NOMIBA 18:1-32 TON1884 - Bible AI

¹Koe tauhi ae kau taulaeiki moe kau Livai. 9 Koe inaji oe kau taulaeiki. 21 Koe inaji oe kau Livai. 25 Ke ma‘u e he kau taulaeiki ae feilaulau hiki hake mei he inaji oe kau Livai. BEA nae behe e Jihova kia Elone, Ko koe mo ho gaahi foha moe fale o hoo gaahi tamai te mou fua ae hia oe fale tabu: bea ko koe mo ho gaahi foha te mou fua ae hia a hoo mou gaue fakataulaeiki.

²Bea te mou omi fakataha foki mo koe ho kaiga i he faahiga o Livai, koe faahiga o hoo tamai, koeuhi te mou feagai mo koe, o gaue kiate koe: ka ko koe mo ho gaahi foha te mou fakataha o gaue i he mata fale fehikitaki oe fakamooni.

³Bea te nau tokaga ki hoo gaue, moe tauhi kotoabe oe fale fehikitaki: kae oua te nau ha‘u ke ofi ki he gaahi ibu oe fale tabu moe feilaulauaga, telia naa nau mate ai, mo kimoutolu foki.

⁴Bea te nau fakataha akinautolu kiate koe, o tokaga ki he tauhi oe fale fehikitaki oe kakai, ki he gaue kotoabe oe fale fehikitaki: bea e ikai ha‘u ha muli ke ofi kiate kimoutolu.

⁵Bea te mou tokaga ki he tauhi oe fale tabu, moe tauhi oe feilaulauaga: koeuhi ke oua naa toe hoko ae houhau ki he fānau a Isileli.

⁶Bea ko au, vakai, kuou omi ho mou kaiga oe kau Livai mei he fānau a Isileli: oku foaki akinautolu o hage koe mea foaki kiate kimoutolu ma a Jihova, ke fai ae gaue oe fale fehikitaki oe kakai.

⁷Bea koia, ko koe mo ho gaahi foha te mou tokaga ki hoo mou gaue fakataulaeiki ki he mea kotoabe oe feilaulauaga, moe loto buibui; bea te mou tauhi: kuou foaki kiate kimoutolu hoo mou gaue fakataulaeiki o hage koe mea foaki: bea koe muli e ha‘u o ofi e tamate‘i ia.

⁸Bea nae folofola a Jihova kia Elone, o behe, Kuou foaki foki kiate koe ae tauhi o eku feilaulau hiki hake i he gaahi mea tabu kotoabe ae fānau a Isileli; kuou foaki ia kiate koe koeuhi koe fakanofo, bea ki ho gaahi foha, i he talatuku o lauikuoga.

⁹Ko hoo mea eni i he gaahi mea tobutabu, kuo hao i he afi: koe nau feilaulau kotoabe, koe nau feilaulau meakai kotoabe, koe nau feilaulau kotoabe mo ae agahala, moe nau feilaulau fakalelei kotoabe, aia kuo nau age kiate au, e matuaki tabu ia maau, mo ho gaahi foha.

¹⁰Te ke kai ia i he botu tabu aubito, e kai ia e he kakai tagata kotoabe: e maonioni ia kiate koe.

¹¹Bea koe mea eni aau; koe feilaulau hiki hake oku nau foaki, fakataha moe gaahi feilaulau lialiaki kotoabe ae fānau a Isileli: kuou foaki ia kiate koe, mo ho gaahi foha, bea mo ho gaahi ofefine fakataha mo koe, i he fekau o lauikuoga: koia kotoabe oku maa i ho fale te ne kai mei ai.

¹²Koe lelei kotoabe oe lolo, moe lelei kotoabe oe uaine, bea moe uite, ko hono uluaki fua aia te nau atu kia Jihova, kuou foaki ia kiate koe.

¹³Bea mo ia oku fuofua moho i he fonua, aia te nau omi kia Jihova, e aau ia; koia kotoabe oku maa i ho fale te ne kai mei ai.

¹⁴Koe mea kotoabe oku fakatabu i Isileli oku aau ia.

¹⁵Ae mea kotoabe oku ne too ae manāva i he kakano kotoabe, aia oku nau omi kia Jihova, i he kau tagata, be i he faga manu, e aau ia: ka koe mooni te ke huhui ae uluaki tama i he tagata, bea moe uluaki fanau i he faga manu taemaa te ke huhui ia.

