KOE TOHI A JOBE 6:1-30 TON1884 - Bible AI

¹1 Oku fakaha e Jobe oku ai hono uhiga o ene mamahi. 8 Oku ne holi ki he mate i he ene ilo te ne ma‘u ai ae fiemalie. 14 Oku ne valoki‘i a hone gaahi kaiga i he e nau tae ofa. KA nae leaage a Jobe, o ne behe,

²Taumaiā kuo fakatatau totonu a eku mamahi, bea ke ai katoa eku mamahi ki he mea fakatatau!

³He koeni, e mamafa lahi ia ki he oneone oe tahi: koia kuo fogia hifo ai eku gaahi lea.

⁴He oku i loto iate au ae gaahi gahau oe Mafimafi, ko hono kona oia oku ne inumia hoku laumalie: oku tuu tali tau be kiate au ae gaahi fakailifia ae Otua.

⁵He oku tagi ae asi kai vao oka ma‘u eia ae mohuku? be oku tagi ae bulu i he ene kai?

⁶E faa kai ae mea ifoifonoa tae ha masima? be oku ai ha ifo i he niuniu oe foi manu?

⁷Koe gaahi mea nae fehia hoku laumalie ke ala ki ai ko eku mea kai mamahi ia.

⁸Taumaiā keu lava‘i eku kole; bea tuku mai e he Otua ae mea oku ou holi ki ai!

⁹Io, ke lelei ki he Otua ke tamate‘i au; ke ne tukuage hono nima, o motuhi au!

¹⁰Behe teu toki ma‘u ai ae fiemalie; io, teu tali malohi au ki he mamahi: ke oua naa ne mamae; he nae ikai teu fufu ae gaahi folofola ae Toko Taha Maonioni.

¹¹He koeha hoku malohi, koeuhi keu amanaki e au; bea koeha hoku gataaga, koeuhi keu fakatologa ai be eku moui?

¹²He koe malohi oe gaahi maka a hoku malohi? be koe balasa a hoku kakano?

¹³Ikai oku iate au haku tokoni? bea kuo kabuji aubito ae boto iate au?

¹⁴Oka mamahi ha taha oku gali ke ofa kiate ia a hono kaiga; ka oku ne liaki eia ae manavahe ki he Mafimafi.

¹⁵Kuo fai kākā a hoku kaiga o hage ko ha vaitafe, bea hage koe oho oe vai oku nau mole atu;

¹⁶He oku uliuli ia koeuhi koe aisi, aia oku lilo i ai ae uha hinehina:

¹⁷Oka mamafana ia, oku nau mole: bea oka aafu, oku auha leva ia mei hono botu.

¹⁸Koe gaahi hala o ho nau tafeaga kuo fakakehe; oku fakaaau o ikai, bea mole.

¹⁹Nae kumi lahi e he kakai o Tima, koe kau fonoga o Siba naa nau tatali ki ai.

²⁰Naa nau bubutuu koeuhi naa nau amanaki; naa nau ha‘u ki ai, bea ma.

²¹He koe mea noabe foki akimoutolu; oku mou mamata ki hoku li ki lalo, bea oku mou ilifia.

²²He neu behe, Tokoni mai? be, Foaki mai ha mea mei hoo mou koloa?

²³Be, Fakamoui au mei he nima oe fili? be, Huhui au mei he nima oe malohi?

²⁴Akonaki‘i au, bea teu logobe: bea mou fai keu ilo be kuou hē i he ha.

²⁵Hono ikai malohi ae gaahi lea totonu! ka oku valoki‘i aeha e hoo mou valoki?

²⁶He oku mou behe ke valoki‘i ae gaahi lea, moe gaahi tala o ha taha kuo tuutamaki, oku hage ha matagi?

²⁷Io, oku mou lemohekina ae tamai mate, bea mou keli ha luo ki ho mou kaiga.

²⁸Koia, mou fiemalie, o vakai kiate au; he oku ilogofua kiate kimoutolu o kabau oku ou kākā.

²⁹Oku ou kole, mou toe fakakaukau ke oua naa behe koe agahala; io, toe foki mai, he oku: ai eku maonioni.

³⁰He oku ai ha agahala i hoku elelo? ikai e faa ilo e hoku gutu ae gaahi mea kovi?