MAAKE 9:1-50 TON1884 - Bible AI

¹1 Koe fakakehe a Jisu. 11 Oku ne akonekina ene kau akoga ki he ha‘u a Ilaija: 14 o ne kabuji ae laumalie noa mo tuli: 30 oku ne tomua fakaha ene bekia moe toetuu: 33 oku ako eia ke agavaivai ene kau akoga: 38 oku ne fekau ke oua te nau taofi ki ha niihi oku ikai agatuu kiate kinautolu, be fakatukia ha niihi oe agatonu. BEA behe eia kiate kinautolu, Koe mooni oku ou tala atu kiate kimoutolu, Oku ai ae niihi iate kinautolu oku tutuu i heni, e ikai te nau kamata ae mate, kae oua ke nau mamata ki he buleaga oe Otua oku hoko mai moe malohi.

²Bea hili ae aho e ono, bea ave e Jisu a Bita, mo Jemesi, mo Jone, ko kinautolu be, o ne tataki akinautolu ki he mouga maoluga: bea nae liliu ia i ho nau ao.

³Bea fetabatabaki hono kofu, o matuaki hinehina o hage koe uha hinehina: bea e ikai ha tufuga fo tubenu i mamani e faa fakahinehina ke behe.

⁴Bea ha ai kiate kinautolu a Ilaija mo Mosese; bea nau alea mo Jisu.

⁵Bea lea a Bita, o behe kia Jisu, Eiki, oku lelei e tau i heni: bea tuku ke mau gaohi ha fale e tolu: ke oou ae taha, bea taha o Mosese, bea taha o Ilaija.

⁶He nae ikai te ne ilo be koeha oku ne lea aki; he naa nau ilifia lahi.

⁷Bea nae fakamalu aki akinautolu ae ao: bea ogo mai mei he ao ae le‘o o behe, Ko hoku Alo ofaaga eni: fanogo kiate ia.

⁸Bea fakafokifa be, kuo nau fejio-jiofaki, bea ikai ke nau toe ilo ha taha, ka ko Jisu be mo kinautolu.

⁹Bea i he e nau alu hifo mei he mouga, naa ne fekau kiate kinautolu ke oua naa nau fakaha ki ha taha ae gaahi mea kuo nau mamata ki ai, kae oua ke toe tuu ae Foha oe tagata mei he bekia.

¹⁰Bea naa nau ma‘u kiate kinautolu ae lea koia, o nau fefehuiaki iate kinautolu, be koeha hono uhiga oe toe tuu mei he bekia.

¹¹Bea naa nau fehui kiate ia, o behe, Koeha oku behe ai e he kau tagata tohi, e tomua ha‘u a Ilaija?

¹²Bea leaage eia, o behe kiate kinautolu, Koe mooni oku tomua ha‘u a Ilaija, o fakatonutonu ae mea kotoabe; bea hage koia kuo tohi ki he Foha oe tagata, e kataki foki eia ae mea lahi, bea manukia ia.

¹³Ka oku ou behe kiate kimoutolu, Kuo ha‘u mooni a Ilaija, o hage koia kuo tohi, bea kuo nau fai kiate ia e nau faiteliha.

¹⁴Bea kuo ha‘u ia ki he kau akoga, bea ne mamata ki he fuu kakai oku kabui akinautolu, moe kau tagata tohi oku kikihi mo kinautolu.

¹⁵Bea kuo mamata leva ae kakai fulibe kiate ia, bea nau ofo lahi, o nau felele’i mo fetaba kiate ia.

¹⁶Bea fehui eia ki he kau tagata tohi, Koeha oku mou fakakikihi ai mo kinautolu?

¹⁷Bea lea ae toko taha i he kakai, o beheage kiate ia, Eiki, kuou omi kiate koe hoku foha, oku iate ia ae laumalie noa:

¹⁸Bea koe botu kotoabe oku ne buke ai ia, oku ne haaki ia; bea koa ia, mo fegaiitaki hono nifo, bea oku ne fakaaau o vaivai: bea neu lea ki hoo kau akoga ke nau kabuji ia; ka nae ikai te nau faa fai.

¹⁹Bea lea ia, o beheage kiate ia, Ae toutagata taetui! e fefe hono fuoloa oe tau nonofo? e fefe hono fuoloa o eku kataki akimoutolu? Omi ia kiate au.

²⁰Bea nau omi ia kiate ia; bea kuo mamata ia ki ai, bea haaki leva ia e he laumalie; bea to ia ki he kelekele, mo mokofiji bea koa hono gutu.

²¹Bea fehui ia ki he ene tamai, Kuo fefe hono fuoloa talu ene hoko eni kiate ia? bea behe eia, Talu ene tamajii.

²²Bea kuo liuga lahi ae li ia ki he afi, bea moe vai, ke tamatei‘i ia: bea kabau te ke faa fai ha mea, ke ke aloofa kiate kimautolu, o tokoni akimautolu.

²³Bea beheage e Jisu kiate ia, Kabau oku ke faa tui, oku faa fai ae gaahi mea kotoabe kiate ia oku tui.

²⁴Bea tagi loimata leva ae tamai ae tamajii, o ne behe, Eiki, oku ou tui ke ke tokoni‘i au telia eku taetui.

