KOE TOHI A JELEMAIA 28:1-17 TON1884 - Bible AI

¹1 Koe kikite loi a Hanania ki he toe omi ae gaahi ibu mo Jekonia. 5 Koe fakaamu a Jelemaia ke mooni ia, bea ne fakaha oku ilo ae balofita mooni i he hoko a ene lea. 10 Oku maumau‘i e Hanania ae haamoga a Jelemaia. 12 Koe kikite a Jelemaia ki he haamoga ukamea, moe kikite ki he mate a Hanania. BEA nae hoko o behe i he ta‘u be koia, i he kāmataga oe bule a Setikia koe tu‘i o Juta, i hono fa oe ta‘u, bea i hono nima mahina, ko Hanania koe foha o Asuli koe balofita, aia nae i Kibione, nae lea kiate au i he fale o Jihova, i he ao oe kau taulaeiki, bea moe kakai kotoabe, o behe,

²Nae behe mai e Jihova oe gaahi kau tau, koe Otua o Isileli, Kuou maumau‘i ae haamoga ae tu‘i o Babilone.

³I he teeki ai oji ae ta‘u e ua teu toe omi ki he botu ni ae gaahi ibu kotoabe oe fale o Jihova, aia nae fetuku e Nebukanesa koe tu‘i o Babilone mei he botu ni, bea ave ia ki Babilone:

⁴Oku behe e Jihova, Bea teu toe omi ki he botu ni a Jekonia, koe foha o Jihoiakimi koe tu‘i o Juta, moe kau bobula kotoabe o Juta, aia nae alu ki Babilone; he teu maumau‘i ae haamoga ae tu‘i o Babilone.

⁵Bea nae toki behe e he balofita ko Jelemaia, ki he balofita ko Hanania, i he ao oe kau taulaeiki, bea i he ao oe kakai kotoabe nae tutuu i he fale o Jihova,

⁶Io, nae behe e he balofita ko Jelemaia, Emeni: ke fai behe e Jihova: ke fakamooni e Jihova ki he gaahi lea kuo ke kikite aki, ke toe omi ae gaahi ibu ki he fale o Jihova, bea moe kau bobula kotoabe, mei Babilone ki he botu ni.

⁷Ka te ke fanogo eni ki he lea ni teu lea aki i ho teliga, bea ki he teliga oe kakai kotoabe;

⁸Koe kau balofita nae muomua iate au bea nae mua iate koe i mua, naa nau kikite foki ki he gaahi kakai lahi, bea ki he gaahi buleaga lahi, ki he tau, moe kovi, bea moe mahaki fakaauha.

⁹Koe balofita oku kikite ki he melino, oka fakamooni o hoko ae lea ae balofita, e toki ilo ai ae balofita, aia nae fekau mooni e Jihova.

¹⁰Bea nae toki too e Hanania koe balofita ae haamoga mei he kia oe balofita ko Jelemaia, bea maumau‘i ia.

¹¹Bea lea a Hanania i he ao oe kakai kotoabe, o behe, Oku behe mai e Jihova; E behe eku maumau‘i ae haamoga o Nebukanesa koe tu‘i o Babilone mei he kia oe kakai kotoabe i he teeki ai oji kotoa ae ta‘u e ua. Bea nae alu atu ae balofita ko Jelemaia.

¹²Bea hili hono maumau‘i e he balofita ko Hanania ae haamoga mei he kia oe balofita ko Jelemaia, nae toki hoko mai ae folofola a Jihova ki he balofita ko Jelemaia, o behe,

¹³Alu o tala kia Hanania, o behe, Oku behe mai a Jihova; Kuo ke maumau‘i ae gaahi haamoga akau; ka te ke gaohi maa nautolu ae gaahi haamoga ukamea.

¹⁴He oku behe mai a Jihova oe gaahi kau tau, koe Otua o Isileli; Kuou ai ae haamoga ukamea ki he kia oe kakai kotoabe, koeuhi ke nau tauhi kia Nebukanesa koe tu‘i o Babilone; bea te nau tauhi kiate ia: bea kuou foaki foki kiate ia ae gaahi manu oe goue.

¹⁵Bea nae toki behe e he balofita ko Jelemaia ki he balofita ko Hanania, Fanogo mai, Hanania; Nae ikai fekau koe e Jihova; ka kuo ke gaohi ae kakai ni ke nau falala ki he loi.

¹⁶Koia oku behe mai a Jihova; Vakai, teu li koe mei he fuga oe fonua: te ke mate i he ta‘u ni, koeuhi kuo ke ako aki ae agatuu kia Jihova.

¹⁷Bea nae mate a Hanania koe balofita i he ta‘u koia i hono fitu mahina.