KOE TOHI A NEHEMAIA 9:1-38 TON1884 - Bible AI

¹1 Koe aukai, moe fakatomala ae kakai. 4 Oku talaloto fakalotu e he kau Livai, ki he agalelei ae Otua, moe agakovi anautolu. BEA koeni i hono uofulu ma fa oe aho oe mahina ni nae katoa fakataha ae fānau a Isileli i he aukai, moe gaahi kofu tauagaa nae bani aki ae efu.

²Bea nae fakamavae akinautolu e he hako o Isileli mei he kakai muli kotoabe, o nau tuu o vete e nau gaahi agahala, moe hia ae nau gaahi tamai.

³Bea naa nau tuu hake i ho nau botu, bea lau i he tohi oe fono a Jihova ko ho nau Otua, i hono vahe fa e taha oe aho; bea i hono vahe e taha naa nau vete, bea hu kia Jihova ko ho nau Otua.

⁴Bea nae tuu hake ki he tuuga ae kau Livai, ko Jesua, mo Bani, mo Katimieli, mo Sebania, mo Buni, mo Selebea, mo Bani, mo Kinani, o nau tagi aki ae le‘o lahi kia Jihova ko ho nau Otua.

⁵Bea behe ai e he kau Livai, ko Jesua, mo Katimieli, mo Bani, mo Hasabenia, mo Selebea, mo Hotija, mo Sebania, mo Bitaia, Tuu ki oluga bea fakafetai kia Jihova ko ho mou Otua ke taegata, bea taegata: bea fakafetai ki ho huafa oku nāunāuia, aia kuo fakahikihiki he maoluga lahi i he gaahi fakafetai kotoabe moe fakaogo lelei.

⁶Ko koe, io ko koe be, ko Jihova toko taha be: naa ke fakatubu ae lagi, koe lagi oe gaahi lagi, mo ho nau gaahi toko lahi kotoabe, ae fonua moe gaahi mea kotoabe oku i ai, koe gaahi tahi, moia kotoabe oku i ai, bea oku ke fakatologa akinautolu kotoabe; bea oku hu kiate koe ae gaahi toko lahi oe lagi.

⁷Ko koe ko Jihova koe Otua, naa ke fili a Ebalame, mo ke omi ia kituaa mei Ua oe kakai Kalitia, bea naa ke fakahigoa ia ko Ebalahame;

⁸Bea naa ke ilo hono loto nae agatonu i ho ao, mo ke fai ae fuakava mo ia ke foaki ae fonua oe kakai Kenani, moe kakai Heti, moe kakai Amoli, moe kakai Belesi, moe kakai Jebusi, moe kakai Keakasa, oku ou behe ke foaki ia ki hono hako, bea kuo ke fakahoko a hoo gaahi folofola: he oku ke maonioni:

⁹Naa ke mamata ki he gaahi mamahi oe mau gaahi tamai i Ijibite, mo ke ogo‘i e nau tagi i he Tahi Kulokula;

¹⁰Bea naa ke fakaha ae gaahi fakailoga moe gaahi mana kia Felo, bea ki he ene kau tamaioeiki kotoabe, bea ki he kakai kotoabe o hono fonua: he naa ke ilo‘i e nau fai fakafiefielahi kiate kinautolu. Koia naa ke ma‘u ai ae huafa moou, o hage koia he aho ni.

¹¹Bea naa ke vaeua ae tahi i ho nau ao, koia naa nau alu ai i he kelekele momoa i he loto tahi: bea naa ke li ho nau kau fakataga ki he loloto, o hage ha maka ki he gaahi tahi malohi.

¹²Bea naa ke taki akinautolu i he aho aki ae bou ao; bea i he bouli aki ae bou afi ke tuku ha māma kiate kinautolu i he hala oku totonu ke nau alu ai.

