2 Шоҳлар 23:1-39 UZV2013 - Bible AI

¹Эссай ўғли Довуднинг сўзлари. Довудни Худо юксалтиргандир, Ёқубнинг Худоси мой суртиб, танлаб шоҳ қилган уни, Довуд Исроилнинг суюкли қўшиқчиси бўлгандир. Довуднинг охирги сўзлари қуйидагилардир:

²“Эгамнинг Руҳи мен орқали гапирган, Тилимда тайёрдир Унинг каломи.

³Исроил халқининг Худоси мен орқали сўзлаган, Исроилнинг ишонган қояси [1] менга айтган: “Инсонларни адолат билан бошқараётган, Худодан қўрқиб шоҳлик қилаётган инсон

⁴Бамисоли тонг шафағидир, Мусаффо тонгда нур сочаётган қуёш кабидир, Нурлари ёмғирдан сўнг тупроқда майса ундирар.”

⁵Хонадоним Худо олдида шундай эмасми?! Чунки У мен билан то абад мустаҳкам бўладиган, Ҳар томонлама ишончли, бузилмас бир аҳд тузган. Албатта ғолиб бўлишим учун, ҳар қандай тилагимга етишим учун, У шак–шубҳасиз менга мадад беради.

⁶Шаккоклар улоқтирилажак тикон кабидир, Чунки уларни қўл билан ушлаб бўлмас.

⁷Тиконларни ушлаш учун киши Темир асбоб ёки найзанинг сопини теккизар, Тиканзорга ўт қўйиб кулини кўкка совурар.”

⁸Довуднинг баҳодир жангчилари исми қуйидагича: биринчиси — Хахмўн уруғидан Ёшувам. У “Учта қаҳрамон”нинг [2] сардори эди. У найзаси билан саккиз юз кишига ҳужум қилиб, ҳаммасини бир жангда ўлдирган эди [3].

⁹“Учта қаҳрамон”дан иккинчиси Охўва уруғидан Дўдў ўғли Элазар эди. У жанг қилиш учун тўпланган Филистларни Довуд билан бирга мағлуб қилган эди. Исроил лашкари у пайтда чекинган эди.

¹⁰Лекин Элазар жойида тураверди, чекинмади. Қўли толиқиб, увишиб қолгунча Филистларни ўлдирди. Ўша куни Эгамиз уни улуғ зафарга эриштирди. Сўнгра Исроил лашкари фақат ҳалок бўлганларни талон–тарож қилиш учун Элазарнинг орқасидан борди.

¹¹“Учта қаҳрамон”дан учинчиси Харорлик Агей ўғли Шаммох эди. Филистлар Лехидаги бир ясмиқзор [4] ёнига йиғилиб келганда, Исроил лашкари уларнинг олдига тушиб қочишган эди.

¹²Лекин Шаммох ясмиқзорнинг ўртасида турганича, ўша ерни ҳимоя қилди ва Филистларни тор–мор қилди. Эгамиз уни ҳам улуғ зафарга эриштирди.

¹³Ўрим–йиғим пайтида ўша учаласи (улар “Ўттизта қаҳрамон” [5] гуруҳи таркибига кирар эдилар) [6] Довуднинг ёнига — Адуллам ғорига кетдилар [7]. Рафа сойлигида [8] Филистлар лашкари қароргоҳ қурган эди.

¹⁴Бу пайтда Довуд ўзининг адирдаги қароргоҳида эди. Битта Филист қўнолғаси эса Байтлаҳмда жойлашган эди.

¹⁵Довуд ҳасрат билан:

¹⁵— Қанийди бирортаси Байтлаҳм дарвозасининг ёнидаги қудуқдан менга сув олиб келиб берса! — деди.

¹⁶Ўша учта қаҳрамон Филистлар қароргоҳини ёриб ўтишди–да, Байтлаҳмдаги дарвозанинг ёнидаги қудуқдан сув тортиб, Довудга олиб келишди. Лекин Довуд сувни ичмай, ерга тўкиб, Эгамизга бағишлади.

¹⁷— Эй, Эгам! — деб хитоб қилди. — Бундай қилишдан мени Ўзинг асра! Шу йигитларнинг қонини ичайми? Ахир, улар жонини хавф–хатарга қўйиб сув олиб келгани боришди–ку! Шунинг учун ҳам Довуд сувни ичишни истамади. “Учта қаҳрамон” ана шундай жасурлик кўрсатишган эди.

¹⁸Йўабнинг акаси Абушай “Ўттизта [9] қаҳрамон”нинг сардори эди. Абушай найзаси билан уч юз кишини ўлдирди. Шу тариқа у “Учта қаҳрамон” сингари донг таратди.

¹⁹У “Ўттизта [10] қаҳрамон”дан ҳам машҳур эди, уларнинг йўлбошчиси бўлди. Лекин “Учта қаҳрамон” қаторига кирмасди.

²⁰Яна Кабзаёл шаҳридан Ёҳайидо ўғли Бинаё деган жасур бир жангчи бор эди. У ажойиб ишлар қилди, Мўаблик икки довюрак одамни [11] ўлдирди. Қор ёққан кунда бир хандаққа тушиб, шерни ўлдирди.

²¹Яна девдай бир Мисрликни ҳам ўлдирди. Мисрликнинг қўлида найзаси бор эди. Бинаё унинг устига таёқ билан бостириб борди. Найзани Мисрликнинг қўлидан тортиб олди–да, ўша найза билан уни ўлдирди.

²²Бинаёнинг қилган ишлари ана шулардир. Шу тариқа Бинаё “Учта қаҳрамон” каби донг таратди.

²³У “Ўттизта қаҳрамон” орасида шуҳрат топди, лекин “Учта қаҳрамон”дан бири ҳисобланмасди. Довуд уни қўриқчилар сардори қилиб тайинлади.

²⁴Қуйидагилар ҳам “Ўттизта қаҳрамон”дан эдилар:
Йўабнинг укаси Осойил, Байтлаҳм шаҳридан Дўдў ўғли Элханон,

²⁵Харўд шаҳридан Шаммох ва Элихо,

²⁶Палат шаҳридан Халез, Тахува шаҳридан Ихеш ўғли Эро,

²⁷Онотўт шаҳридан Абуазар, Хуша шаҳридан Мавуннай,

²⁸Охўва уруғидан Залмон, Натуфо шаҳридан Махрай,

²⁹Натуфолик Банах ўғли Халев, Бенямин наслидан Гиволик Рибай ўғли Этхай,

³⁰Пиратон шаҳридан Бинаё, Гаш сойликларидан Хидой,

³¹Байт–Араба шаҳридан Абуалвон, Бохурим шаҳридан Озмобит,

³²Шалбим шаҳридан Элияхба, Ёшоннинг ўғиллари, Йўнатан,

³³Харор шаҳридан Шаммох, Харорлик Шорор ўғли Охиём,

³⁴Махо шаҳридан Ахазбай ўғли Элифалет, Гилох шаҳридан Охитўфел ўғли Элиём,

³⁵Кармил шаҳридан Хазро, Оров шаҳридан Парай,

³⁶Зўво шаҳридан Натан ўғли Йихал, Гад қабиласидан Баних,

³⁷Оммон халқидан Зилах, Берўт шаҳридан Йўабнинг қуролбардори Нахрай,

³⁸Йитар уруғидан Эро ва Горив,

³⁹Хет халқидан Уриё. Ҳаммаси бўлиб ўттиз етти киши эди.