KOE TOHI A JELEMAIA 33:1-26 TON1884 - Bible AI

¹1 Oku talaofa e he Otua e liliu lelei mai ae kau bobula. 10 Koe nau lelei. 12 Koe tuumau ae buleaga. 15 Ko Kalaisi koe vaa maonioni. 17 E mau be ae buleaga moe gaue fakataulaeiki. 28 Bea e tuu mau be ae hako monuia. NAE hoko foki ae folofola a Jihova kia Jelemaia, ko hono liuga ua, i he ene kei nofo i he lotoa oe fale fakabobula, o behe,

²Oku behe e Jihova, aia nae fakatubu ia, ko Jihova aia nae gaohi ia, ke fokotuu mau ia; ko Jihova hono huafa;

³Ui kiate au, bea teu talia koe, bea teu fakaha kiate koe ae gaahi mea lahi, moe gaahi mea fufu, aia nae ikai te ke ilo‘i.

⁴He oku behe e Jihova, koe Otua o Isileli, ki he gaahi fale oe kolo ni, bea ki he gaahi fale oe gaahi tu‘i o Juta, aia kuo li ki lalo i he gaahi buke maoluga, bea moe heleta;

⁵Naa nau ha‘u ke tau moe kau Kalitia, ka koe mea ke fakabito aki akinautolu ae agaaga oe kakai, akinautolu kuou tamate‘i i he eku tubutamaki mo hoku houhau, mo kinautolu kotoabe kuou fakafufu ai hoku fofoga mei he kolo ni koeuhi koe nau agahala.

⁶Vakai, teu omi kiate ia ae moui, bea moe faitoo aoga, bea teu fakamoui akinautolu, bea teu fakaha kiate kinautolu ae fiemalie moe mooni lahi.

⁷Bea teu liliu ae bobula o Juta, moe bobula o Isileli, bea teu laga akinautolu, o hage koia i mua.

⁸Bea teu fakamaa akinautolu mei he e nau gaahi hia kotoabe, aia kuo nau agahala aki kiate au; bea teu fakamolemole e nau gaahi hia kotoabe, aia kuo nau agahala aki, mo fai kovi ai kiate au.

⁹Bea e iate au ia koe higoa oe fiefia, bea koe ogoogolelei moe nāunāu i he ao oe kakai kotoabe o mamani, akinautolu e fanogo ki he lelei kotoabe aia teu fai kiate kinautolu: bea te nau manavahe mo tetetete koeuhi koe lelei kotoabe bea moe monuia aia teu omi kiate kinautolu.

¹⁰Oku behe e Jihova: E toe ogo‘i i he botu ni, aia oku mou behe e lala ia bea tae ha tagata be ha manu, io, i he gaahi kolo o Juta, bea moe gaahi hala o Jelusalema, aia oku lala o tae ha tagata, bea tae ha kakai, be ha manu,

¹¹E i ai ae le‘o oe fiefia, bea moe le‘o oe nekeneka, koe le‘o oe tagata taane, bea moe le‘o oe taahine, bea moe le‘o okinautolu oku behe, Fakafetai kia Jihova oe gaahi kau tau: he oku agalelei a Jihova; oku tologa o taegata ene aloofa: bea mo kinautolu oku omi ae feilaulau oe fakafetai ki he fale o Jihova. He teu bule ke liliu mai ae bobula oe fonua, o hage koia i he kāmataga, oku behe e Jihova.

¹²Oku behe e Jihova oe gaahi kau tau: Koe botu eni aia oku lala, bea oku ikai i ai ha tagata be ha manu, bea ko hono gaahi kolo kotoabe, e toe hoko ia koe nofoaga oe kau tauhi sibi bea te nau tauhi i ai ae faga sibi.

¹³Bea i he gaahi kolo i he gaahi mouga, bea i he gaahi kolo i he gaahi botu tokalelei, bea i he gaahi kolo i he feituu toga, bea i he fonua o Benijimani, bea i he gaahi botu oku ofi ki Jelusalema, bea i he gaahi kolo o Juta, e toe alu ae faga sibi i he lalo nima oia oku ne lau akinautolu, Oku behe e Jihova.

¹⁴Oka behe e Jihova, Vakai, oku ha‘u ae gaahi aho, teu fakahoko ai ae mea lelei aia naaku tala ki he fale o Isileli, bea moe fale o Juta.

¹⁵I he gaahi aho koia, bea moe kuoga koia, teu fakatubu kia Tevita ae Vaa oe maonioni; bea te ne fai ae fakamāu moe agatonu i he fonua.

¹⁶E fakamoui a Juta i he gaahi aho koia, bea e nofo fiemalie a Jelusalema: bea koe huafa eni e ui aki ia, Ko Jihova ko ho tau maonioni.

¹⁷He oku behe e Jihova; E ikai aubito majiva a Tevita i he tagata ke nofo i he nofoaga fakaeieiki oe fale o Isileli;

¹⁸Bea e ikai majiva ae kau taulaeiki koe kau Livai i ha tagata i hoku ao ke atu ae feilaulau tutu, bea ke tutu ae feilaulau kai, bea ke fai ae feilaulau mau ai be.

¹⁹Bea nae hoko ae folofola a Jihova kia Jelemaia, o behe,

²⁰Oku behe e Jihova; Kabau te mou faa maumau‘i eku fuakava ki he aho, bea mo eku fuakava ki he bo, koeuhi ke oua naa hoko fakaholoholo ae aho moe bo;

²¹Bea ta e toki maumau‘i foki eku fuakava mo Tevita ko eku tamaioeiki, koeuhi ke oua naa ma‘u eia ae foha ke bule i hono buleaga; bea moe kau Livai koe kau taulaeiki, oku nau tauhi kiate au.

²²O hage oku ikai faa lau ae gaahi fetuu oe lagi, bea oku ikai faa fuofua ae oneone i he matātahi: Teu fakatubu behe ae hako o Tevita ko eku tamaioeiki, bea moe kau Livai oku tauhi kiate au.

²³Bea nae toe hoko foki ae folofola a Jihova kia Jelemaia, o behe,

²⁴Ikai te ke tokaga ki he lea kuo lea aki e he kakai ni, o behe, Koe faahiga e ua aia nae fili e Jihova, kuo ne liaki akinautolu, bea kuo nau manuki ki hoku kakai, o hage e ikai te nau toe hoko koe buleaga i ho nau ao.

²⁵Oku behe e Jihova, Kabau oku ikai i he eku fuakava ae aho moe bo, bea kabau oku ikai teu tuutuuni ae gaahi fono oe lagi mo mamani;

²⁶Bea ta teu toki liaki ae hako o Jekobe, bea mo Tevita ko eku tamaioeiki, bea e ikai teu fili ha niihi i hono hako ke bule ki he hako o Ebalahame, mo Aisake, bea mo Jekobe: he teu bule ke liliu e nau bobula, bea teu aloofa kiate kinautolu.