Ишаё 2:1-22 UZV2013 - Bible AI

¹Омиз ўғли Ишаёга ваҳийда Яҳудо ва Қуддус ҳақида аён бўлган башорат.

²Шундай кунлар келадики, Эгамизнинг уйи турган тоғ Тоғларнинг энг юксаги бўлиб, қарор топади. Бу тоғ ҳаммасидан ҳам баланд бўлади, Ҳамма халқлар у ерга дарёдай оқиб келади.

³Кўплаб эллар келади, Улар шундай деб айтади: “Қани, юринглар! Чиқайлик Эгамизнинг тоғига! [1] Қани, юринглар! Борайлик Ёқуб наслининг Худоси уйига! Токи У бизга ўргатсин Ўзининг йўлларини, Токи юрайлик бизлар Унинг сўқмоқларидан.” Ахир, Эгамизнинг каломи келиб чиқар Қуддусдан, Ҳа, Худонинг таълимоти келиб чиқар Сиондан.

⁴Эгамиз ҳукм қилади халқларнинг орасида, Ажрим қилади кўп миллатлар орасида. Қиличларини айлантиришади омочга, Найзаларини эса ток қайчиларига. Қилич кўтармайди бир–бирига халқлар, Ҳеч қачон жанг қилмайди улар.

⁵Эй Ёқуб хонадони! Келинглар, Эгамизнинг нурида юрайлик.

⁶Эй Ёқуб хонадони! Халқингизнинг йўлларини сиз тарк этдингиз! [2] Бу юрт шарқдан келган башоратгўйларга [3], Филистлар юртига [4] ўхшаб фолбинларга тўла. Улар бегона халқлар билан ҳамтовоқ бўлдилар.

⁷Қаранг, Ёқуб хонадони тўла кумуш, олтинга, Чек–чегараси йўқ хазиналарининг, Уларнинг юрти тўладир отларга, Чек–чегараси йўқ жанг араваларининг.

⁸Уларнинг юрти тўла беҳуда бутларга! Улар таъзим этарлар Қўлларининг ижодига, Ўзлари ясаб, яратганларга.

⁹Эвоҳ, мана инсон паст бўлди, Шу тариқа одамзод тиз чўктирилди, Уларнинг қаддини кўтарма, эй Эгам!

¹⁰Эгамдан қўрқиб қочинглар, Қоянинг ичига кириб олинглар, Тупроқ остига яширининглар, Эгамнинг улуғворлиги буюкдир!

¹¹Ҳа, инсоннинг мағрурлиги ерга урилади, Одамзоднинг юксаклиги паст бўлади, Ёлғиз Худо ўша куни юксалади.

¹²Зотан, Сарвари Оламнинг бир куни бор, Қарши чиқар У жамики кибор, кеккайганларга. Ўша мағрурларга қарши бўлар, Уларнинг ҳар бирини ерга урар.

¹³Қарши бўлар У барча юксак, мағрурларга! Ҳа, ўша Лубнон садрларию Башан [5] эманларининг ҳаммасига.

¹⁴Қарши бўлар У ҳамма баланд тоғларга, Ҳамма юксак тепаликларга.

¹⁵Қарши бўлар У ҳар бир баланд минорага, Ҳар бир мустаҳкам қалъага.

¹⁶Қарши бўлар ўша машҳур Таршиш [6] кемаларию Инсон яратган барча ажойиботларга.

¹⁷Ҳа, ерга урилади ўша одамзод фахри, Паст бўлади инсоннинг юксаклиги! Ёлғиз Худо ўша куни юксалади!

¹⁸Беҳуда бутлар тамомила йўқ бўлиб кетади.

¹⁹Эгамиз қўзғалганда Ерни ларзага солай, дея Инсон кириб кетар қоялардаги ғорларга Эгамиздан қўрққанидан, Кириб кетар ердаги чуқурларга Унинг буюк улуғворлигидан.

²⁰Одам, ўзим сажда қилай, деб ясаган Олтину кумуш бутларини Берар ўша куни юмронқозиқ Ҳамда кўршапалакларга.

²¹Ҳа, Эгамиз қўзғалганда Ерни ларзага солай, дея Инсон қоялардаги ғорларга кирар Эгамиздан қўрққанидан, Чўққиларнинг ёриқларига яширинар Унинг буюк улуғворлигидан.

²²Энди узоқда юринг Тупроқдан яратилганлардан. Борми уларнинг бирон қиймати?!