1 Солномалар 27:1-34 UZV2013 - Bible AI

¹Қуйида Исроил халқининг уруғбошилари, мингбошилари ва юзбошиларининг, шунингдек, уларнинг сардорлари рўйхати берилган. Бу сардорлар шоҳнинг хизматида бўлиб, ҳар йили бир ой давомида вазифасини ўтаётган ҳарбий қисмлар учун масъул эдилар. Ҳар бир қисм 24.000 одамдан ташкил топган эди.

²Биринчи ойда хизмат қиладиган қисмнинг сардори Забдиёл ўғли Ёшувам эди.

³Ёшувам Параз наслидан эди.

⁴Иккинчи ойда хизмат қиладиган қисмнинг сардори Охўва уруғидан бўлган Дўдай эди. Дўдайнинг ўнг қўл ёрдамчиси Михлўт эди.

⁵Учинчи ойда хизмат қиладиган қисмнинг сардори Бинаё эди. У руҳоний Ёҳайидонинг ўғли бўлиб,

⁶“Ўттизта қаҳрамон” орасидаги баҳодир жангчи эди. “Ўттизта қаҳрамон”нинг сардори ҳам ана шу Бинаё эди. Бинаёнинг ўғли Омизабод қисмнинг бош қўмондони эди.

⁷Тўртинчи ойда хизмат қиладиган қисмнинг сардори Йўабнинг укаси Осойил эди. Осойилдан кейин ўғли Забадиё отасининг ўрнини эгаллади.

⁸Бешинчи ойда хизмат қиладиган қисмнинг сардори Шамҳут эди. У Йизро уруғидан эди.

⁹Олтинчи ойда хизмат қиладиган қисмнинг сардори Тахувалик Ихеш ўғли Эро эди.

¹⁰Еттинчи ойда хизмат қиладиган қисмнинг сардори Палонлик Халез эди. У Эфрайим қабиласидан эди.

¹¹Саккизинчи ойда хизмат қиладиган қисмнинг сардори Хушалик Сиббахай эди. Сиббахай Зерах уруғидан эди.

¹²Тўққизинчи ойда хизмат қиладиган қисмнинг сардори Онотўтлик Абуазар эди. Абуазар Бенямин қабиласидан эди.

¹³Ўнинчи ойда хизмат қиладиган қисмнинг сардори Натуфолик Махрай эди. Махрай Зерах уруғидан эди.

¹⁴Ўн биринчи ойда хизмат қиладиган қисмнинг сардори Пиратонлик Бинаё эди. Бинаё Эфрайим қабиласидан эди.

¹⁵Ўн иккинчи ойда хизмат қиладиган қисмнинг сардори Натуфолик Халдай эди. Халдай Ўтниёл уруғидан эди.

¹⁶Исроил қабилаларининг йўлбошчилари қуйидагилар эди:
Рубен қабиласининг йўлбошчиси — Зихри ўғли Элиазар, Шимўн қабиласининг йўлбошчиси — Махо ўғли Шафатиё,

¹⁷Леви қабиласининг йўлбошчиси — Камувол ўғли Хашавиё, Ҳорун наслининг йўлбошчиси — Зодўх,

¹⁸Яҳудо қабиласининг йўлбошчиси — Довуднинг акаси Элиху, Иссахор қабиласининг йўлбошчиси — Микойил ўғли Омри,

¹⁹Забулун қабиласининг йўлбошчиси — Ободиё ўғли Йишмаё, Нафтали қабиласининг йўлбошчиси — Озриёл ўғли Яримўт,

²⁰Эфрайим қабиласининг йўлбошчиси — Озазиё ўғли Хўшея, Ғарбдаги Манаше қабиласининг ярмига йўлбошчи — Подиё ўғли Йўэл,

²¹Гиладдаги Манаше қабиласининг ярмига йўлбошчи — Закариё ўғли Эддо, Бенямин қабиласининг йўлбошчиси — Абнур ўғли Ясиёл,

²²Дан қабиласининг йўлбошчиси — Ерохам ўғли Озариёл.
Исроил қабилаларининг йўлбошчилари ана шулардан иборат эди.

²³Довуд Исроил халқини санаб чиққанда, йигирма ёшдан пастини рўйхатга киритмаган эди, чунки Эгамиз: “Исроил халқини осмондаги юлдузлар каби кўпайтираман”, деб ваъда берган эди.

²⁴Зеруя ўғли Йўаб халқни санашни бошлагандию, лекин охирига етказмаганди. Халқ саналгани учун Эгамиз Исроилга ғазабини сочганди. Шу сабабдан бу саноқнинг натижаси шоҳ Довуднинг йилномасига киритилмади.

²⁵Одил ўғли Озмобит сарой хазинабони эди. Уззиё ўғли Йўнатан туман хазинабони эди. У шаҳар атрофидаги, шаҳарлардаги, қишлоқлардаги ва қалъалардаги хазиналар учун масъул эди.

²⁶Халуб ўғли Эзри ерга ишлов берадиган деҳқонлар учун масъул эди.

²⁷Рамалик Шимах узумзорлар учун масъул эди. Шафомлик Забди шароб омборлари учун масъул эди.

²⁸Гедерлик Баалханон Яҳудо қир этакларидаги зайтунзорлар ва шикамора–анжирзорлар учун масъул эди. Йўш зайтун мойи омборлари учун масъул эди.

²⁹Шаронлик Шитрай Шарон текислигида боқиладиган подалар учун масъул эди. Адлай ўғли Шофот водийларда боқиладиган подалар учун масъул эди.

³⁰Исмоил уруғидан Обил туя подалари учун масъул эди. Миронўтлик Ёхидаё эшак подалари учун масъул эди.

³¹Ҳожар уруғидан Ёзиз қўй сурувлари учун масъул эди.
Ана шуларнинг ҳаммаси шоҳ Довуд мулкини назорат қилар эдилар.

³²Довуднинг амакиси Йўнатан донишманд одам бўлиб, маслаҳатчи ва тафсирчи эди. Хахмўн ўғли Ёхиёл шоҳ ўғилларининг мураббийси эди.

³³Охитўфел шоҳнинг маслаҳатчиси эди. Орх уруғидан Хушай шоҳнинг дўсти эди.

³⁴Охитўфелдан кейин унинг ўрнига Бинаё ўғли Ёҳайидо ва Абуатар маслаҳатчи бўлди. Йўаб шоҳ қўшинининг лашкарбошиси эди.