Ишаё 16:1-14 UZV2013 - Bible AI

¹Қўзилар юборгин юртнинг ҳукмдорига, Саҳро йўли орқали, Села шаҳридан [1] азиз Сион тоғига.

²Худди дарбадар қушлардай Бўлиб қолар ахир, Мўаб аҳли. Улоқтирилади қуш уяси Арнон сойлиги [2] кечувига.

³Улар шундай дейди: “Маслаҳат бер бизга, қарор чиқар! Куннинг ўртасида соянгни тун каби тушир. Яширгин қувилганларни, Ошкор қилма қочоқларни!

⁴Қочоқларимиз орангизда яшасин, Қирғин келтирувчи зўравонлардан Мўабга бошпана бўлгин.”
Золимлар йўқ бўлганда, Зўравонлик барҳам топади. Талончилар юртдан ғойиб бўлади.

⁵Тахт ўрнатилар садоқат ила. Тахтда ўтирар ҳақиқатгўй бир ҳукмдор. Бу ҳукмдор Довуд хонадонидан келиб чиқар. У адолатпарвар, одиллик билан ҳукм чиқарар.

⁶Ҳа, эшитганмиз Мўабнинг мағрурлигини, Унинг киборлиги, чиройи, бойлигини! Нақадар мағрурдир у! Аммо буларнинг ҳаммаси ёлғон!

⁷Энди Мўаб фарёд чексин, Ҳамма Мўаб учун нола қилсин. Ҳа, ўша Хир–Харасот [3] майизларини Қўмсаб, аза тутасиз.

⁸Мана, ҳолдан тойди Хашбон далалари, Сивмо узумзорлари ҳам. Халқларнинг ҳукмдорлари эзган Сивмонинг узум бошларини. Улар Язиргача етиб бордилар, Улар саҳрода кезиб юрдилар. Новдалари бир вақтлар ўсиб кетиб, Денгиздан ҳам ошиб ўтди.

⁹Шу боис Язир йиғлаганда, мен ҳам йиғлайман, Эй Сивмо узумзорлари! Кўз ёшларим ила сизларни шалаббо қиламан, Эй Хашбон, Элалей шаҳарлари! Ахир, ёзги ҳосилингиз барҳам топди, Дон ҳосили пайтидаги ўйин–кулгилар тўхтади.

¹⁰Шодлик, хурсандчиликка Барҳам берилган боғларда, Узумзорларда қўшиқ айтилмас, Шодлик қийқириқлари кўтарилмас. Узум сиқиш чуқурларида Ишлайдиган ҳеч ким қолмас. Шодлик қийқириқларини Худо бостирди.

¹¹Шу боис юрагим Мўаб учун Арфа каби нола қилар. Хир–Харасот [4] учун вужудим фарёд чекар.

¹²Мўаб халқи келиб, ўзини толиқтирса ҳам, Саждагоҳига келиб, илтижолар қилса [5] ҳам, Ҳеч нарсага эришмас.

¹³Раббий бу сўзларни илгаридан айтган эди Мўаб ҳақида.

¹⁴Энди Раббий айтар: “Ҳозир жуда кўп бўлганига қарамай, уч йилдан кейин ёлланган ишчининг муддати каби, Мўабнинг обрўси тўкилар. Халқидан қолганлари эса жуда оз, заиф бўлар.”