Саҳрода 31:1-54 UZV2013 - Bible AI

¹Эгамиз Мусога айтди:

²— Исроил халқи учун Мидиёнлардан қасос ол [1]. Шундан кейин сен оламдан кўз юмасан.

³Шундан кейин Мусо халққа айтди: — Одамларингизнинг бир қисмини қуроллантиринглар. Улар Мидиён халқи билан жанг қилиб, улардан Эгамизнинг қасосини олишсин.

⁴Ҳар бир Исроил қабиласидан мингтадан одамни урушга жўнатинглар.

⁵Ҳар бир Исроил қабиласидан мингтадан одам танлаб олинди, жами ўн икки минг одам қуролланиб жангга шай бўлди.

⁶Мусо уларни ва улар билан бирга Элазар ўғли руҳоний Финхазни урушга жўнатди. Финхаз ўзи билан муқаддас ашёларни [2] ва карнайларни олиб кетди. Бу карнайлар хатардан дарак бериш учун чалинарди.

⁷Эгамиз Мусога амр қилгандай, Исроил сипоҳлари Мидиёнлар билан жанг қилишди. Улар Мидиён халқининг бутун эркак зотини қириб ташлашди.

⁸Мидиён халқининг бешала шоҳини — Эви, Рахем, Зур, Хур, Рабани ҳам бошқалар қатори ўлдириб юборишди. Бавўр ўғли Баломни ҳам қиличдан ўтказишди [3].

⁹Мидиён халқининг аёлларию болаларини асир қилиб, жамики подаларини, сурувларини ва мол–мулкини ўлжа қилиб олишди.

¹⁰Мидиён халқи истиқомат қилган ҳамма шаҳару қароргоҳларга ўт қўйишди.

¹¹Олган ҳамма ўлжаларини — одамидан тортиб молигача

¹²қароргоҳга — Мусо, руҳоний Элазар ва Исроил жамоаси ҳузурига олиб келишди. Қароргоҳ Мўаб текислигида, Ерихо шаҳри рўпарасидаги Иордан дарёси бўйида жойлашган эди.

¹³Мусо, руҳоний Элазар ва жамоанинг ҳамма йўлбошчилари уларни кутиб олиш учун қароргоҳдан ташқарига чиқишди.

¹⁴Мусо урушдан қайтиб келган мингбоши ва юзбошилардан қаттиқ ғазабланди.

¹⁵— Нимага ҳамма аёлларни тирик қолдирдингиз? — деб сўради улардан Мусо.

¹⁶— Баломнинг маслаҳати билан Пиёр тоғида [4] Исроил халқини Эгамизга хиёнат қилишга ундаган шулар–ку! Ўшаларнинг дастидан Эгамизнинг жамоаси орасида ўлат пайдо бўлган эди!

¹⁷Қани, бўлинглар, ҳамма ўғил болаларни ва эр кўрган аёлларни ўлдиринглар.

¹⁸Фақат эр кўрмаган қизларни ўзингиз учун тирик қолдиринглар.

¹⁹Сўнг етти кун давомида қароргоҳдан ташқарида бўлинглар. Қайси бирингиз одам ўлдирган ёки жасадга қўл теккизган бўлсангиз, учинчи ва еттинчи кунлари покланинглар. Сизлар билан бирга асирлар ҳам покланишсин.

²⁰Ҳамма кийимларни, барча чарм ва ёғоч буюмларни, эчки жунидан тўқилган ҳамма нарсаларни покланглар.

²¹Руҳоний Элазар урушга борган сипоҳларга айтди: — Мусога Эгамиз амр этган қонун шундан иборат:

²²олтин, кумуш, бронза, темир, қалай ва қўрғошин

²³— оловда ёнмайдиган ҳамма нарсаларни оловдан ўтказиб покланглар. Бундан ташқари, покланиш суви [5] билан ҳам покланглар. Оловда ёнадиган буюмларни эса сувнинг ўзи билан покланглар.

²⁴Еттинчи куни кийимларингизни ювинглар. Шунда пок бўласизлар. Кейин қароргоҳга кирсангиз бўлади.