²⁵Bea i he mamata a Jisu oku felele‘i mai ae kakai o fakataha, bea ne tautea ae laumalie uli, o ne behe kiate ia, Akoe, koe laumalie noa mo tuli, oku ou fekau kiate koe, ha‘u kitua iate ia, bea oua naa ke toe hu ki ai.

²⁶Bea tagi ae laumalie, o ne haaki ia o lahi, bea ha‘u kitua: bea nae tatau ae tagata mo ha taha mate; koia ne behe ai e he toko lahi, Kuo mate ia.

²⁷Ka nae buke ia e Jisu i hono nima, o fokotuu ia; bea ne tuu hake.

²⁸Bea kuo hu ia ki fale, bea fehui fakafufu ene kau akoga kiate ia, Koeha nae ikai ai te mau faa kabuji ia?

²⁹Bea behe eia kiate kinautolu, Oku ikai ha‘u kitua ae faahiga ni i ha mea, kae i he lotu moe aukai.

³⁰Bea naa nau alu mei ai, o nav alu i Kaleli; bea nae ikai loto ia ke ilo ia e ha taha.

³¹He nae akonaki‘i eia a ene kau akoga, o ne behe kiate kinautolu, E tukuage ae Foha oe tagata ki he nima oe kakai, bea te nau fakabogi ia; bea hili hono fakabogi, e toe tuu ia i hono aho tolu.

³²Ka nae ikai te nau ilo ae lea koia, bea naa nau manavahe ke fehui kiate ia.

³³Bea ha‘u ia ki Kabaneume: bea fehui kiate kinautolu i he ene nofo i he fale, Koeha ia naa mou fakakikihi ai akimoutolu i he hala?

³⁴Ka naa nau fakalogobe: he naa nau fakakikihi i he hala, be kohai e lahi hake.

³⁵Bea nofo hifo ia, o ne ui ae toko hogofulu ma toko ua, o behe eia kiate kinautolu, Kabau oku holi ha tagata ke muomua, e ki mui ia iate kimoutolu kotoabe, moe tamaioeiki a moutolu kotoabe.

³⁶Bea too eia ha tamajii jii o ne tuku ia ki ho nau haohaoga: bea kuo fua hake ia i hono nima, bea behe eia kiate kinautolu.

³⁷Ko ia ia te ne ma‘u ha tamajii behe i hoku higoa, oku ne ma‘u au: bea ko ia ia te ne ma‘u au, oku ikai ko au be oku ne ma‘u, ka ko ia ne ne fekau au.

³⁸Bea leaage a Jone, o behe kiate ia, Eiki, naa mau mamata ki he toko taha oku kabuji ae kau tevolo i ho huafa, ka oku ikai ke muimui ia kiate kitautolu: bea naa mau taofi kiate ia, koeuhi oku ikai muimui kiate kitautolu.

³⁹Ka nae behe e Jisu, Oua naa taofi ia: he oku ikai ha taha te ne fai ha mea mana i hoku huafa, e faa lea kovi noa be kiate au.

⁴⁰He ko ia oku ikai agatuu kiate kitautolu, oku kau taha ia mo kitautolu.

⁴¹He ko ia e atu kiate kimoutolu ha vai ke inu i hoku huafa, koeuhi oku a Kalaisi akimoutolu, oku ou tala mooni atu kiate kimoutolu, e ikai mole iate ia hono totogi.

⁴²Bea ko ia ia e fakahala‘i ha toko taha iate kinautolu ni oku jii oku tui kiate au, e lelei hake kiate ia o ka ne taubuga‘i aki ia ae maka momoji i hono kia, bea li ia ki he moana.

⁴³Bea kabau e fakahala‘i koe e ho nima, tutuu ia: oku lelei kiate koe ke ke hu ki he moui oku ke nima mutu, i hoo ma‘u ae nima e ua, kae alu ki heli, ki he afi e ikai aubito faa tamate‘i;

⁴⁴Aia oku ikai mate ai ho nau uaga, bea ikai faa tamate‘i ae afi.

⁴⁵Bea kabau e fakahala‘i koe e ho va‘e, tutuu ia: oku lelei kiate koe ke ke hu ki he moui oku ke ketu, i hoo ma‘u ae va‘e e ua, kae li koe ki heli, ki he afi e ikai aubito faa tamate‘i;

⁴⁶Aia oku ikai mate ai ho nau uaga, bea ikai faa tamate‘i ae afi.

⁴⁷Bea kabau e fakahala‘i koe e ho mata, kabe‘i ia: oku lelei kiate koe ke ke hu ki he buleaga oe Otua moe mata be taha, i hoo ma‘u ae mata e ua, kae li koe ki he afi o heli;

⁴⁸Aia oku ikai mate ai ho nau uaga, bea ikai faa tamate‘i ae afi.

⁴⁹He koeuhi e fakamasima taki taha kotoabe aki ae afi, bea e fakamasima aki ae feilaulau kotoabe ae masima.

⁵⁰Oku lelei ae masima: bea kabau kuo mole i he masima hono kona, te mou toe fakakona fefe‘i ia? Ma‘u be ae masima kiate kimoutolu, bea mou melino be akimoutolu.