Саҳрода 1:1-54 UZV2013 - Bible AI

¹Исроил халқи Миср юртини тарк этиб [1], Синай саҳросига келганига икки йилу икки ой бўлди. Иккинчи ойнинг [2] биринчи кунида Эгамиз Учрашув чодирида Мусога шундай деди:

²[2-3] “Сен ва Ҳорун жамики Исроил халқини уруғи, хонадони бўйича санаб чиқинглар. Урушга яроқли бўлган йигирма ва ундан юқори ёшдаги ҳамма эркакларни гуруҳларга бўлиб, номма–ном рўйхатини тузинглар.

⁴Ҳар бир қабиладан биттадан уруғбоши сизларга ёрдам берсин.

⁵Сизларга ёрдам берадиган уруғбошиларнинг исми қуйидагичадир:

⁵Рубен қабиласидан — Шадувор ўғли Элизур.

⁶Шимўн қабиласидан — Зуришадай ўғли Шалумиёл.

⁷Яҳудо қабиласидан — Оминадов ўғли Нахшўн.

⁸Иссахор қабиласидан — Зувор ўғли Натанил.

⁹Забулун қабиласидан — Халон ўғли Элиёб.

¹⁰Юсуф ўғли Эфрайим қабиласидан — Омиҳуд ўғли Элишама. Юсуф ўғли Манаше қабиласидан — Падозур ўғли Гамалиэл.

¹¹Бенямин қабиласидан — Гидўнах ўғли Авидон.

¹²Дан қабиласидан — Омишадай ўғли Охазар.

¹³Ошер қабиласидан — Охрон ўғли Пахиёл.

¹⁴Гад қабиласидан — Дувел ўғли Элиасаф.

¹⁵Нафтали қабиласидан — Энан ўғли Охир.”

¹⁶Жамоа орасидан танланган ана шу уруғбошилар Исроил қабилаларининг йўлбошчилари эди.

¹⁷[17-19] Мусо ва Ҳорун уруғбошилар билан биргаликда иккинчи ойнинг [3] биринчи кунида бутун жамоани йиғишди. Улар Исроил халқининг барча уруғларини ва хонадонларини аниқлаб чиқишди. Сўнг Мусога Эгамиз амр этгандай, жамоанинг йигирма ва ундан юқори ёшдаги ҳамма эркакларини номма–ном алоҳида рўйхатга олишди. Шу тариқа Мусо Синай саҳросида Исроил халқини санаб чиқди.

²⁰[20-21] Уруғи ва хонадони бўйича номма–ном рўйхатга олинган, йигирма ва ундан юқори ёшдаги урушга яроқли эркакларнинг сони [4] қуйидагича эди:
Исроилнинг [5] тўнғич ўғли Рубен қабиласидан — 46.500 та одам,

²²[22-23] Шимўн қабиласидан — 59.300 та одам,

²⁴[24-25] Гад қабиласидан — 45.650 та одам,

²⁶[26-27] Яҳудо қабиласидан — 74.600 та одам,

²⁸[28-29] Иссахор қабиласидан — 54.400 та одам,

³⁰[30-31] Забулун қабиласидан — 57.400 та одам,

³²[32-33] Юсуф ўғли Эфрайим қабиласидан — 40.500 та одам,

³⁴[34-35] Юсуф ўғли Манаше қабиласидан — 32.200 та одам,

³⁶[36-37] Бенямин қабиласидан — 35.400 та одам,

³⁸[38-39] Дан қабиласидан — 62.700 та одам,

⁴⁰[40-41] Ошер қабиласидан — 41.500 та одам,

⁴²[42-43] Нафтали қабиласидан — 53.400 та одам.

⁴⁴Мусо, Ҳорун ва Исроил халқининг ўн икки уруғбошиси санаб чиққан одамлар ана шулар эдилар. Уларнинг ҳаммаси ота–боболарининг насли бўйича рўйхатга олинди.

⁴⁵Хуллас, Исроил халқининг йигирма ва ундан юқори ёшдаги урушга яроқли ҳамма эркаклари хонадонлари бўйича саналганда,

⁴⁶603.550 та чиқди.

⁴⁷Леви қабиласи эса рўйхатга киритилмаган эди,

⁴⁸чунки Мусога Эгамиз шундай деганди:

⁴⁹“Леви қабиласини рўйхатга киритма, уларни Исроил халқи билан бирга санама.

⁵⁰Левиларга Муқаддас аҳд чодирини [6], унинг ҳамма ашёларини ва чодирга тегишли бўлган барча нарсаларни топшир. Йўлга чиққанларингизда, улар чодирни ва ундаги ҳамма ашёларни кўтариб юрсинлар. Чодирни асраб–авайлаб, унинг ёнига ўз чодирларини тиксинлар.

⁵¹Ҳар сафар чодир кўчирилганда, левилар Муқаддас чодирни йиғишсин. Қароргоҳ қурганингизда эса чодирни яна ўрнатишсин. Чодирнинг яқинига борган бошқа ҳар қандай одам учун жазо ўлимдир.

⁵²Қолган Исроил қабилалари ўз қароргоҳларида гуруҳ–гуруҳ бўлиб жойлашсин.

⁵³Исроил халқи Менинг қаҳр–ғазабимга учрамаслиги учун, левилар ўз чодирларини Муқаддас аҳд чодири атрофида ўрнатиб, ўша ерда чодирни қўриқлашсин.”

⁵⁴Мусога Эгамиз қандай амр этган бўлса, Исроил халқи шуни қилди.