1
2Oua naa hoko ae foi agahala ki he fakataha oe kakai a Jihova; io o a‘u atu ki hono hogofulu o ene toutagata e ikai hoko ia ki he fakataha oe kakai a Jihova.
3Ke oua naa hoko ae kau Amoni, be koe kau Moabe ki he fakataha oe kakai a Jihova; io, o a‘u atu ki hono hogofulu oe nau toutagata e ikai te nau hoko ki he fakataha oe kakai a Jihova o taegata:
4Koeuhi nae ikai te nau fakafetaulaki kiate kimoutolu i he hala aki ae ma moe vai, i hoo mou ha‘u kituaa mei Ijibite; bea koeuhi naa nau totogi kia Belami koe foha o Beoli mei Bitoli i Mesobotemia, ke ne fakamalaia‘i koe:
5Ka koe mooni nae ikai tokaga a Jihova ko ho Otua kia Belami; ka nae liliu e Jihova ko ho Otua ae fakamalaia koe mea monuia ia kiate koe, koeuhi nae ofa kiate koe a Jihova ko ho Otua.
6Oua naa ke kumi ki he e nau melino be koe nau lelei i ho gaahi aho kotoabe o taegata.
7Ka e ikai te ke fehia ki he tagata Itomi; he ko ho tokoua ia: oua naa ke fehia ki ke tagata Ijibite; he naa ke nofo koe muli i hono fonua.
8Koe gaahi fānau oku tubu iate kinautolu te nau hoko ki he fakataha oe kakai a Jihova i hono tolu o ho nau toutagata.
9Oka alu atu a hoo kau tau ki ho gaahi fili, te ke taofi koe mei he mea agahala kotoabe.
10Kabau oku iate kimoutolu ha tagata, oku ikai maa koe mea i he mea taemaa kuo hoko fakafokifa kiate ia i he bouli, e alu ia kituaa i he abitaga, ke oua naa ha‘u ia ki loto i he abitaga:
11Bea ka efiafi, bea e behe, te ne kaukau ia aki ae vai: bea ka to ae laa, e toe ha‘u ia ki he abitaga.
12Te ke vahe ha botu kiate koe i tuaa i ho abitaga, aia ke ke alu ki ai i he mamao:
13Bea te ke ai ha huo i ho tokotoko; bea e behe, oka ke ka alu kituaa, ke ke keli aki ia, bea ke tafoki koe o tanu aia oku ha‘u meiate koe:
14He oku haele a Jihova ko ho Otua i he lotolotoga o ho abitaga, ke fakahaofi koe, bea ke tukuage ho gaahi fili i ho ao: koia ke maonioni ai ho abitaga: ke oua naa ne afio‘i ha mea taemaa e taha iate koe, ke ne tafoki ai meiate koe.
15Oua naa ke toe atu ki hono eiki ae tamaioeiki kuo hao kiate koe mei hono eiki:
16E nofo ia mo koe, io, fakataha mo kimoutolu, i he botu koia e fili eia i he kolo e taha, aia e manako ki ai ia: oua naa ke fakamalohi kiate ia.
17Oua naa ai ha fefine feauaki i he gaahi ofefine o Isileli, bea oua naa ai ha tagata agahala fakalielia i he gaahi foha o Isileli.
18Oua naa ke omi ae totogi oe feauaki be koe totogi oe kuli ki he fale o Jihova ko ho Otua i ha fuakava e taha: he koe mea kovi fakatouoji be ia kia Jihova ko ho Otua.
19Oua naa ke nono atu ke ma‘u totogi lahi mei ho tokoua; ae totogi oe baaga, be koe totogi meakai, be koe totogi o ha mea e taha kuo nono atu ke ma‘u totogi:
20E gofua a hoo nono atu ki he muli ke ma‘u totogi; kae oua naa ke nono atu ki ho tokoua ke ma‘u totogi: koeuhi ke tabuaki‘i koe e Jihova ko ho Otua i he mea kotoabe oku ke ai ho nima ki ai, i he fonua koia oku ke alu ki ai ke ke ma‘u ia.
21Oka ke ka fuakava aki ae fuakava kia Jihova ko ho Otua, oua naa ke fakatuai a hono fai: he koe mooni ko Jihova ko ho Otua te ne eke ia kiate koe; bea e hoko ia koe agahala kiate koe.
22Bea kabau oku ke taofi koe o ikai fuakava, e ikai agahala ia kiate koe.
23Ka koia kuo alu atu i ho lougutu ke ke fakababau mo fai: koe mea atu loto lelei be, o hage ko hoo fuakava kia Jihova ko ho Otua, aia kuo ke fakailo aki ho gutu.
24Oka ke ka hoko ki he goue vaine a ho kaugaabi, a gofua a hoo kai ae kelebi ko hoo faiteliha ke ke makona ai; kae oua naa ke fao ha niihi i hoo ibu.
25Oka ke ka hoko ki he goue uite a ho kaugaabi, e gofua a hoo toli hono gaahi fua aki ho nima: kae oua naa ke momoi ai ae helebiko ki he uite tuu a ho kaugaabi.