KOE TOHI A TANIELA 9:1-27 TON1884 - Bible AI

¹1 Oku fakakaukau a Taniela ki he kuoga oe bobula. 3 Oku ne vete ae gaahi agahala. 16 Oku ne kole ke toe lelei a Jelusalema. 20 Oku fakaha e Kebeleli kiate ia ae uike e fitugofulu. I HE uluaki ta‘u o Talaiasi koe foha o Ahasivelo koe hako oe kau Mitia, aia nae fakanofo koe tu‘i ki he buleaga oe kau Kalitia;

²I he uluaki ta‘u o ene bule, ko au Taniela naaku ilo mei he gaahi tohi, hono lau oe gaahi ta‘u aia nae hoko ai ae folofola a Jihova kia Jelemaia, koe balofita, koeuhi i he behe, E fakakakato ae ta‘u e fitugofulu moe fakalala o Jelusalema.

³Bea neu haga hoku mata kia Jihova koe Otua, ke kumi i he lotu moe gaahi kole moe aukai moe ai ae tauagaa moe efuefu.

⁴Bea neu lotu kia Jihova, ko hoku Otua, bea neu fai eku vete, bea neu behe, E Jihova, koe Otua lahi mo fakamanavaheia, oku iate ia ae fuakava moe aloofa ma anautolu oku ofa kiate ia, bea kiate kinautolu oku ma‘u ene gaahi fekau:

⁵Kuo mau agahala, bea kuo mau fai agahala mo fai kovi, bea kuo mau talagataa, io i he e mau he mei hoo gaahi fekau bea mo hoo gaahi fakamāu:

⁶Bea nae ikai te mau fanogo ki hoo kau tamaioeiki ae kau balofita, akinautolu nae lea i ho huafa ki ho mau gaahi tu‘i, mo ho mau houeiki moe mau gaahi tamai, bea moe kakai kotoabe oe fonua.

⁷E Eiki oku aau ae maonioni, ka oku amautolu ae ma oe mata, o hage koe aho ni; ki he kau tagata o Juta, bea ki he kakai o Jelusalema, bea ki Isileli kotoabe oku ofi mo mamao atu i he gaahi fonua kotoabe aia kuo ke kabuji akinautolu ki ai, koeuhi koe agahala kuo nau fai agahala ai kiate koe.

⁸E Eiki oku amautolu ae ma oe mata, a ho mau gaahi tu‘i, mo ho mau houeiki, bea moe mau gaahi tamai, koeuhi kuo mau fai agahala kiate koe.

⁹Oku ia Jihova ko ho mau Otua ae gaahi aloofa moe fakamolemole, ka naa mau agatuu kiate ia;

¹⁰Bea nae ikai te mau talagofua ki he le‘o o Jihova ko ho nau Otua, ke alu i hono gaahi fono aia naa ne fokotuu i ho mau ao, i he ene kau tamaioeiki koe kau balofita.

¹¹Io, kuo maumau e Isileli kotoabe hoo fono, i he e nau tafoki, ke oua naa nau talagofua ki ho le‘o; koia, kuo liligi ai ae malaia kiate kimautolu, bea moe fuakava aia oku tohi i he fono a Mosese, koe tamaioeiki ae Otua, koeuhi kuo mau fai agahala kiate ia.

¹²Bea kuo ne fakamooni ki he ene gaahi folofola, aia naa ne folofola kiate kimautolu, bea mo ho mau kau fakamāu, aia nae fakamāu‘i akimautolu, i he ene omi kiate kimautolu ae kovi lahi: he nae ikai ha fai i he lalo lagi kotoabe o hage koia kuo fai ki Jelusalema.

¹³O hage koia nae tohi i he fono a Mosese, kuo hoko ae kovi ni kotoabe kiate kimautolu: ka nae ikai ke fai e mau lotu i he ao o Jihova ko ho mau Otua, koeuhi ke mau tafoki mei he e mau gaahi hia, bea ilo hoo mooni.

¹⁴Koia kuo leohi a Jihova ki he kovi, bea kuo ne fakahoko ia kiate kimautolu: he oku maonioni a Jihova ko ho mau Otua, i he ene gaue kotoabe aia oku ne fai: he nae ikai te mau talagofua ki hono le‘o.