¹⁶Bea koia oku totonu ke huhui mei he taha mahina, te ke huhui ia o fakatatau ki hoo lau, aki ae baaga koe sikeli e nima, o hage koe sikeli oe fale tabu, aia koe kela e uofulu.

¹⁷Ka koe uluaki fanau ae faga bulu, bea moe uluaki fanau ae sibi, bea moe uluaki fanau ae koji, e ikai te ke huhui ia; he oku maonioni ia: bea te ke luluku aki ho nau toto ae feilaulauaga, bea te ke tutu ho nau gako koe feilaulau kuo gaohi aki ae afi, koe mea namu kakala kia Jihova.

¹⁸Bea ko ho nau kakano e aau ia, o hage koe aau ae fatafata lialiaki, bea moe alaga nima toomatau.

¹⁹Koe gaahi feilaulau hiki hake oe gaahi mea tabu kotoabe, aia kuo age e he fānau a Isileli kia Jihova, kuou foaki ia kiate koe, mo ho gaahi foha, bea mo ho gaahi ofefine fakataha mo koe, i he fekau o lauikuoga: koe fuakava ia kiate koe oe masima i he ao o Jihova, fakataha mo ho hako o lauikuoga.

²⁰Bea nae folofola a Jihova kia Elone, o behe, E ikai te ke ma‘u ha tofia i ho nau fonua, bea e ikai te ke ma‘u ha tufakaga iate kinautolu: ka ko au ko ho inaji mo ho tofia i he fānau a Isileli.

²¹Bea vakai, kuou foaki ki he fānau a Livai a hono vahe hogofulu oe mea kotoabe i Isileli ko ho nau tofia, koeuhi koe gaue oku nau tauhi, io ae tauhi oe fale fehikitaki oe kakai.

²²Bea e ikai toe ha‘u ae fānau a Isileli o ofi ki he fale fehikitaki oe kakai, telia naa nau fua ae agahala, bea nau mate.

²³Ka koe kau Livai te nau fai ae tauhi oe fale fehikitaki oe kakai, bea te nau fua e nau hia: koe fekau ia ki ho mou gaahi toutagata o lauikuoga, ke ilo oku ikai te nau ma‘u ha tofia i he fānau a Isileli.

²⁴Ka ko hono hogofulu oe vahe oe mea ae fānau a Isileli, aia oku nau atu koe feilaulau hiki hake kia Jihova, kuou foaki ia ki he kau Livai ke nau ma‘u ia: bea koeni, neu behe ai kiate kinautolu, E ikai te nau ma‘u ha tofia i he fānau a Isileli.

²⁵Bea nae folofola a Jihova kia Mosese, o behe,

²⁶Ke ke lea ki he kau Livai, o ke behe kiate kinautolu, Oka mou ka ma‘u hono hogofulu oe vahe oe mea mei he fānau a Isileli, aia neu foaki meiate kinautolu maa moutolu, ko ho mou tofia, te mou toki o hake hono feilaulau hiki hake kia Jihova, io, ko hono hogofulu oe vahe i ho mou vahe hogofulu.

²⁷Bea ko hoo mou feilaulau hiki hake e lau ia kiate kimoutolu, o hage koe koane oe botu hahaaga, bea moe bito oe tataoaga uaine.

²⁸E behe hoo mou atu ae feilaulau hiki hake kia Jihova i ho mou vahe hogofulu kotoabe, aia oku mou ma‘u i he fānau a Isileli; bea te mou foaki hono feilaulau hiki hake o Jihova kia Elone koe taulaeiki.

²⁹Koe mea foaki kotoabe oku mou ma‘u te mou age mei ai ae feilaulau hiki hake kia Jihova, mei hono lelei, io, mei hono mea oku tabu.

³⁰Bea koeni, te ke lea behe kiate kinautolu, Oka mou ka hiki hono lelei mei ai, e toki lau ai ia ki he Livai o hage ko hono tubu oe hahaaga koane, bea moe tubu oe tataoaga uaine.

³¹Bea te mou kai ia i he botu kotoabe, ekimoutolu mo ho mou kau nofoaga: he ko hono totogi ia o hoo mou tauhi ae fale fehikitaki oe kakai.

³²Bea e ikai te mou fua ae agahala koeuhi ko ia, oka mou ka hiki hono lelei mei ai: bea e ikai te mou fakauli ae gaahi mea tabu oe fānau a Isileli, telia naa mou mate.