LOMA 3:1-31 TON1884 - Bible AI

¹1 Koe lelei oe kakai Jiu: 3 aia oku ikai mole iate kinautolu: 9 ka oku valoki tonu akinautolu e he fono i he agahala: 20 koia oku ikai ha toko taha oku fakatonuhia‘i e he fono, 21 ka oku fakatonuhia‘i kotoabe i he tui be: 31 ka oku ikai taeaoga ae fono. BEA ka kuo behe, bea koeha ae lelei lahi oku i he Jiu? be koeha hono aoga oe kamu?

²Oku lahi i he mea kotoabe: kae lahi taha be koeuhi koe tuku kiate kinautolu ae gaahi folofola ae Otua.

³Ka koeha, o kabau nae ai ha niihi nae ikai tui? e fakataeaoga e he e nau taetui ae mooni ae Otua?

⁴E ikai aubito: io, ke mooni ae Otua, kae loi ae tagata kotoabe; o hage koia kuo tohi, Koeuhi ke ke tonuhia i hoo gaahi tala, bea koeuhi ke ke maonioni oka ke ka fakamāu.

⁵Bea kabau oku ha ae maonioni ae Otua i he e tau taemaonioni, te tau behe koeha? Oku taeagatonu ae Otua i he ene houhau? (Oku ou lea o hage koe tagata.)

⁶Ikai aubito: he ka ne behe e fefe hono fakamāu e he Otua a mamani?

⁷He kabau kuo tubulekina o lahi ae mooni ae Otua, ke ogoogo lelei ia i he eku loi; bea koeha oku kei fakamāu ai au koe agahala?

⁸Bea koeha oku ikai ai ke behe mu‘a, (o hage ko hono lohiaki‘i akimautolu, bea hage ko hono fakababau ia e he niihi oku mau lea o behe) , Ke tau fai kovi, kae tubu ai ha lelei? ko ho nau fakamalaia koe mea totonu.

⁹Bea fefe ai? oku lelei lahi hake akitautolu? Oku ikai aubito: he kuo oji e mau fakamooni oku fakatou moulaloa kotoabe ki he agahala, ae kakai Jiu moe kakai Jenitaile;

¹⁰O hage koia kuo tohi, Oku ikai ha toko taha oku maonioni, oku ikai aubito ha taha:

¹¹Oku ikai ha taha oku ne ilo‘i, oku ikai ha taha oku kumi ki he Otua.

¹²Kuo nau he kotoabe, kuo nau hoko o taeaoga kotoabe; oku ikai ha toko taha oku fai lelei, oku ikai aubito ha taha,

¹³Ko ho nau kia koe fonualoto kuo matagaki; kuo nau fai fakakākā aki ho nau elelo; koe mea kona oe gata fekai oku i lalo i ho nau lougutu:

¹⁴Oku bito ho nau gutu i he kabe-kabe moe lea fakamahu:

¹⁵Ko ho nau va‘e oku vave ke liligi toto:

¹⁶Oku i ho nau gaahi hala ae fakaauha moe malaia:

¹⁷Bea koe hala oe melino oku ikai te nau ilo‘i:

¹⁸Bea oku ikai ha manavahe ki he Otua i ho nau ao.

¹⁹Koeni, oku tau ilo koia kotoabe oku fakaha i he fono, oku fakaha ia kiate kinautolu oku moulaloa ki he fono: koeuhi ke mabuni ae gutu kotoabe, kae nofo a mamani kotoabe kuo halaia i he ao oe Otua.

²⁰Koia e ikai fakatonuhia‘i ha toko taha i hono ao e he gaahi gaue oe fono: he oku mei he fono ae ilo‘i oe agahala.

²¹Ka koeni, oku fakaha ae fakatonuhia‘i e he Otua i he tae kau ae fono, bea oku fakamooni ia e he fono moe kau balofita;

²²Io, ae fakatonuhia‘i e he Otua aia oku i he tui kia Jisu Kalaisi kiate kinautolu kotoabe bea iate kinautolu kotoabe oku tui: he oku ikai ha fai kehekehe:

²³He kuo fai agahala kotoabe, bea tomui i he fakamalo mei he Otua.

²⁴Bea oku fakatonuhia‘i koe ofa mataataatā be i he ene aloofa, koeuhi koe totogi huhui aia oku ia Kalaisi Jisu:

²⁵Aia kuo fakaha atu e he Otua koe feilaulau fakalelei ia, i he tui ki hono taataa, koeuhi ke fakaha ene maonioni i he fakamolemole oe agahala kuo fai, koe mea i he faa kataki ae Otua;

²⁶Ke fakaha i he kuoga ni a ene maonioni: koeuhi ke agatonu be ia, ka koe fakatonuhia ia o ia oku tui kia Jisu.

²⁷Bea ka kuo behe, bea kofaa ae bole? Kuo kabuji ia. E he fono fe? oe gaahi gaue? Ikai aubito: ka e he fono oe tui.

²⁸Koia oku mau tuku bau eni, oku fakatonuhia‘i ae tagata e he tui, o tae kau ai ae gaahi gaue ae fono.

²⁹Koe Otua ia oe kakai Jiu be? bea ikai oe kakai Jenitaile foki? Io, oe kakai Jenitaile foki:

³⁰He koe Otua be taha, aia oku ne fakatonuhia‘i ae kamu e he tui, moe taekamu i he tui.

³¹Bea oku tau fakataeaoga‘i koa ae fono i he tui? E ikai aubito: ka oku mau fakatuu mau ae fono.