Тимўтийга 1чи 2:1-15 UZV2013 - Bible AI

¹Авваламбор, насиҳатим шуки, бутун инсоният учун илтижо қилинглар, тоат–ибодатда бўлиб, дуолар ўқинглар, шукроналар айтинглар.

²Тақводор, обрў–эътиборли, осойишта, сокин ҳаёт кечиришимиз учун, ҳукмдорлару бошлиқлар учун ибодат қилинглар.

³Бу хайрли иш бўлиб, Нажоткоримиз Худога мақбулдир.

⁴У ҳамма инсонларнинг нажот топишларини ва ҳақиқатни билиб олишларини истайди.

⁵Зеро, ҳаммамизга маълумки:
Худо билан инсонлар орасидаги Воситачи ҳам ягонадир. Бу Воситачи Исо Масиҳдир. У Ўзи инсон эди

⁵Худо ягонадир,

⁶Ва бутун инсониятни қутқариш учун Ўз жонини фидо қилди. Шу орқали Худо Ўзи белгилаган пайтда нажот режасини аён этди.

⁷Мен нажот ҳақидаги бу хабарни эълон қилувчи ҳаворий этиб тайинландим. Тўғрисини айтяпман, ёлғон гапираётганим йўқ! Ҳақиқатдан ҳам, мен турли халқларга имон ва ҳақиқатни ўргатиш учун юборилганман.

⁸Сизлар йиғилганингизда, орангиздаги эркаклар қўлларини дуога очиб, чин қалбдан ибодат қилсинлар. Ҳеч кимдан ғазабланмасинлар, талашиб–тортишмасинлар.

⁹Хотинлар соддагина, дид билан кийинсинлар. Улар сочига ортиқча оро бермай, олтин ва марварид тақинчоқлар ёки қимматбаҳо кийимлар билан эмас, балки ор–номус билан безансинлар.

¹⁰Художўй хотинларга муносиб хайрли ишлар билан ўзларига зеб берсинлар.

¹¹Таълим берилаётганда хотинлар сукут сақласин, муаллимнинг гапини икки қилмасин.

¹²Хотин эркакка таълим беришига ва унинг устидан ҳукмронлик қилишига рухсат бермайман. Хотин сукут сақласин.

¹³Ахир, олдин Момо Ҳаво эмас, балки Одам Ато яратилган–ку.

¹⁴Одам Ато эмас, хотин шайтонга алданиб, гуноҳ қилди.

¹⁵Ўшандан буён, хотинлар туққанда лаънат туфайли дарду азоб чекадиган бўлдилар. Бироқ шунга қарамай, агар улар камтару бамаъни бўлишса, Масиҳга бўлган имонда собит қолиб, меҳр–оқибатли бўлиб, тақводор ҳаёт кечиришса, нажот топадилар.