Михо 2:1-13 UZV2013 - Bible AI

²Сизлар бировнинг экинзорига кўз олайтириб, Уни тортиб оласиз. Бировнинг уйини ёқтириб қолиб, Уни ўзингизники қилиб оласиз. Бирини ўз уйидан, Бошқасини — мерос қилиб олган еридан маҳрум этасиз.

³Шу сабабдан Эгамиз демоқда: “Мен сизларга қарши фалокатни режа қиляпман. Сизлар бўйинтуруқдан қочиб қутулолмайсиз, Бурнингизни осмонга кўтариб юрмайсиз. Бу оғир дамлар бўлади.”

⁴Ўша вақт келганда Oдамлар сизларни масхара қилишади, Сиз ҳақингизда шундай аччиқ марсия куйлашади: “Биз меросимиздан маҳрум бўлдик! Далаларимиз ёвларга бўлиб берилди. Энди биз бутунлай хароб бўлдик!”

⁵Шундай экан, Эгамизнинг халқи қайтадан бўлганда юртни, Улуш қилиб олмайсиз сиз бир парча ерни.

⁶Сизлар менга ақл ўргатиб деяпсиз: “Бизга ақл ўргатма! Нафасингни иссиқ қил, Биз шарманда бўлмаймиз.”

⁷Эй Ёқуб насли, сизлар айтасиз: “Наҳотки, Эгамизнинг сабри тугаган бўлса?! Наҳотки, Худо шундай ишларни қилса?!” Бу сўзларни айтишингиз жоизми?! Ахир, Худонинг сўзлари тўғри одамга яхшилик келтиради–ку!

⁸Эгамиз демоқда: “Сизлар ўз халқингизга зулм қилдингиз! Жангдан хотиржам қайтган одамни пойладингиз, Унинг эгнидаги тўнини тортиб олдингиз.

⁹Халқимнинг аёлларини шинам уйларидан чиқариб юбордингиз, Ёш болаларнинг насибасини Менинг юртимдан уздингиз.

¹⁰Қани туринглар, кетинглар бу ердан! Ором топа олмайсиз энди бу юртда! Ахир, қилган гуноҳларингиз юртимни ҳаром қилди, Унинг хароб бўлишига сабабчи бўлди.

¹¹Борди–ю, олдингизга ёлғончи одам келса, — Шароб, бўзадан ваъз айтаман, — деб айтса, Сизлар уни пайғамбар дея қабул қиласиз!

¹²Эй Ёқуб насли, Мен сизларни албатта йиғаман, Эй Исроилнинг омон қолганлари, Мен сизларни тўплаб оламан. Қўрадаги қўйлардай, яйловдаги сурувдай, Сизларни Мен бир жойга йиғаман. Ўшанда юртингиз одамларга тўлиб–тошади.

¹³Мен Йўлбошчингиз бўлиб, сизларга йўл очаман, Сизларни асирликдан олиб чиқаман. Сизлар шаҳар дарвозасидан чиқиб кетасиз. Мен, Шоҳингиз сизларни бошлаб бораман. Мен, Эгангиз олдинда юраман.”