TEUTALONOME 26:1-19 TON1884 - Bible AI

¹1 Koe vete o ia oku ne atu ae kato uluaki fua. 12 Koe lotu o ia oku ne atu ae tukuhau o hono tolu ta‘u. 16 Koe lea fefuakava aki ae Otua moe kakai. BEA e hoko o behe, oka ke ka hoko ki he fonua aia oku foaki kiate koe e Jihova ko ho Otua ko ho tofia, bea kuo ke ma‘u ia, mo ke nofo ki ai;

²Te ke too ai mei he gaahi uluaki fua kotoabe oe fonua aia te ke omi mei ho fonua aia oku foaki kiate koe e Jihova ko ho Otua, e fao ia ki he kato, bea te ke alu ki he botu aia e fili e Jihova ko ho Otua ke ai ki ai hono huafa.

³Bea te ke alu ki he taulaeiki aia oku i ai i he gaahi aho koia, bea ke behe kiate ia, Oku ou fakaha he aho ni kia Jihova ko ho Otua, kuou ha‘u mei he fonua aia nae fuakava ai a Jihova ki he e tau gaahi tamai ke foaki kiate kitautolu.

⁴Bea e too e he taulaeiki ae kato mei ho nima, bea e tuku ia i he haohaoga oe feilaulauaga kia Jihova ko ho Otua.

⁵Bea te ke lea o behe, i he ao o Jihova ko ho Otua, Ko eku tamai koe Silia tei mate, bea nae alu hifo ia moe toko jii ki Ijibite, bea aunofo ai, bea nae tubu ai ia koe buleaga lahi, mo malohi, mo toko lahi:

⁶Bea nae fai kovi kiate kimautolu ae kakai Ijibite, o tautea akimautolu, o hilifaki kiate kimautolu ae gaue fakabobula lahi:

⁷Bea i he e mau tagi kia Jihova koe Otua oe mau gaahi tamai, nae tokaga a Jihova ki ho mau le‘o, bea nae afio ia ki he e mau gaahi mamahi, moe mau gaue, mo ho mau fakafiu‘i:

⁸Bea nae omi e Jihova akimautolu mei Ijibite aki ae nima mafimafi, moe nima kuo mafao atu, bea i he gaahi mea fakamanavahe lahi, moe gaahi fakailoga, moe gaahi mea fakaofo:

⁹Bea kuo ne omi akimautolu ki he botu ni, bea kuo ne foaki kiate kimautolu ae fonua ni, koe fonua oku mahu tafea i he hua huhu moe honi.

¹⁰Bea koeni, vakai, kuou omi ae uluaki fua oe fonua aia kuo ke foaki ekoe, E Jihova, kiate au. Bea te ke fokotuu ia i he ao o Jihova ko ho Otua, bea te ke lotu i he ao o Jihova ko ho Otua:

¹¹Bea te ke fiefia i he lelei kotoabe aia oku foaki e Jihova ko ho Otua kiate koe, bea ki ho fale, akoe, moe Livai, moe muli oku iate kimoutolu.

¹²I he hili hao tukuhau i hono hogofulu oe vahe o hoo mea kotoabe i hono tolu oe ta‘u, aia koe ta‘u oe tukuhau, bea kuo ke atu ia ki he kau Livai, moe muli, moe tamai mate, moe witou, koeuhi ke nau kai i hoo gaahi kolo, bea makona;

¹³Bea te ke toki lea koe i he ao o Jihova ko ho Otua, Kuou omi ae gaahi mea tabu mei hoku fale, bea kuou foaki foki ia ki he kau Livai, bea ki he muli, moe tamai mate, moe witou, o hage ko hoo gaahi fekau kotoabe aia naa ke fekau kiate au: nae ikai teu talagataa ki hoo fekau, bea nae ikai teu fakagalogalo‘i ia:

¹⁴Nae ikai teu kai mei ai i he eku mamahi, bea nae ikai jii teu too ha mea mei ai i he gaue taemaa, be atu ha mea mei ai ma ae kakai mate: ka kuou tokaga ki he le‘o o Jihova ko hoku Otua, bea kuou fai o fakatatau ki he gaahi mea kuo ke fekau kiate au.

¹⁵Afio hifo mei ho afioaga maonioni mei he lagi, bea tabuaki ho kakai ko Isileli, moe fonua kuo ke foaki mai kiate kimautolu, o hage ko hoo fuakava ki he e mau gaahi tamai, koe fonua oku mahu tafea i he hua huhu moe honi.

¹⁶Kuo fekau kiate koe he aho ni e Jihova ko ho Otua ke ke fai ae gaahi tuutuuni moe gaahi fakamāu: koia ke ke tauhi mo ke fai ki ai aki ho loto kotoa, mo ho laumalie kotoa.

¹⁷Kuo ke fakaha he aho ni ko Jihova ko ho Otua, bea te ke alu i hono gaahi hala, mo ke tauhi ene gaahi tuutuuni, mo ene gaahi fekau, mo ene gaahi fakamāu, bea te ke tokaga ki hono le‘o:

¹⁸Bea kuo fakaha e Jihova he aho ni ko ene kakai mahuiga akimoutolu, o hage ko ene talaofa kiate koe, bea koeuhi ke ke tauhi ene gaahi fekau kotoabe;

¹⁹Bea ke ne gaohi koe ke ke maoluga lahi i he gaahi buleaga kotoabe kuo ne gaohi, i he ogoogolelei, bea i he higoa, bea i he fakaabaaba; bea koeuhi ke ke hoko koe kakai maonioni kia Jihova ko ho Otua, o hage ko ene folofola.