Саҳрода 10:1-36 UZV2013 - Bible AI

¹Эгамиз Мусога айтди:

²“Сен иккита кумуш карнай ясаттир, карнайлар зарб уриб ясалган бўлсин. Бу карнайлар жамоани йиғиш ҳамда йўлга чиқиш вақтини эълон қилиш учун керак бўлади.

³Карнайларнинг иккаласи чалинганда, бутун жамоа сенинг олдингга — Учрашув чодири киравериши олдига тўплансин.

⁴Карнайнинг биттаси чалинганда эса, Исроил қабилаларининг йўлбошчилари сенинг олдингга йиғилиб келишсин.

⁵Карнай қисқа чалинганда, шарқдаги қароргоҳда турган қабилалар йўлга чиқишсин.

⁶Иккинчи марта қисқа чалинганда эса, жанубдаги қароргоҳда турган қабилалар йўлга чиқишсин. Карнайнинг қисқа садоси йўлга чиқиш кераклигини билдиради [1].

⁷Жамоани йиғиш лозим бўлганда эса, карнайлар бошқача садо чиқариб чалинсин.

⁸Карнайни Ҳоруннинг ўғиллари, руҳонийлар чалишлари лозим. Бу амр сизлар учун ва сизларнинг авлодларингиз учун доимий қонун–қоидадир.

⁹Юртингизга бостириб келган душманга қарши жангга отланаётганингизда, хатардан дарак бериб карнайларни чалинглар. Шунда Мен, Эгангиз Худо, сизларга ёрдам бериб, сизларни душманларингиз қўлидан халос қиламан.

¹⁰Шунингдек, хурсандчилик кунларингизда — белгиланган байрамларингизда ва ой бошида қурбонликлар куйдирганингизда ҳамда тинчлик қурбонликларини келтирганингизда карнайларни чалинглар. Шунда Мен, Эгангиз Худо, сизларга ёрдам бераман. Зотан, Мен Эгангиз Худоман.”

¹¹Исроил халқи Мисрдан чиққандан кейин иккинчи йилнинг иккинчи ойи [2] йигирманчи кунида булут Муқаддас аҳд чодири [3] тепасидан кўтарилди.

¹²Шундан сўнг Исроил халқи Синай саҳросидан сафарга чиқди [4]. Ниҳоят, булут Порон саҳросида [5] тўхтади.

¹³Улар биринчи марта Эгамизнинг Мусо орқали берган амрига кўра, йўлга чиққан эдилар.

¹⁴Биринчи бўлиб, Оминадов ўғли Нахшўн бошчилигида Яҳудо қароргоҳида турган қабилалар ўз байроғи остида гуруҳ–гуруҳ бўлиб йўлга чиқишди.

¹⁵Иссахор қабиласига Зувор ўғли Натанил бошчилик қилар эди.

¹⁶Забулун қабиласига Халон ўғли Элиёб бошчилик қилар эди.

¹⁷Шундан кейин Муқаддас чодир йиғиштириб олинди. Гершон ва Марори уруғлари чодирни кўтариб, йўлга чиқишди.

¹⁸Кейин Шадувор ўғли Элизур бошчилигида Рубен қароргоҳида турган қабилалар ўз байроғи остида гуруҳ–гуруҳ бўлиб йўлга чиқишди.

¹⁹Шимўн қабиласига Зуришадай ўғли Шалумиёл бошчилик қилар эди.

²⁰Гад қабиласига Дувел ўғли Элиасаф бошчилик қилар эди.

²¹Кейин чодирнинг муқаддас ашёларини кўтарган Қоҳот уруғи йўлга чиқди. Улар қароргоҳ қуриладиган жойга етиб боргунларича, Муқаддас чодир ўрнатиб бўлиниши керак эди.

²²Кейин Омиҳуд ўғли Элишама бошчилигида Эфрайим қароргоҳида турган қабилалар ўз байроғи остида гуруҳ–гуруҳ бўлиб йўлга чиқишди.

²³Манаше қабиласига Падозур ўғли Гамалиэл бошчилик қиларди.

²⁴Бенямин қабиласига Гидўнах ўғли Авидон бошчилик қиларди.

²⁵Энг охирида Омишадай ўғли Охазар бошчилигида Дан қароргоҳидаги қабилалар ўз байроғи остида гуруҳ–гуруҳ бўлиб йўлга чиқишди. Улар Исроил қароргоҳларининг қоровуллар бўлинмасини ташкил қилишган эди.

²⁶Ошер қабиласига Охрон ўғли Пахиёл бошчилик қиларди.

²⁷Нафтали қабиласига Энан ўғли Охир бошчилик қиларди.

²⁸Исроил халқи доим шу тартибда гуруҳ–гуруҳ бўлиб йўлга чиқар эди.

²⁹Мусо ўзининг қайнағаси, Мидиёнлик Ятро [6] ўғли Хўвовга деди: — Эгамиз, сизларга бераман, деб ваъда қилган юртга биз кетяпмиз, сиз ҳам биз билан юринг. Эгамиз бизга кўп яхшиликларни ваъда қилган, агар биз билан борсангиз, биз ҳам сизга яхшилик қиламиз.

³⁰— Бормайман, — деди Хўвов, — мен ўз юртимга — ўзимнинг қариндошларим олдига қайтиб кетаман.

³¹— Илтимос, бизни ташлаб кетманг! — деди унга Мусо. — Саҳронинг қайси жойига чодир тикиш кераклигини сиз биласиз. Сиз бизнинг кўзимиз бўласиз.

³²Агар биз билан бирга борсангиз, Эгамиз бизга қилган ҳамма яхшиликларни сиз билан баҳам кўрамиз.

³³Улар Эгамизнинг муқаддас тоғини [7] тарк этганларидан сўнг, уч кун йўл юришди. Чодир тикадиган жойни топиш учун Эгамизнинг аҳд сандиғи доимо олдинда борарди.

³⁴Улар кундуз куни йўл юрганларида, Эгамизнинг булути уларнинг устида борар эди.

³⁵Сандиқ йўлга чиққанда, Мусо шундай дерди:
Сенинг ғанимларинг тумтарақай бўлсин. Сени кўролмаганлар олдингдан қочиб кетсин.”

³⁵“Қўзғал, эй, Эгам,

³⁶Аҳд сандиғи тўхтаганда эса Мусо шундай дерди:
Минг–минглаб Исроил халқи орасига!”

³⁶“Қайт, эй, Эгам,