NOMIBA 23:1-30 TON1884 - Bible AI

¹Koe feilaulau a Belaki moe lea fakatātā a Belami. BEA nae behe e Belami kia Belaki, Fokotuu mooku i heni ae feilaulauaga e fitu, bea teuteu mai i heni ae faga bulu e fitu, moe sibi tagata e fitu.

²Bea nae fai e Belaki o hage koe lea a Belami; bea nae feilaulau aki e Belaki mo Belami ha bulu moe sibi tagata i he feilaulauaga taki taha.

³Bea nae behe e Belami kia Belaki, Tuu ke ofi ki hoo feilaulau tutu, ka teu alu: hei ilo e haele mai a Jihova ke ma fetaulaki mo au, bea koia te ne fakaha kiate au teu tala kiate koe. Bea nae alu ia ki he botu maoluga.

⁴Bea nae fetaulaki ae Otua mo Belami: bea naa ne behe kiate ia, Kuou teuteu ae feilaulauaga e fitu, bea kuou feilaulau aki ai taki taha ae bulu moe sibi tagata.

⁵Bea nae tuku e Jihova ae lea ki he gutu o Belami, o ne behe, Ke ke foki kia Belaki, mo ke behe kiate ia.

⁶Bea naa ne foki kiate ia, bea vakai, nae tuu ia i he ene feilaulau tutu, aia, bea moe houeiki kotoabe o Moabe.

⁷Bea naa ne fai atu a ene lea fakatātā, o behe, Ko Belaki koe tu‘i o Moabe kuo ne omi au mei Elami, mei he gaahi mouga o hahake, o ne behe, Ha‘u, ke ke fakamalaia‘i maaku a Jekobe, bea ke tukitala‘i a Isileli.

⁸Teu fakamalaia‘i fefe, akinautolu oku ikai fakamalaia e he Otua? bea teu tukitala‘i fefe, akinautolu oku ikai tukitala‘i e he Otua?

⁹He oku ou mamata kiate ia mei he tumutumu oe gaahi maka, bea oku ou jio kiate ia mei he mouga: vakai, e nofo kehe ae kakai, e ikai lau ia fakataha moe gaahi buleaga.

¹⁰Kohai te ne faa lau ae efu o Jekobe, moe lau a hono vahe fa o Isileli? Tuku keu mate au i he mate ae maonioni, bea tatau hoku ikuaga mo hono ikuaga.

¹¹Bea nae behe e Belaki kia Belami, Koeha kuo ke fai kiate au? Neu omi koe ke ke tukitala‘i hoku gaahi fili, bea ta oku ke tabuaki‘i akinautolu.

¹²Bea nae lea ia o behe, Ikai oku totonu eku tokaga ke lea aki aia kuo ai e Jihova ki hoku gutu?

¹³Bea nae behe e Belaki kiate ia, Oku ou kole atu kiate koe, Ha‘u, ke ta o ki ha botu kehe, bea te ke mamata mei ai kiate kinautolu: te ke mamata be ki he e nau mui nofo, ka e ikai te ke mamata kiate kinautolu kotoabe: bea te ke tukitala‘i akinautolu mei ai maaku.

¹⁴Bea naa ne omi ia ki he goue o Sofimi, ki he tumutumu o Bisika, bea nae fokotuu ai ae feilaulauaga e fitu, bea nae feilaulau aki i ai taki taha ae bulu moe sibi tagata.

¹⁵Bea naa ne behe kia Belaki, Tuu ke ofi ki hoo feilaulau tutu, lolotoga a eku alu ki he botu na ke ma fetaulaki.

¹⁶Bea nae fetaulaki a Jihova mo Belami, bea nae tuku eia ae lea ki hono gutu, o behe, Ke ke toe alu kia Belaki, mo ke lea behe.

¹⁷Bea i he ene ha‘u ia kiate ia, vakai, nae tuu ia i he ene feilaulau tutu, fakataha moe houeiki o Moabe. Bea nae behe e Belaki kiate ia, Koeha ae folofola mai a Jihova?

¹⁸Bea naa ne fai atu a ene lea fakatātā, o behe, Belaki, tuu hake o fanogo; tokaga mai kiate au, akoe koe foha o Siboa:

¹⁹Oku ikai ko ha tagata ae Otua, ke loi ia; be koe foha oe tagata, koeuhi ke fakatomala ia: kuo ne folofola, bea ikai e fai eia ki ai? bea kuo lea ia, bea ikai e fakamooni ia ki ai?

²⁰Vakai, neu ma‘u ae fekau ke tabuaki: bea kuo ne fakamonuia‘i; bea e ikai teu faa fakakehe ia.

²¹Nae ikai te ne afio‘i ha agahala ia Jekobe, bea nae ikai te ne afio‘i ha agatuu ia Isileli: oku iate ia a Jihova ko hono Otua, bea oku iate kinautolu ae mavava ki he tu‘i.

²²Nae omi akinautolu e he Otua mei Ijibite; oku iate ia ae malohi oe iunikoni.

²³Koe mooni oku ikai ha tukitala kia Jekobe, bea oku ikai ha fakasausau kia Isileli: bea koe lea e fai i he kuoga ni ia Jekobe mo Isileli, Vakai ki he mea kuo fai ehe Otua!

²⁴Vakai, e tuu hake ae kakai o hage koe laione lahi, bea e hiki hake ia o hage koe laione mui: e ikai toe tokoto ia kae oua ke ne kai ae koloa, bea inu ae toto oe tamate‘i.

²⁵Bea nao behe e Belaki kia Belami, Oua aubito naa ke fakamalaia akinautolu, bea oua aubito naa ke tabuaki akinautolu.

²⁶Ka nae lea a Belami kia Belaki o behe, Ikai naaku tala kiate koe, o behe, Koe lea kotoabe kuo folofola aki mai e Jihova koia be teu fai?

²⁷Bea nae behe e Belaki kia Belami, Oku ou kole kiate koe, ha‘u, keu ave koe ki ha botu kehe; hei ilo e lelei ki he Otua ke ke fakamalaia‘i akinautolu mei ai maaku.

²⁸Bea nae omi e Belaki a Belami ki he tumutumu o Beoli, aia oku haga atu ki Jesimoni.

²⁹Bea nae behe e Belami kia Belaki, Fokotuu maaku i heni ae feilaulauaga e fitu, bea teuteu maaku i heni ae faga bulu e fitu, moe sibi tagata e fitu.

³⁰Bea nae fai e Belaki o hage koe lea a Belami, bea nae feilaulau aki i ai taki taha ae bulu moe sibi tagata.