1Doom ju xelu dégg yaru baay, kuy ñaawle faalewuli artu.
2Wax ju rafet yool na boroom, workat fitna la namm.
3Moom sa làmmiñ, sàmm sa bakkan; rattaxle, yàqule.
4Ab yaafus day yaakaar, du am; ab njaxlaf sàkku, woomle.
5Ku jub bañ na ay fen, ku soxor di indi gàcceek yeraange.
6Ku mat day jub, ba fegu; moykat soxor, ba sànku.
7Nit a ngi am-amlu, amul dara; nit di dee-deelu te fees dell.
8Ku am ay feye alalam, ba mucc; ku amul deesu ko tëkku.
9Ku jub day leer nàññ, ab soxor mel ni taal bu fey.
10Réy-réylu jote rekk lay jur, ku dégg ndigal a xelu.
11Alal ju lewul day naaw; foral benn-benn, ba barele.
12Yaakaar ju tas day jeexal xol, aajo ju faju di garab guy taxa dund.
13Ku sofental ndigalu Yàlla, yàqule; ku jëfe santaane Yàlla, yoolu.
14Njàngale mu xelu day suuxat bakkan, ba boroom du tàbbi ci fiiri dee.
15Dangay xam lu jaadu, ñu naw la; yoonu workat day metti.
16Képp ku teey jëfe xam-xam; ab dof ay siiwal ndofam.
17Ndaw lu bon day loru. Ndaw lu wóor garab la ci nit.
18Ku sàggane yoonu yar, séddoo ñàkk ak gàcce; kuy déggi artu, am teraanga.
19Aajo ju faju tooyal na xol, te ab dof jomb naa dëddu mbon.
20Àndal ak ku xelu, sam xel rafet; ku lëngookub dof, loru.
21Ay topp na moykat, ku jub juble.
22Ku baax, donale ba cay sëtam; alalu moykat, muuru ku jub.
23Ku néewle bey na, meññeef ne gàññ, ñu àtte ko ñàkkal, mu ñàkk ko.
24Ku dul bantal sa doom, bëggoo ko. Ku bëgg sa doom teel koo yar.
25Ku jub day lekk ba regg, soxor ba dëkke xiif.