¹⁵Bea koeni, E Eiki ko ho mau Otua, akoe naa ke omi a hoo kakai mei he fonua ko Ijibite aki ae nima malohi, bea kuo ke ma‘u kiate koe ae ogoogo, o hage i he aho ni; kuo mau agahala, kuo mau fai kovi.

¹⁶E Jihova oku ou kole kiate koe, o fakatatau mo hoo maonioni kotoabe, ke fakaafe‘i ho houhau mo ho tubutamaki lahi mei hoo kolo ko Jelusalema, ko ho mouga tabu: he koeuhi koe mau gaahi hia, bea moe hia ae mau gaahi tamai, kuo hoko a Jelusalema, mo hoo kakai, koe manukiaga kiate kinautolu kotoabe, oku nofo takatakai kiate kimautolu.

¹⁷Bea koeni, e ho mau Otua, fanogo ki he hu a hoo tamaioeiki, mo ene gaahi kole, bea tuku ke ulo mai ho fofoga ki ho fale tabu, aia oku lala, koeuhi ko koe be, e Eiki.

¹⁸E hoku Otua, fakatokaga‘i ho fofoga, bea fanogo, ke ke fofoga a, bea afio‘i ho mau tuutamaki, bea moe kolo oku ui aki ho huafa: he oku ikai te mau atu e mau gaahi kole ki ho ao, koeuhi koe mau maonioni, ka koeuhi ko hoo gaahi aloofa lahi.

¹⁹E Eiki, fanogo, E Eiki, fakamolemole; E Eiki, tokaga, mo fai; oua naa fakatuai, koeuhi be ko koe, e hoku Otua; he ko hoo kolo, mo hoo kakai oku ui aki ho huafa.

²⁰Bea lolotoga eku kei lea, mo lotu, mo fakaha eku hia, moe hia a hoku kakai ko Isileli, mo eku kei atu eku kole i he ao o Jihova ko hoku Otua, koeuhi koe mouga tabu o hoku Otua;

²¹Io, i he lolotoga eku kei lea i he lotu, nae fekau ke buna vave mai ae tagata, io ko Kebeleli, aia naaku mamata i he mea ha mai i hono kamataaga, bea nae ha‘u ia o ala kiate au, i he feituulaa oe feilaulau efiafi.

²²Bea ne fakaha mai, bea naa ma talanoa mo au, o ne behe, E Taniela, kuou toki ha‘u koeuhi ke tuku kiate koe ae boto moe ilo.

²³I he kamata fai a hoo gaahi kole nae hoko mai ae fekau, bea kuou ha‘u ke fakaha kiate koe; he koe ofeina lahi koe: koia ke ke ilo ae mea, bea ke fakakaukau ki he mea ha mai.

²⁴Kuo kotofa bau ae uike e fitugofulu ki hoo kakai, mo hoo kolo tabu, ke fakaoji ae agahala, mo fakagata ae gaahi hia, bea ke fai ae fakalelei koeuhi koe agahia, bea ke fakahoko mai ae maonioni taegata, bea ke fakamāu ke ma‘u ae mea ha mai moe kikite, bea ke fakanofo ae Fugani Maonioni.

²⁵Koia ke ke boto bea ke ilo, mei he fakaha oe fekau ke fakafoou mo laga a Jelusalema, o a‘u ki he Misaia koe Eiki, koe uike e fitu ia, moe uike e onogofulu ma ua: e toe laga ae nala moe a maka, io i he kuoga oe maveuveu.

²⁶Bea hili ae uike e onogofulu ma ua e motuhi ae Misaia, ka e ikai koeuhi koia: bea koe kakai oe eiki e ha‘u, te nau fakaauha ae kolo moe botu tabu; bea ko hono gata oia e hoko o hage koe melemo, bea kuo bau be ke fai i ai ae gaahi kovi, o a‘u ki he gataaga oe ta‘u.

²⁷Bea e fakamooni eia ae fuakava moe toko lahi i he uike e taha: bea i he lotolotoga oe uike e fakagata eia hono fai ae feilaulau, moe feilaulau tutu; bea oka kabui ia e he mea fakalielia oe fakaauha, e fai aia kuo tuutuuni o a‘u ki he gataaga, bea e liligi atu ia ki he fakaauha.