¹³Bea naa ke alu hifo foki ki he mouga ko Sainai, mo ke folofola kiate kinautolu mei he lagi, mo ke foaki kiate kinautolu, ae gaahi fakamāu totonu, moe gaahi fono mooni, ae gaahi tuutuuni lelei moe gaahi fekau:

¹⁴Mo ke fakailo kiate kinautolu ho aho tabu maonioni, mo ke fekau kiate kinautolu ae gaahi fekau, moe tuutuuni, moe gaahi fono, i he nima o Mosese ko hoo tamaioeiki;

¹⁵Mo ke foaki kiate kinautolu ae ma mei he lagi i he e nau fiekai, mo ke fakatubu ae vai mei he maka i he e nau fieinu, mo ke fakailo kiate kinautolu ke nau alu o hoko o ma‘u ae fonua aia naa ke fuakava ke foaki kiate kinautolu.

¹⁶Ka nae fai fakafiefielahi ekinautolu, moe mau gaahi tamai, o fakafefeka ho nau kia, bea nae ikai tokaga ki hoo gaahi fekau,

¹⁷Bea naa nau talagataa, bea nae ikai tokaga ki hoo gaahi mana aia naa ke fai i ho nau haohaoga; ka naa nau fakafefeka ho nau kia, bea i he e nau agatuu naa nau tuutuuni ha nau eiki ke nau foki ki he e nau nofo bobula; ka koe Otua koe oku ke tali teu ke fakamolemole, oku ke agalelei mo agaofa, oku tuai ho houhau, bea oku ke agalelei lahi bea nae ikai te ke liaki akinautolu.

¹⁸Io, hili e nau gaohi ma anautolu ae uhiki bulu koula nae haka, o nau behe, Ko ho Otua eni aia nae omi koe mei Ijibite, o nau fai ae gaahi ahiahi kovi lahi:

¹⁹Ka ko koe i hoo gaahi agaofa lahi nae ikai te ke liaki akinautolu i he toafa: nae ikai hiki meiate kinautolu ae bou oe ao i he aho, ke tataki akinautolu i he hala: be koe bou afi i he bo, ke fakaha ae māma kiate kinautolu, moe hala aia oku totonu ke nau alu ai.

²⁰Bea naa ke foaki foki a ho laumalie lelei ke akonaki‘i akinautolu, bea nae ikai te ke taofi hoo mana mei ho nau gutu, bea naa ke foaki ae vai kiate kinautolu i he e nau fie inu.

²¹Io, naa ke tokoni akinautolu i he toafa, i he ta‘u e fagofulu, koia nae ikai te nau majiva i ha mea e taha; nae ikai fakaaau o motua ho nau gaahi kofu, bea nae ikai fufula ho nau va‘e.

²²Bea naa ke foaki foki kiate kinautolu ae gaahi buleaga, moe kakai, mo ke vahe‘i akinautolu ki he gaahi vahega fonua: koia naa nau ma‘u ai ae fonua o Sihoni, moe fonua oe tu‘i o Hesiboni, moe fonua o Oki koe tu‘i o Besani.

²³Bea naa ke fakatokolahi e nau fānau o hage koe gaahi fetuu oe lagi, bea naa ke omi akinautolu ki he fonua, aia naa ke fakailo ki he e nau gaahi tamai, aia ke nau alu ki ai o ma‘u.

²⁴Koia nae alu ki ai ae fānau o nau ma‘u ae fonua, bea naa ke fakavaivai ae kakai oe fonua, koe kakai Kenani, i ho nau ao, mo ke foaki akinautolu ki ho nau nima, mo ho nau gaahi tu‘i, moe kakai oe fonua, koeuhi ke nau fai e nau faiteliha ki ai.

²⁵Bea naa nau kabaji ae gaahi kolo malohi, moe fonua mahu, o nau ma‘u ae gaahi fale nae fonu i he gaahi mea kotoabe, moe gaahi vaikeli, moe gaahi goue vaine, moe goue olive, moe gaahi akau fua lahi aubito: koia naa nau kai, bea makona, bea hoko o jino, o nau fakafiemalie‘i akinautolu i hoo agalelei lahi.

²⁶Ka koe mooni naa nau fai talagataa, bea agatuu kiate koe, bea liaki hoo fono ki ho nau tua, o nau tamate‘i hoo kau balofita nae valoki akinautolu ke nau tafoki kiate koe, mo nau fai ae gaahi ahiahi kovi lahi.

