1Kàddu yu xelu yu Suleymaan. Doom rafet xel, baay ba bég; doom dof, ndey ja tiis.
2Alal ju lewul du jariñ; jub, mucc ci gàtt fan.
3Aji Sax ji du seetaan kiy def njekk, di xiif, waaye day xañ ab soxor la mu xemmem.
4Yaafus, walaakaana; farlu, woomle.
5Ku ngóob jot, nga góob, xelu nga; ngóob taxaw, ngay nelaw, gàcce la.
6Jub, barkeelu; ku soxor, wax ja làq fitna.
7Ku jëfe njekk barkeel, saw tur du fey; ab soxor, turam seey.
8Ku rafet xel day jëfe santaane, ab dof wax a wax, ba loru.
9Màndu, fegu; dëng, weeru.
10Piiseek làq-làqal, sabab njàqare; ab dof wax a wax, ba loru.
11Kàdduy ku jub bëtu ndox la, day naatal; waaye ku soxor, wax ja làq fitna.
12Mbañeel ak ayoo; cofeel ak jéggale bépp tooñ.
13Kuy dégg, say wax rafet; te ku ñàkk bopp, yelloo yetu gannaaw.
14Ku rafet xel day xam, ne cell; bu dof noppiwul, yàqule teew.
15Alal day aar boroom ni ab tata, ñàkk di lor baadoolo.
16Kiy jëfe njekk jot peyam, dunde; ab soxor di bàkkaare alalam.
17Yaru, gudd fan; sàgganey artu, sànku.
18Ku la nëbbal mbañeel, da lay fen; kuy wër di sos, ab dof la.
19Wax ju bare, moy ñàkku ca; ku moom sa làmmiñ, xelu nga.
20Kàddug boroom njekk di ngën-gi-xaalis, xelum coxor amul solo.
21Kàdduy boroom njekk jariñ na ñu bare, dof ñàkk na bopp, ba far dee.
22Barkeb Aji Sax jeey maye alal, kër-këri taxula barele.
23Jëf ju bon la dof di fowe; ku am dég-dég safoo lu xelu.
24Ab soxor, li mu ragal moo koy dab; nammeelu kiy def njekk nag day sotti.
25Bu ngëlén walee, ab soxor ne mes; kiy def njekk, sab reen sax ba fàww.
26Ndaw lu tayel ca ka yónnee daa mel ni lu forox ciy gëñ mbaa saxaar ciy gët.
27Ragal Aji Sax ji, gudd fan; soxor, gàtt fan.
28Kiy def njekk day séentu mbégte, gis ko; ab soxor yaakaar, yàkki.
29Aji Sax jeeki nammeelam rawtu la ci ku mat, di sànkute ci kuy def lu bon.
30Kiy def njekk deesu ko daaneel mukk, ku soxor du yàgg cim réew.
31Kàddug boroom njekk day jur xel mu rafet, ku wax njekkar ñu tëj sa gémmiñ.
32Boroom njekk day xam wax ju yiw; ab soxor sàlloo waxi njekkar.