KOE TOHI A TANIELA 12:1-13 TON1884 - Bible AI

¹1 E fakahaofi e Maikale a Isileli mei he e nau mamahi. 5 Oku fakaha kia Taniela ae gaahi kuoga. BEA i he kuoga koia e tuu hake a Maikale, ae Eiki lahi, aia oku tokoni ki he fānau a hoo kakai: bea e hoko ha kuoga oe mamahi, aia nae ikai aubito hano tatau talu moe i ai ha buleaga, o a‘u ki he buleaga koia: bea e fakahaofi hoo kakai i he kuoga koia, aia kotoabe e ilo‘i kuo tohi i he toni.

²Bea e a ae toko lahi okinautolu oku mohe i he efu o mamani, koe niihi ki he moui taegata, moe niihi ki he ma moe manuki taegata.

³Bea ko kinautolu oku boto e gigila o hage koe ulo oe lagi; bea ko kinautolu oku fakatafoki‘i ae toko lahi ki he maonioni, o hage koe gaahi fetuu, o taegata bea taegata.

⁴Ka ko koe, e Taniela, ke ke tabuni ae gaahi lea mo fakamau ae tohi, o a‘u ki he kuoga oe gataaga: e fealuaki fano be ae toko lahi, bea e tubu ae boto.

⁵Bea ko au Taniela neu jio, bea vakai, nae tutuu mai ae toko ua kehe, koe toko taha i he kauvai e taha oe vaitafe, bea moe toko taha i he kauvai e taha oe vaitafe.

⁶Bea nae behe e he toko taha ki he tagata nae kofu aki ae tubenu lelei, aia nae i he fukahi vai oe vaitafe, E fefe hono fuoloa bea hoko ae gataaga oe gaahi mea fakaofo ni?

⁷Bea neu fanogo ki he tagata nae kofu aki ae tubenu lelei, aia nae i he fukahi vai oe vaitafe, i he ene hiki hake hono nima toomatau, mo hono toohema ki he lagi, bea ne fuakava iate ia oku moui o taegata, E fai ia i ha kuoga moe gaahi kuoga, moe vaeuamalieaga; bea i he ene lava‘i ke movete ae malohi oe kakai maonioni, e toki fakaoji ae gaahi mea ni kotoabe.

⁸Bea neu fanogo, ka nae ikai teu ilo: bea neu behe, E hoku Eiki, koeha hono gataaga oe gaahi mea ni?

⁹Bea naa ne behe mai, Ke ke alu koe Taniela: he kuo tabuni mo fakamau ae gaahi lea, o a‘u ki he kuoga oe gataaga.

¹⁰E i ai ae toko lahi e fakamaa, mo fakahinehina, mo ahiahi‘i; ka e fai hala ae kau agahala: bea e ikai ha niihi i he kau agahala e ilo; ka e ilo e he kau boto.

¹¹Bea mei he kuoga koia, e ave ai ae feilaulau aho, moe fokotuu ae fakalielia, aia oku fakaulia, e ai ae gaahi aho e taha afe ma uageau moe hivagofulu.

¹²Oku monuia ia oku tatali, bea hoko ki he gaahi aho e taha afe ma tolugeau, ma tolugofulu ma nima.

¹³Ka ke alu be koe i ho hala ka e oua ke hoko ae gataaga: he te ke mālōlō bea te ke tuu i ho lakaga i he gataaga oe gaahi aho.