Саҳрода 12:1-15 UZV2013 - Bible AI

¹Мусо Ҳабашистонлик [1] аёлга уйлангани учун, Марям ва Ҳорун Мусога қарши гапирдилар.

²Иккови: “Эгамиз ёлғиз Мусо орқали гапирибдими?! У биз орқали ҳам гапирмаганми?!” дейишди. Эгамиз уларнинг бу гапини эшитди.

³Мусо жуда камтар одам эди, ер юзида камтарликда унга тенг келадигани йўқ эди.

⁴Эгамиз бирдан Мусо, Ҳорун ва Марямга: — Учовингиз ҳам Учрашув чодирига келинглар! — деб амр берди. Шундан сўнг учовлари Учрашув чодирига келишди.

⁵Эгамиз устун шаклидаги булутда тушиб, чодирга кираверишда турди ва Ҳорун билан Марямни чақирди. Иккови олдинга чиқди.

⁶Эгамиз уларга деди:

⁶— Менинг сўзларимни эшитиб олинглар. Орангизда пайғамбар бўлганда, Мен, Эгангиз, Ўзимни уларга ваҳийда аён қиламан, улар билан тушларида гаплашаман.

⁷Лекин қулим Мусо билан бошқача гаплашаман. Менинг бутун халқим орасида ишончлиси Мусодир [2].

⁸Мен у билан жумбоқли башоратлар орқали эмас, балки юзма–юз, очиқ–ойдин гаплашаман. Мусо Мен, Эгангизнинг шарпасини кўради. Наҳотки сизлар Менинг қулим Мусога қарши гапиришдан қўрқмадингизлар?!

⁹Эгамиз улардан қаттиқ ғазабланиб, узоқлашди.

¹⁰Булут чодир тепасидан кетиши биланоқ, Марям тери касаллигига [3] чалиниб, қордай оппоқ бўлиб қолди. Ҳорун буни кўриб,

¹¹Мусога ёлворди:

¹¹— Эй, ҳазратим, биз аҳмоқлик қилиб қўйдик! Ўтинаман, гуноҳимиздан ўтинг!

¹²Марям она қорнидаёқ чирий бошлаган ўлик чақалоққа ўхшаб қолмасин!

¹³Шунда Мусо Эгамизга илтижо қилиб: — Эй, Худо, унга шифо бер! — деб ёлворди.

¹⁴Эгамиз эса Мусога шундай жавоб берди:

¹⁴— Агар Марямнинг ўз отаси унинг юзига тупурганда, у етти кун шарманда бўлиб юрмасмиди?! Марямни қароргоҳдан чиқариб юборинглар, у етти кундан кейингина қароргоҳга қайтиб келиши мумкин.

¹⁵Шундай қилиб, Марям қароргоҳдан ҳайдаб чиқарилди. У етти кун қароргоҳдан ташқарида бўлди. У қайтиб келмагунча халқ йўлга чиқмай турди.