Ёшуа 3:1-17 UZV2013 - Bible AI

¹Эртасига тонгда Ёшуа бутун Исроил халқи билан бирга Шитим қароргоҳидан чиқиб, Иорданга етиб келишди. Дарёни кечиб ўтишдан олдин улар ўша ерда қароргоҳ қуришди.

²Уч кундан кейин қабила назоратчилари қароргоҳ бўйлаб юриб,

³халққа шундай дейишди: “Леви руҳонийлари Эгангиз Худонинг аҳд сандиғини кўтариб кетаётганини кўрганингизда йўлга чиқасизлар. Унинг орқасидан боринглар,

⁴шунда борадиган йўлингизни билиб оласизлар, чунки сизлар бу йўлдан олдин юрмагансизлар. Лекин сандиқ билан сизларнинг орангиздаги масофа тахминан икки минг тирсак [1] бўлиши керак. Орангиздаги масофа мана шундан кам бўлмасин.”

⁵Кейин Ёшуа халққа: “Ўзингизни покланг [2], чунки эртага Эгамиз орамизда мўъжизалар қилади”, — деди.

⁶Эртасига Ёшуа руҳонийларга шундай деди: “Аҳд сандиғини олиб, халқнинг олдида юринглар.” Руҳонийлар аҳд сандиғини кўтариб, халқ олдида боришди.

⁷Эгамиз Ёшуага шундай деди: — Бугундан бошлаб сени бутун Исроил халқи олдида кўкка кўтараман, шунда улар Мен Мусо билан бўлганимдек, сен билан бирга бўлишимни билишади.

⁸Аҳд сандиғини кўтариб борадиган руҳонийларга айтасан: “Иордан дарёсига етиб борганингиздан кейин дарёга кириб тўхтанглар.”

⁹Кейин Ёшуа Исроил халқига шундай деди: — Яқинроқ келиб, Эгангиз Худонинг гапларини эшитинг.

¹⁰[10-11] Мана, бутун олам Раббийсининг аҳд сандиғи олдингизда Иордан дарёсидан ўтади [3]. Шундай қилиб, барҳаёт Худо сизларнинг орангизда эканлигини, Унинг Ўзи Канъон, Хет, Хив, Париз, Гиргош, Амор ва Ёбус халқларини албатта сизларнинг олдингиздан қувиб юборишини биласизлар.

¹²Энди Исроил халқининг ҳар бир қабиласидан биттадан, жами ўн иккита эркакни танланг.

¹³Бутун олам Раббийси, Эгамизнинг аҳд сандиғини кўтарган руҳонийларнинг оёқлари Иордан дарёсининг сувларига тегиши биланоқ оқим тўхтаб қолади, сув бир жойда йиғилиб туради.

¹⁴Халқ ўз чодирларини йиғиб, Иордандан ўтиш учун йўлга тушганда, аҳд сандиғини кўтарган руҳонийлар уларнинг олдида борар эди.

¹⁵Иордан суви ҳосил пайтида [4] қирғоқларидан ҳам тошиб оқарди. Аҳд сандиғини кўтарган руҳонийлар Иорданга яқинлашди. Уларнинг оёқлари сувга тегиши биланоқ

¹⁶дарёнинг оқими тўхтаб қолди. Сув узоқда жойлашган Зоратон ёнидаги Адама шаҳри [5] олдида йиғилиб қолди, Ўлик денгизга [6] қуйиладиган сув эса бутунлай тўхтаб қолди. Шундан кейин халқ дарёдан ўтиб, Ерихо шаҳрининг ёнидаги ерларга борди.

¹⁷Бутун Исроил халқи қуруқ ердан юриб, Иордандан ўтиб бўлмагунча, аҳд сандиғини кўтарган руҳонийлар дарёнинг ўртасида, қуруқ ерда туришди.