²⁷Koia naa ke tukuage ai akinautolu ki he nima o ho nau gaahi fili, aia naa nau fakamamahi‘i akinautolu: bea i he kuoga oe nau mamahi, i he e nau tagi kiate koe, naa ke ogo‘i akinautolu mei lagi; bea naa ke foaki kiate kinautolu, o tāu mo hoo gaahi agaofa, ae gaahi fakamoui, aia naa nau moui ai mei he nima o ho nau gaahi fili.

²⁸Kae hili e nau ma‘u ae fiemalie, naa nau toe fai kovi i ho ao: koia naa ke tuku ai akinautolu ki he nima o ho nau gaahi fili, bea naa nau hoko ai o bule kiate kinautolu: ka i he e nau tafoki, o tagi kiate koe, naa ke ogo‘i akinautolu mei lagi; bea nae liuga lahi hoo fakamoui akinautolu o tāu mo hoo gaahi agaofa;

²⁹Bea naa ke takitala‘i akinautolu, koeuhi ke ke toe omi akinautolu ki hoo fono: ka naa nau fai fakafiefielahi, bea ikai tokaga ki hoo gaahi fekau, ka naa nau fai agahala ki hoo gaahi fakamāu, (aia kabau e fai ia e ha tagata, e moui ai ia:) o nau kalofaki ho nau uma, bea fakakekeva ho nau kia, bea nae ikai tokaga.

³⁰Ka naa ke kataki‘i akinautolu i he gaahi ta‘u lahi, bea naa ke fakailo kiate kinautolu e nau kovi, i ho laumalie i hoo kau balofita: ka nae ikai te nau tokaga: koia naa ke fakatukutuku‘i akinautolu ki he nima oe kakai oe gaahi fonua.

³¹Ka koeuhi ko hoo agaofa lahi nae ikai te ke fakaauha aubito akinautolu, be liaki akinautolu; he koe Otua agalelei mo agaofa koe.

³²Bea koeni, E ho mau Otua, koe Otua lahi, mo malohi, mo fakamanavahe, akoe oku ke tauhi ae fuakava moe agaofa, oua naa hage ia ko ha mea jii kiate koe, ae gaahi mamahi kotoabe aia kuo hoko kiate kimautolu, bea ki ho mau gaahi tu‘i, ki ho mau houeiki, bea ki ho mau kau taulaeiki, bea ki ho mau kau balofita, bea ki he e mau gaahi tamai, bea ki he kakai kotoabe, talu ae kuoga oe gaahi tu‘i o Asilia o a‘u ki he aho ni.

³³Ka koe mooni oku ke tonuhia koe i he mea kotoabe kuo fakahoko kiate kimautolu: he kuo ke fai totonu koe, ka nae fai agakovi akimautolu:

³⁴Bea nae ikai tauhi hoo fono e ho mau gaahi tu‘i, mo ho mau gaahi houeiki, mo ho mau kau taulaeiki, be koe mau gaahi tamai, be tokaga ki hoo gaahi fekau, mo hoo gaahi tuutuuni, aia naa ke valoki aki kiate kinautolu.

³⁵He nae ikai te nau tauhi koe i ho nau buleaga, bea i he gaahi agalelei aia naa ke foaki kiate kinautolu, bea i he fonua lahi mo mahu aia naa ke foaki kiate kinautolu, bea nae ikai te nau tafoki mei he e nau gaahi gaue agakovi.

³⁶Vakai, koe kau tamaioeiki akimautolu he aho ni, bea koe fonua aia naa ke foaki ki he e mau gaahi tamai ke nau kai hono fua o ia mo hono lelei, vakai koe kau tamaioeiki akimautolu i ai:

³⁷Bea oku tubu mei ai ae mea lahi ma ae gaahi tu‘i aia kuo ke fakanofo ke bule kiate kimautolu koe mea i he e mau gaahi agahala: bea oku nau bule ki ho mau jino foki, bea ki he e mau faga manu, o nau faiteliha, bea ko kimautolu oku mau moua i he mamahi lahi.

³⁸Bea koeuhi koe mea ni kotoabe oku mau fai ae fuakava ke mau, mo tohi ia: bea ko ho mau gaahi houeiki, moe kau Livai, moe kau taulaeiki, te nau ai a hono fakailoga mau.