NOMIBA 3:1-51 TON1884 - Bible AI

¹1 Koe gaahi foha o Elone. 5 Oku tuku ae kau Livai ki he kau taulaeiki koeuhi koe gaue oe fale lotu fehikitaki, 11 koe fetogi oe uluaki fanau. 14 Oku lau ae kau Livai i ho nau gaahi faahiga. 21 Koe gaahi faahiga, moe toko lahi, moe tauhi oe fānau a Kesoni, 27 moe kau Kohate, 33 moe kau Melali. 38 Koe tuuga moe gaue a Mosese mo Elone. 40 Oku ataatā ae uluaki fanau koe mea i he kau Livai. 44 Oku huhui hono toe. BEA koeni foki ae gaahi toutagata o Elone mo Mosese i he aho nae folofola ai a Jihova kia Mosese i he mouga ko Sainai.

²Bea koe higoa eni oe gaahi foha o Elone; ko Natabi koe uluaki ia, mo Abiu, mo Eliesa, mo Itama.

³Bea koe higoa ia oe gaahi foha o Elone nae fakanofo koe kau taulaeiki, akinautolu naa ne fakatabu‘i ke gaue i he gaue fakataulaeiki.

⁴Bea nae mate a Natabi mo Abiu i he ao o Jihova, i he e na omi ae afi kehe ki he ao o Jihova i he toafa o Sainai, bea nae ikai haa na fānau: bea ko Eliesa mo Itama naa na gaue i he gaue fakataulaeiki i he ao o Elone ko ena tamai.

⁵Bea nae folofola a Jihova kia Mosese, o behe,

⁶Ke ke fakaofi mai ae faahiga o Livai, bea fakaha akinautolu i he ao o Elone koe taulaeiki koeuhi ke nau gaue kiate ia.

⁷Bea te nau tokaga ki he ene gaue, moe gaue ae kakai kotoabe, i he ao oe fale fehikitaki oe kakai, ke fai ki he gaue oe fale fehikitaki.

⁸Bea te nau tauhi ae gaahi mea kotoabe oe fale fehikitaki oe kakai, moe gaue ae fānau a Isileli, ke fai ki he gaue oe fale fehikitaki.

⁹Bea te ke foaki ae kau Livai kia Elone mo hono gaahi foha: kuo foaki akinautolu kotoabe kiate ia mei he fānau a Isileli.

¹⁰Bea te ke fakanofo a Elone mo hono gaahi foha, bea te nau fai e nau gaue fakataulaeiki: bea koe muli e ha‘u o ofi e tamate‘i ia.

¹¹Bea nae folofola a Jihova kia Mosese, o behe,

¹²Bea ko au, vakai, Ko au kuo omi ae kau Livai mei he fānau a Isileli ke fetogi aki ae uluaki tama kotoabe kuo ne too ae manāva i he fānau a Isileli; koia, e ooku ae kau Livai;

¹³Koeuhi oku ooku ae uluaki tama kotoabe; he koe aho neu ta‘i ai ae uluaki fanau i he fonua ko Ijibite, neu fakatabu‘i ai kiate au ae uluaki tama i Isileli, ae tagata moe manu; Ko au ko Jihova e ooku akinautolu.

¹⁴Bea nae folofola a Jihova kia Mosese i he toafa o Sainai, o behe,

¹⁵Ke ke lau ae fānau a Livai i he fale oe nau gaahi tamai, mo ho nau gaahi faahiga, ae kakai tagata kotoabe mei hono taha mahina, ke ke lau fakaaufuli akinautolu.

¹⁶Bea nae lau akinautolu e Mosese o fakatatau ki he folofola a Jihova, bea hage koe fekau kiate ia.

¹⁷Bea koe higoa eni oe gaahi foha o Livai; ko Kesoni, mo Kohate, mo Melali.

¹⁸Bea koe gaahi higoa eni oe gaahi foha o Kesoni i ho nau gaahi faahiga, ko Libinai, mo Simi.

¹⁹Bea koe gaahi foha o Kohate i ho nau gaahi faahiga, ko Amilami, mo Isa, mo Hebeloni, mo Usili.

²⁰Bea koe gaahi foha o Melali i ho nau gaahi faahiga, ko Mali, mo Musi. Bea koe gaahi fānau oe kau Livai akinautolu ni, o fakatatau ki he fale oe nau gaahi tamai.

²¹Bea nae ia Kesoni ae faahiga oe kau Libinai, moe faahiga oe kau Simi; bea koe gaahi faahiga oe kau Kesoni akinautolu ni.

²²Ko kinautolu nae lau iate kinautolu o fakatatau ki he lau oe kakai tagata mei hono taha mahina o fai hake, io, akinautolu nae lau iate kinautolu, koe toko fitu afe ma toko nimageau.

²³Bea e nofo kitua i he fale fehikitaki ki he botu luluga ae gaahi faahiga oe kau Kesoni.

²⁴Bea ko Iliasafi koe foha o Laeli, koe eiki ia oe fale oe tamai ae kau Kesoni.

²⁵Bea koe gaue ae gaahi foha o Kesoni ki he fale fehikitaki oe kakai, koe fale tabu, bea moe fale fehikitaki, mo hono buloga, bea moe buibui oe mataba oe fale fehikitaki oe kakai.

²⁶Bea moe gaahi buibui oe lotoa, bea moe buibui oe mataba oe lotoa, aia oku ofi ki he fale fehikitaki, bea oku takatakai ae feilaulauaga, bea moe gaahi maea ki he gaue kotoabe i ai.

