KOE TOHI A ISIKIELI 40:1-49 TON1884 - Bible AI

¹1 Koe kuoga, mo hono aga, mo hono hokoaga oe mea ha mai. 6 Ae fakamatala ki he mataba ki hahake, 20 Ae mataba ki he tokelau. 24 Ae mataba ki he botu toga. 32 Ae mataba ki he hahake. 35 Ae mataba tokelau. 39 Ae balebale e valu. 44 Ae gaahi botu fale. 48 Moe fale hala oe fale. I HONO uofulu ma nima ta‘u oe mau bobula, i he kamataaga oe ta‘u, i hono hogofulu oe aho oe mahina, i hono hogofulu ma fa oe ta‘u, hili ae ta‘i oe kolo, i he aho be koia ne hilifaki ae nima o Jihova kiate au, o ne omi au ki heni.

²Ne omi au i he gaahi mea ha mai mei he Otua ki he fonua o Isileli, bea ne tuku au ki he fuga mouga maoluga aubito, bea nae i ai ae mea o hage koe kolo i hono feituu toga.

³Bea ne omi au ki ai, bea vakai, nae i ai ae tagata, aia nae tatau ene ha mai moe ha gigila ae balasa, nae i hono nima ae afo fua, moe kaho ke fua aki; bea naa ne tuu i he mataba.

⁴Bea nae behe e he tagata kiate au, Foha oe tagata, vakai aki ho mata, bea fanogo ho teliga, bea tokaga aubito ho loto ki he mea kotoabe teu fakaha kiate koe; he kuou omi koe ki heni, koeuhi keu fakaha ia kiate koe: bea ke ke fakaha ki he fale o Isileli ae mea kotoabe oku ke mamata ki ai.

⁵Bea vakai nae i ai ae a i he tua fale nae takatakai aki, bea nae i he nima oe tagata ae kaho ke fuofua aki, koe kiubite e ono a hono loloa i he kiubite oku fakalahi aki ae aofi nima katoa e taha: bea behe naa ne fua ae māukubu oe a, koe tatau moe kaho e taha; bea ko hono maoluga koe kaho e taha.

⁶Bea ne toki ha‘u ia ki he mataba aia oku hagatonu ki he botu hahake, bea ne alu hake i hono hala tuuga, bea ne fua ae atā oe mataba, koe kaho e taha hono laulahi; bea moe atā oe mataba kehe e taha, koe kaho e taha hono laulahi.

⁷Bea koe kihi‘i botu fale kotoabe nae taki taha ae kaho be taha hono loloa, moe kaho e taha a hono atā; bea koe vahaa oe gaahi botu fale jii koe kiubite e nima; bea koe huaga oe mataba i he vee fale hala oe mataba ki loto, koe kaho e taha.

⁸Naa ne fua foki ae fale hala oe mataba ki loto, koe kaho ia e taha.

⁹Naa ne fua foki ae fale hala oe mataba, koe kiubite e valu; bea ko hono bou oia, koe kiubite e ua; bea nae tuu ki loto ae fale hala oe mataba.

¹⁰Bea koe gaahi kihi‘i botu fale oe mataba fakahahake koe tolu i he botu mai ki heni, bea tolu ki he botu ko ena; bea nae fuofua tatau ae tolu koia: bea nae tatau ae fua oe bou i he botu ko eni, moe botu ko ena.

¹¹Bea naa ne fua hono atā oe mataba, koe kiubite e hogofulu; bea mo hono loloa oe mataba, koe kiubite e hogofulu ma tolu.

¹²Koe gataaga o hono atā ki mua i he gaahi fale jii, koe kiubite e taha i he botu mai ki heni, moe kiubite e taha hono atā ki hena: bea koe gaahi kihi‘i fale koe kiubite e ono i hono botu ki heni, bea ono hono kiubite i hono botu ki hena.

¹³Hili ia naa ne fuofua ae mataba mei he tua fale oe fale jii e taha ki he taha kehe: bea ko hono laulahi mei he mataba e taha ki he mataba e taha, koe kiubite e uofulu ma nima.

¹⁴Naa ne fua foki ae otu bou koe kiubite e tolugofulu, io, o a‘u ki he bou oku takatakai ae huaga oe mataba.

¹⁵Bea ko hono fua mei he mata fale mei he huaga oe mataba o a‘u ki he mata fale oe fale hala i he mataba ki loto, koe kiubite e nimagofulu ia.

