ai ki hoku mata o tagi i he le‘o lahi, o behe, Oiaue e Jihova koe Otua! te ke fakaoji ke oji aubito ae toega o Isileli?

¹⁴Nae toe hoko foki ae folofola a Jihova kiate au, o behe,

¹⁵Foha oe tagata, ko ho kaiga, io, ho kaiga oou, ae kau tagata o ho faahiga, bea moe fale katoa kotoa a Isileli, ko kinautolu ia kuo behe ki ai ae kakai o Jelusalema, Alu ke mamao akimoutolu mei a Jihova: he ko kimoutolu kuo foaki ki ai ae fonua ni koe tofia.

¹⁶Koia ke ke lea, Oku behe e Jihova koe Otua; ne ogo eku liaki ke mamao akinautolu ki he hiteni, bea ne ogo eku fakahe akinautolu ki he gaahi fonua, ka teu hage koe jii hufaga kiate kinautolu i he gaahi fonua aia te nau hoko ki ai.

¹⁷Koia ke ke behe, oku behe e Jihova koe Otua; Teu tanaki mooni akimoutolu mei he kakai bea fakataha mai kimoutolu mei he gaahi fonua aia kuo fakahe‘i akimoutolu ki ai, bea teu foaki kiate kimoutolu ae fonua o Isileli.

¹⁸Bea te nau hoko mai ki heni, bea te nau fetuku mei heni a hono gaahi mea kovi mo hono gaahi fakalielia.

¹⁹Bea teu foaki kiate kinautolu ae loto be taha, bea teu ai ha laumalie foou kiate kimoutolu; bea teu too atu ae loto maka mei ho nau kakano, bea teu foaki ae loto kakanoia kiate kinautolu:

²⁰Koeuhi ke nau faa eveeva ai i he eku gaahi fekau, bea tauhi a eku tuutuuni mo fai ki ai: bea e hoko ko hoku kakai akinautolu, bea ko ho nau Otua au.

²¹Ka koeuhi ko kinautolu oku muimui ho nau loto ki he loto oe nau gaahi mea fākalilia moe nau fakalielia, teu totogi e nau aga ki ho nau tumuaki, oku behe e Jihova koe Otua.

²²Bea hili ia nae hiki ki oluga e he jelubimi a ho nau kabakau bea moe gaahi teka nae ofi ai; bea nae feagai hifo mei oluga iate kinautolu ae nāunāu oe Otua o Isileli.

²³Bea nae mahui ae nāunāu o Jihova mei he loto kolo, bea tuu mei he mouga aia oku i he botu hahake oe kolo.

²⁴Bea hili ia nae too hake au e he laumalie, bea omi au e he Laumalie oe Otua i he mea ha mai ki Kalitia kiate kinautolu oe bobula. Bea nae behe ae mahui iate au ae mea ha mai aia naaku mamata ki ai.

²⁵Bea naaku toki fakamatala kiate kinautolu oe bobula ae gaahi mea kotoabe aia nae fakaha e Jihova kiate au.