²⁷Bea nae ia Kohate ae faahiga oe kau Amilami, bea moe faahiga oe kau Isa, bea moe faahiga oe kau Hebeloni, bea moe faahiga oe kau Usili, bea koe gaahi faahiga oe kau Kohate akinautolu ni.

²⁸Koe lau oe kakai tagata kotoabe mei hono taha mahina o fai hake, koe toko valu afe ma toko onogeau, kuo nau fai ki he gaue oe fale tabu.

²⁹Koe gaahi faahiga oe gaahi foha o Kohate te nau nofo i he botu toga oe fale fehikitaki.

³⁰Bea ko Elisefani koe foha o Usili koe eiki ia oe fale oe tamai ae gaahi faahiga oe kau Kohate.

³¹Bea koe mea ke nau tauhi, koe buha oe fuakava, moe balebale, moe tuuga māma, moe gaahi feilaulauaga, moe gaahi ibu oe fale tabu aia kuo nau gaue aki, bea moe buibui, bea moe gaahi mea kotoabe i ai.

³²Bea ko Eliesa, koe foha o Elone koe taulaeiki koe bule ia oe houeiki oe kau Livai, bea e bule ia kiate kinautolu oku fai ae gaue oe fale tabu.

³³Bea nae ia Melali ae faahiga oe kau Mali, moe faahiga oe kau Musi: bea koe gaahi faahiga o Melali akinautolu ni.

³⁴Bea ko kinautolu nae lau iate kinautolu, o fakatatau ki he lau oe kakai tagata kotoabe, mei hono taha mahina o fai hake, koe toko ono afe ma toko uageau.

³⁵Bea ko Suleli koe foha o Ebieli koe eiki ia oe fale oe tamai ae gaahi faahiga o Melali: ko kinautolu ni, e nofo i he botu tokelau, oe fale fehikitaki.

³⁶Bea oku ae gaahi foha o Melali ae gaahi laubaba oe fale fehikitaki, mo hono gaahi akau fakamau, mo hono gaahi bou, mo hono gaahi tuuga bou, bea mo hono gaahi ibu kotoabe, bea moe mea kotoabe oku gaue aki i ai.

³⁷Bea moe gaahi otu bou oe lotoa, bea mo ho nau gaahi tuuga, mo ho nau gaahi tutuki, mo ho nau gaahi maea.

³⁸Ka ko kinautolu oku nofo i he ao oe fale fehikitaki ki he botu hahake, io, i he ao oe fale fehikitaki oe kakai i he botu hahake, ko Mosese, mo Elone, mo hono gaahi foha, ke tauhi ai ae gaue oe fale tabu ki he gaue ae fānau a Isileli; bea koe muli oku ha‘u o ofi e tamate‘i ia.

³⁹Ko kinautolu kotoabe nae lau i he kau Livai, aia nae lau e Mosese mo Elone i he fekau a Jihova, i ho nau gaahi faahiga, ae kakai tagata kotoabe mei hono taha mahina o fai hake, koe toko ua mano ma toko ua afe.

⁴⁰Bea nae behe e Jihova kia Mosese, Ke ke lau ae uluaki tama tagata kotoabe i he fānau a Isileli mei hono taha mahina o fai hake, bea ke lau ho nau higoa.

⁴¹Bea ke ave ae kau Livai mooku, (Ko au ko Jihova) ke fetogi aki ae uluaki fanau i he fānau a Isileli; bea moe faga manu ae kau Livai, ke fetogi aki ae uluaki kotoabe oe faga manu ae fānau a Isileli.

⁴²Bea nae lau e Mosese ae uluaki tama kotoabe i he fānau a Isileli, o hage koe fekau a Jihova kiate ia.

⁴³Bea koe uluaki tama tagata kotoabe i he lau a ho nau higoa mei hono taha mahina o fai hake, ko kinautolu nae lau iate kinautolu, koe toko ua mano, moe toko ua afe, moe toko uageau, moe toko fitugofulu ma toko tolu.

⁴⁴Bea nae folofola a Jihova kia Mosese, o behe,

⁴⁵Ave ae kau Livai ke fetogi aki ae uluaki tama kotoabe i he fānau a Isileli; bea moe faga manu ae kau Livai ke fetogi aki e nau faga manu; bea koe kau Livai e ooku akinautolu: Ko au ko Jihova.

⁴⁶Bea koeuhi ko kinautolu, e huhui, ae toko uageau moe toko fitugofulu ma toko tolu, oe uluaki tama i he fānau a Isileli, akinautolu kuo toko lahi hake i he kau Livai;

⁴⁷Ke ke ave ae sikeli e nima maa nautolu taki taha, o fakatatau ki he sikeli oe fale tabu: (koe sikeli koe kela e uofulu:)

⁴⁸Bea te ke atu ae baaga, aia kuo huhui aki akinautolu oku toe, kia Elone, mo hono gaahi foha.

⁴⁹Bea nae ma‘u e Mosese ae baaga huhui o kinautolu nae toko lahi hake iate kinautolu nae huhui e he kau Livai:

⁵⁰Nae ma‘u eia ae gaahi baaga mei he uluaki fanau i he fānau a Isileli; koe sikeli e afe ma tolugeau ma onogofulu ma nima, o fakatatau moe sikeli oe fale tabu:

⁵¹Bea nae atu e Mosese ae gaahi baaga kuo huhui aki akinautolu kia Elone, mo hono gaahi foha, o hage koe folofola a Jihova, bea hage koe fekau a Jihova kia Mosese.