¹⁶Bea nae i ai ae gaahi katuba fajii ki he gaahi kihi‘i fale, bea i hono gaahi bou nae tuu takatakai i he mataba ki loto, bea ki hono gaahi bou afeafefua, bea nae takatakai ia i he gaahi mataba i loto fale: bea nae togi ae fakatātā ki he akau koe boga i hono gaahi bou.

¹⁷Bea ne toki ave au ki he lotoa ki tua, bea vakai nae i ai ae gaahi botu fale, bea nae faliki aki ae maka ae lotoa o takatakai hake ai: bea nae tuu ki he botu nae faliki ae gaahi botu fale e tolugofulu.

¹⁸Bea koe faliki i he vee mataba aia nae feagai moe botu fakaloloa oe gaahi mataba, koe faliki ia ki lalo.

¹⁹Hili ia naa ne fuofua a hono vaatā mei he botu ki tua oe mataba ki lalo o a‘u ki he botu ki tua oe lotoa ki loto, koe kiubite e teau ia, ki he botu hahake bea moe tokelau.

²⁰Bea naa ne fuofua ae loloa moe laulahi oe mataba oe lotoa ki tua, aia nae hagatonu ki he feituu tokelau.

²¹Bea ko hono gaahi kihi‘i fale oona nae tolu i hono botu ko eni, bea tolu i hono botu ko ena; bea ko hono gaahi bou mo hono bou afeafefua nae fua o tatau moe uluaki mataba: koe kiubite e nimagofulu a hono loloa, bea ko hono māukubu, koe kiubite e uofulu ma nima.

²²Bea ko hono gaahi katuba, mo ho nau bou afeafefua, bea moe fakatātā ki he akau koe boga, nae tatau be ia moe fua oe mataba oku haga ki he botu hahake; bea naa nau alu hake ai koe lakaaga e fitu, bea nae i hono botu ki ao a hono gaahi bou afeafefua.

²³Bea nae fehagaaki ae mataba oe lotoa ki loto, moe mataba ki he tokelau, bea mo ia nae haga ki hahake: bea naa ne fua mei he mataba ki he mataba, koe kiubite e teau.

²⁴Hili ia naa ne omi au ki he botu ki toga, bea vakai nae i ai ae mataba nae haga atu ki he feituu toga: bea naa ne fuofua hono gaahi bou, mo hono bou afeafefua o hage be koia ne fua ki ai.

²⁵Bea nae i ai ae gaahi katuba moe bou afeafefua nae tuu takatakai i ai, o hage koe gaahi mataba koe: ko hono loloa koe kiubite e nimagofulu, bea koe kiubite e uofulu ma nima a hono laulahi.

²⁶Bea nae ai ae hala tuuga koe lakaaga e fitu ke alu hake ki ai, bea nae hagatonu mai ki ai ae gaahi bou afeafefua: bea nae i ai ae fakatātā ki he akau koe boga, i hono botu ki heni, mo hono botu ki hena, i hono gaahi bou.

²⁷Bea nae ai ae mataba i he lotoa ki loto, bea nae haga ia ki he feituu toga: bea naa ne fua mei he mataba e taha ki he mataba e taha ki he feituu toga, koe kiubite e teau.

²⁸Bea naa ne omi au ki he lotoa ki loto, i he vee mataba ki he botu toga: bea naa ne fuofua ae mataba ki toga o tatau moe gaahi fua koia;

²⁹Bea ko hono gaahi kihi‘i fale oia, bea mo hono gaahi bou, bea mo hono gaahi bou afeafefua, nae fakatatau ki he gaahi fua ni; bea nae i ai ae gaahi katuba, bea i he gaahi bou afeafefua, aia nae tuu takatakai ai: ko hono loloa koe kiubite e nimagofulu, bea koe kiubite e uofulu ma nima a hono māukubu.

³⁰Bea ko hono gaahi bou afeafefua nae takai hake ai, ko hono loloa koe kiubite e uofulu ma nima, bea ko hono māukubu koe kiubite e nima.

³¹Bea nae haga hono gaahi bou afeafefua ki he lotoa ki tua; bea nae ai ae gaahi fakatātā ki he akau koe boga i hono gaahi bou: bea nae lakaaga valu ae hala tuuga nae alu hake ki ai.

³²Bea naa ne omi au ki he lotoa ki loto ki he botu fakahahake: bea naa ne fuofua ae mataba o fakatatau ki he gaahi fua ni.

