1Efraymeen ñi ñoo daje woon jàll ba Cafon, fekk fa Yefte. Ñu ne ko: «Lu tax nga xarejeek Amoneen ña te nun, woowuloo nu, nu ànd ak yaw? Sa kër nag lanuy taal ci sa kaw.»
2Yefte ne leen: «Man de, jànkoonte bu réy laa séqoon ak Amoneen ñi, maak sama gàngoor. Ma woo leen, te wallusiwuleen maak ñoom.
3Ba ma gisee ne wallusiwuleen ma laa yemale dund ak dee rekk, jàll songi Amoneen ña. Aji Sax ji nag teg leen ci sama loxo. Kon ana lu ngeen dikke ci sama kaw bésub tey, ngir xeex ak man?»
4Ci kaw loolu Yefte dajale góori Galàdd ñépp, daldi xareek Efraymeen ña, ba duma leen. Góori Galàdd duma niti Efrayim ñi leen waxoon ne leen: «Yeen waa Galàdd, dungeen lenn lu moy ay daw-làqu yu rëcce Efrayim, jàllsi Manase.»
5Waa Galàdd nag aakimoo jàllukaayi dexu Yurdan ya, ngir kar Efraymeen ña, ba bu ku rëcce Efrayim dikkee ne: «Mayleen ma ma jàll,» waa Galàdd laaj ko, ne ko: «Ab Efraymeen nga?» Mu ne déet,
6ñu ne ko: «Neel “Sibolet”»; da naan: «Simbolet,» ndax làmmiñu Efraymeenam moo jubuwul boobu baat. Su ko defee ñu jàpp ko, rey ko ca jàllukaayi dexu Yurdan. Ñeent fukki junniy Efraymeen ak ñaar (42 000) dee nañu, jant yooyu.
7Yefte nag juróom benni at la jiite Israayil. Ba Yefte waa Galàdd ba faatoo, ca dëkki Galàdd ya lañu ko denc.
8Ibcan ma cosaanoo Betleyem moo ko wuutu, jiite Israayil.
9Amoon na fanweeri doom yu góor, ak fanweeri doom yu jigéen yu mu maye, ñu séyi àll; mu jëlal nag ay doomam yu góor fanweeri janq yu jóge àll. Juróom ñaari at la Ibcan jiite Israayil.
10Ba Ibcan faatoo, ca Betleyem lañu ko denc.
11Elon Cabuloneen ba moo ko wuutu, te fukki at la jiite Israayil.
12Ba Elon Cabuloneen ba faatoo, ca Ayalon lañu ko denc ca diiwaanu Sabulon.
13Abdon doomu Ilel, ma cosaanoo Piraton moo ko wuutu, jiite Israayil.
14Amoon na ñeent fukki doom yu góor, ak fanweeri sët yu góor, ñuy war juróom ñaar fukki mbaam. Juróom ñetti at la jiite Israayil.