²⁵Эгамиз яна Мусога айтди:

²⁶— Сен, руҳоний Элазар ва жамоанинг уруғбошилари асир олинган одамларни, ўлжа олинган ҳайвонларни ҳисоблаб чиқинглар.

²⁷Асиру ўлжаларни тенг икки қисмга бўлиб, бир қисмини урушга борган сипоҳларга, иккинчи қисмини бутун жамоага беринглар.

²⁸Урушга борган сипоҳлар улушидан Мен, Эгангиз, учун улуш ажратинглар. Асирлар, мол, эшак, қўй ва эчкиларнинг ҳар беш юзтасидан биттасини Менга улуш қилиб беринглар.

²⁹Сипоҳлардан олинган бу улушни Менга назр қилиб, руҳоний Элазарга беринглар.

³⁰Халққа тегишли бўлган ўлжанинг иккинчи қисмидан Муқаддас чодир учун масъул бўлган левиларга улуш беринглар. Асирлар, мол, эшак, қўй ва эчкиларнинг ҳар элликтасидан биттаси левиларга берилсин.

³¹Мусо билан руҳоний Элазар Эгамизнинг Мусога берган амрини адо этишди.

³²Сипоҳлар қўлга киритган нарсалардан ташқари ўлжа қилиб олган мол–ҳол ва аёлларнинг умумий сони қуйидагича эди:
қўй–эчкилар — 675.000 та,

³³моллар — 72.000 та,

³⁴эшаклар — 61.000 та,

³⁵эр кўрмаган қизлар — 32.000 та.

³⁶Ўлжанинг урушга борган сипоҳларга тегишли қисми қуйидагича эди:

³⁶қўй–эчкилар — 337.500 та,

³⁷шулардан 675 та қўй–эчки Эгамизнинг улушидир,

³⁸моллар — 36.000 та, шулардан 72 таси Эгамизнинг улушидир,

³⁹эшаклар — 30.500 та, шулардан 61 таси Эгамизнинг улушидир,

⁴⁰эр кўрмаган қизлар — 16.000 та, шулардан 32 таси Эгамизнинг улушидир.

⁴¹Эгамиз Мусога амр қилгандай, Мусо Эгамизга ажратилган улушни назр сифатида руҳоний Элазарга берди.

⁴²Мусо Исроил халқи учун сипоҳларнинг ўлжасидан ажратиб олган қисм қуйидагилардан иборат эди:

⁴³қўй–эчкилар — 337.500 та,

⁴⁴моллар — 36.000 та,

⁴⁵эшаклар — 30.500 та,

⁴⁶эр кўрмаган қизлар — 16.000 та.

⁴⁷Исроил халқи улуш қилиб олган одаму ҳайвонларнинг ҳар элликтасидан биттасини Мусо Эгамизнинг Муқаддас чодири учун масъул бўлган левиларга берди. Эгамиз Мусога қандай амр қилган бўлса, Мусо шуни қилди.

⁴⁸Шундан сўнг мингбоши ва юзбошилар Мусонинг ҳузурига келишди.

⁴⁹Улар Мусога:

⁴⁹— Биз, қулларингиз, қўлимиз остидаги сипоҳларни санаб чиқдик, — дейишди, — биронта одамимизни йўқотмабмиз.

⁵⁰Ўзимизни Эгамиз ҳукмидан ҳимоя қилиш учун [6], биз топган олтин буюмларимизни — билагузуклар, муҳр узуклар, сирғалар ва зебигардонларимизни Эгамизга назр қилиб олиб келдик.

⁵¹Мусо билан руҳоний Элазар улар олиб келган ҳамма олтин зеб–зийнатларни олишди.

⁵²Мингбоши ва юзбошилар Эгамизга назр қилган олтиннинг умумий оғирлиги ўн икки пудга яқин [7] чиқди.

⁵³Оддий сипоҳлар эса қўлга киритган ўлжаларни ўзларига қолдирган эдилар.

⁵⁴Исроил халқини Эгамиз доим эсида тутиши учун, Мусо билан руҳоний Элазар мингбоши ва юзбошилардан олган олтин буюмларни Учрашув чодирига олиб келишди.