³³Bea ko hono gaahi kihi‘i fale, mo hono gaahi bou, mo hono gaahi bou afeafefua, nae fakatatau ki he gaahi fua ni: bea nae i ai ae gaahi katuba, bea moe gaahi bou afeafefua nae tuu takatakai i ai: ko hono loloa koe kiubite e nimagofulu, bea ko hono māukubu koe kiubite e uofulu ma nima.

³⁴Bea nae haga atu hono gaahi bou afeafefua ki he lotoa ki tua; bea nae ai ae fakatātā ki he akau koe boga i hono gaahi bou, i hono botu ki heni, mo hono botu ki hena: bea nae lakaaga valu ae hala tuuga nae alu hake ki ai.

³⁵Bea naa ne omi au ki he mataba ki he botu tokelau, bea ne fuofua ia o fakatatau ki he gaahi fua ni;

³⁶A hono gaahi kihi‘i fale o ia, mo hono bou, mo hono bou afeafefua, moe gaahi katuba nae takatakai ai: ko hono loloa koe kiubite e nimagofulu, bea koe kiubite e uofulu ma nima a hono māukubu.

³⁷Bea nae haga hono gaahi bou ki he lotoa ki tua: bea nae i hono gaahi bou ae fakatātā ki he akau koe boga i hono botu ko eni, bea mo hono botu ko ena; bea nae lakaaga valu ae hala tuuga nae alu hake ki ai.

³⁸Bea ko hono gaahi botu fale, mo hono gaahi mataba, nae vaofi ia moe bou oe gaahi mataba, aia nae fufulu ai ae gaahi feilaulau tutu.

³⁹Bea i he fale hala oe mataba nae ai ae balebale e ua i hono botu e taha, moe balebale e ua i hono botu e taha, ke tamatei‘i ai ae feilaulau tutu, moe feilaulau ae agahala, bea moe feilaulau ae fai hala.

⁴⁰Bea i hono botu ki tua, i he botu oku alu ai ha taha ki he huaga oe mataba ki he tokelau, nae i ai ae balebale e ua; bea i he botu e taha i he fale hala oe mataba, nae ai moe balebale e ua.

⁴¹Koe balebale nae fa i he botu e taha, moe balebale e fa i he botu e taha i he vee mataba: koe balebale e valu aia nae fai ai ae tamate‘i oe gaahi feilaulau.

⁴²Bea koe balebale e fa ki he feilaulau tutu koe gaahi maka ia nae ta, ko hono loloa koe kiubite e taha moe vaeua malie, bea ko hono māukubu koe kiubite e taha moe vaeua malie, bea koe kiubite e taha a hono maoluga: he nae hili foki ki ai ae gaahi mea aia nae tamate‘i aki ae feilaulau tutu moe gaahi feilaulau kehe.

⁴³Bea nae ai hono taba fakatali koe aofinima katoa hono laulahi nae fakamau takatakai ki ai; bea nae hili ki he gaahi balebale ae kano mate oe feilaulau.

⁴⁴Bea nae i he tua mataba ki loto ae gaahi botu fale oe kau faji hiva i he lotoa ki loto, aia nae i he vee mataba fakatokelau: bea nae haga ia ki he botu toga: bea koe taha i he vee mataba fakahahake nae haga ki he tokelau.

⁴⁵Bea naa ne behe mai kiate au, Koe botu fale ni aia oku haga ki he toga oku oe kau taulaeiki oku tauhi ki he nāunāu oe fale.

⁴⁶Bea koe botu fale aia oku haga ki he tokelau oku oe kau taulaeiki oku tauhi ki he mea ae feilaulauaga: akinautolu koe gaahi foha o Satoki i he gaahi foha o Livai, akinautolu oku unuunu mai kia Jihova ke tauhi kiate ia.

⁴⁷Koia ne ne fua ai ae lotoa, ko hono loloa koe kiubite e teau, bea koe kiubite e teau a hono māukubu, ke botubotu malie; bea nae tuu ae feilaulauaga ki mua i he fale.

⁴⁸Bea naa ne omi au ki he fale hala oe fale, o ne fua ae bou kotoabe oe fale hala, koe kiubite e nima i hono botu ko eni, bea koe kiubite e nima i he botu ko ena: bea ko hono laulahi oe mataba i hono botu nae haga mai koe kiubite e tolu, bea koe kiubite e tolu ki tua.

⁴⁹Ko hono loloa oe fale hala koe kiubite e uofulu, bea ko hono laulahi koe kiubite e hogofulu ma taha; bea nae i ai ae hala tuuga ke alu hake ai; bea nae i ai ae ogo bou oe fale hala koe taha i heni bea taha i hena.