Воиз 1:1-18 UZV2013 - Bible AI

¹Қуйидагилар Довуд ўғли, Қуддусда ҳукмронлик қилган Воизнинг [1] сўзларидир.

²“Беҳуда! [2] Беҳуда! — дейди Воиз. — Ҳаммаси беҳудадир!”

³Одам бу дунёда қилган меҳнатидан Қандай фойда топар?

⁴Авлод келиб, авлод кетар, Бу дунё эса шундайлигича қолаверар.

⁵Қуёш чиқиб яна ботар, Чиққан жойига қайтишга шошар.

⁶Шамол жанубга эсар, Шимол тарафга елар, Такрор–такрор айланиб, Ўз йўлидан юраверар.

⁷Барча дарёлар денгизга оқар, Денгиз эса ҳеч тўлмас, Шунда ҳам ўз макони сари Оқаверар дарёлар.

⁸Ҳамма нарса чарчатар, ҳолдан тойдирар, Уларни тасвирлашга сўзлар ҳам етмас. Кўзларимиз кўраверар, аммо тўймас, Қулоқларимиз эшитаверар, аммо қониқмас.

⁹Олдин нима бўлган бўлса, яна содир бўлгай, Нима қилинган бўлса, яна қайтарилгай, Бу дунёда ҳеч қандай янги нарса йўқ.

¹⁰Бирор нарса бормидики, биз бу ҳақда: “Қаранглар, бу янгилик–ку!” — деб айта олсак?! У олдиндан бор эди, биз таваллуд топмасдан олдин ҳам шу ерда эди.

¹¹Қадимда бўлганлар эсга олинмас, ҳатто бундан кейин бўладиганлар ҳам келажакда эсланмас.

¹²Мен, Воиз — Исроил устидан Қуддусда шоҳман.

¹³Ўзимни донолик билан изланишга, мана шу дунёда бўлаётган ҳамма ишларни тушунишга бағишладим. Худо инсонга берган бу иш қандай қайғули–а!

¹⁴Мен бу дунёда бўлаётган ҳамма нарсани кўрдим, қаранглар, ҳаммаси беҳуда, шамолнинг орқасидан қувишдай экан.

¹⁵Эгри нарсани тўғрилаб бўлмас, Йўқ нарсани санаб бўлмас.

¹⁶Ўзимга шундай дедим: “Мана, мен буюк бўлиб, доноликда мендан олдин Қуддусда ҳукмронлик қилганларнинг ҳаммасидан ўзиб кетдим. Кўп донолик орттирдим, илму маърифатни яхшилаб ўргандим.”

¹⁷Донолик ва илм–маърифатнинг фойдаси телбалик ва аҳмоқликдан устунлигини англаб етишга ўзимни бағишладим, аммо бу ҳам шамолнинг орқасидан қувишдай эканлигини тушундим.

¹⁸Қайғу ҳам ортаркан, донолик қанча кўп бўлса, Дард кўпаяр экан гар билим ошса.