NOMIBA 27:1-23 TON1884 - Bible AI

¹1 Oku tagi ae gaahi ofefine o Silofitati ke ma‘u ae tofia. 6 Koe fono ki he gaahi tofia. 12 Oku fakaha kia Mosese a ene bekia, bea oku ne kole ke fakanofo hono hoko. 18 Oku tuutuuni a Josiua ke hoko mo ia. BEA nae toki ha‘u ae gaahi ofefine o Silofitati, koe foha o Hefeli koe foha ia o Kiliati, koe foha ia o Mekili koe foha ia o Manase, i he gaahi faahiga o Manase koe foha o Josefa: bea koe gaahi higoa eni o hono gaahi ofefine; ko Mala, mo Noa, mo Hokila, mo Milika, mo Tilisa.

²Bea naa nau tuu i he ao o Mosese, moe ao o Eliesa koe taulaeiki, bea moe ao oe houeiki moe kakai kotoabe i he mataba oe fale fehikitaki oe kakai, o nau behe,

³Nae mate e mau tamai i he toafa, bea nae ikai kau ia ki he kakai nae fakataha akinautolu ke agatuu kia Jihova i he kakai o Kola; ka nae mate ia i he ene agahala aana, bea nae ikai hano gaahi foha.

⁴Bea koeha e mole ai ae higoa oe mau tamai mei hono faahiga, koeuhi oku ikai hano foha? Foaki mai kiate kimautolu ha tofia i he kaiga oe mau tamai.

⁵Bea nae omi e Mosese e nau mea ki he ao o Jihova.

⁶Bea nae folofola a Jihova kia Mosese, o behe,

⁷Oku lea totonu ae gaahi ofefine o Silofitati: koe mooni te ke foaki ke nau ma‘u ha tofia i he kaiga oe nau tamai; bea ke tuku ke hoko ae tofia oe nau tamai kiate kinautolu.

⁸Bea te ke lea ki he fānau a Isileli, o behe, Kabau e mate ha tagata, ka oku ikai hano foha, te mou tuku ke hoko hono ofefine ki hono tofia.

⁹Bea kabau oku ikai hano ofefine, te mou tuku hono tofia ki hono kaiga.

¹⁰Bea kabau oku ikai hano kaiga, te mou tuku hono tofia ki he kaiga o ene tamai.

¹¹Bea kabau oku ikai ha kaiga o ene tamai, te mou toki tuku hono tofia ki hono kaiga oku na vaofi i hono faahiga, bea te ne ma‘u ia: bea e tuku ia ki he fānau a Isileli koe fono oe fakamāu, o hage koe fekau a Jihova kia Mosese.

¹²Bea nae behe e Jihova kia Mosese, Ke ke alu hake ki he mouga ni ko Abalimi, o mamata ki he fonua aia kuou foaki ki he fānau a Isileli.

¹³Bea oka ke ka mamata ki ai, e tanaki foki koe ki ho kakai, o hage koe tanaki a ho taokete ko Elone.

¹⁴Koeuhi naa mo agatuu ki he eku fekau i he toafa o Sini, i he vākē ae kakai, ke fakahikihiki au i he vai i ho nau ao: aia koe vai ko Meliba i Ketesi i he toafa o Sini.

¹⁵Bea nae lea a Mosese kia Jihova, o behe,

¹⁶Tuku ke fakanofo e Jihova, koe Otua oe laumalie oe kakai kotoabe, ha tagata ke bule ki he kakai,

¹⁷Aia e muomua atu i he nau alu atu, bea muomua mai i he e nau ha‘u, bea ne tataki atu eia akinautolu, bea tataki mai eia akinautolu; koeuhi ke oua naa hage ae kakai a Jihova koe faga sibi oku ikai hano tauhi.

¹⁸Bea nae behe e Jihova kia Mosese, Ke ke omi ekoe a Josiua koe foha o Nuni, koe tagata oku iate ia ae laumalie, bea ke hilifaki ho nima kiate ia;

¹⁹Bea tuku ia i he ao o Eliesa koe taulaeiki, bea moe ao oe kakai kotoabe; bea ke tuku ae fekau kiate ia i ho nau ao.

²⁰Bea te ke tuku kiate ia mei ho ogoogolelei oou, koeuhi ke talagofua ae fānau kotoabe a Isileli.

²¹Bea e tuu ia i he ao o Eliesa koe taulaeiki, bea te ne kumi ha boto maana i he fakailo ae Ulimi i he ao o Jihova: te nau alu atu i he ene folofola, bea te nau foki mai i he ene folofola, koia, bea moe kakai o Isileli fakataha mo ia, io ae kakai kotoabe.

²²Bea nae fai e Mosese o hage koe fekau a Jihova kiate ia: o ne ave a Josiua, o tuku ia i he ao o Eliesa koe taulaeiki, moe ao oe kakai kotoabe:

²³Bea nae ai eia a hono nima kiate ia, mo ne lea kiate ia, o hage koia nae fekau e Jihova i he nima o Mosese.