1Ba bànni Israayil|lemma="bànni Israayil:"* dajee ca Mispa dañoo giñoon ne: «Bu kenn ci nun may doomam ab Beñamineen jabar.»
2Gannaaw gi, askan wi daje fa Betel. Fa lañu toog ba ngoon, fa kanam Yàlla, di jalooka jooyoo jooy yu metti.
3Ña nga naa: «Éy! Aji Sax ji Yàllay Israayil, lu waral lii am fi digg Israayil? Genn giirug Israayilu lëmm wuute tey?»
4Ca ëllëg sa mbooloo ma teela xëy, tabax fa ab sarxalukaay|lemma="sarxalukaay b-:"*. Ci kaw loolu ñu def ay saraxi rendi-dóomal|lemma="Sarax yi:"*, ak saraxi cant ci biir jàmm|lemma="Sarax yi:"*.
5Bànni Israayil nag ne: «Ana ci mboolem giiri Israayil, gan moo teewesiwul ndaje mi fi kanam Aji Sax ji ci Mispa?» Fekk na ñu dogoo ngiñ lu réy, ne képp ku teewesiwul ndaje ma fa kanam Aji Sax ji ca Mispa, dee rekk mooy àtteem.
6Bànni Israayil nag ñeewante seen bokki Beñamineen. Ña nga naa: «Ndeysaan, genn giir a ngi fey ci Israayil waay!
7Nan lanuy def nag ba seenu ndes ami jabar, gannaaw noo giñoon ci Aji Sax ji, ne dunu leen may jabar kenn ci sunuy doom?»
8Ba loolu amee ñu ne: «Ana gan giir ci bànni Israayil, gu teewesiwul ndajem Mispa mii, fi kanam Aji Sax ji?» Ndeke kenn ku jóge Yabes Galàdd dikkul ca dalub ndaje ma.
9Ndax gannaaw ba ñu waññee mbooloo ma, kenn ci waa Yabes Galàdd teewu ca.
10Ba loolu amee ndaje ma yebal fa fukki junniy nit ak ñaar (12 000), ay jàmbaari góor. Ñu sant leen ne leen: «Demleen fàdd waa Yabes Galàdd; leelleen leen ñawkay saamar, ba ca jigéen ñaak gone ya.
11Ni ngeen di def nii la: Gépp góor ak jépp jigéen ju xam góor, faagaagalleen ko.»
12Ba ñu demee, ñeenti téeméeri janq yu masula séy lañu fekk ca waa Yabes Galàdd. Ñu yóbbu leen ca dalub Silo ba ca réewum Kanaan.
13Ba loolu amee waa ndaje ma mépp yónnee, waxtaan ak Beñamineen ña ca doju Rimon. Ñu yóbbante leen kàdduy jàmmoo.
14Booba la Beñamineen ña ñibbisi, ñu may leen janq ja mucce ca jigéeni Yabes Galàdd, waaye matewuñu leen, ñoom ñépp.
15Askan wa nag ñeewante Beñamineen ña, ndax la leen Aji Sax ji néewal, ba wéetal giiri bànni Israayil.
16Ci kaw loolu magi ndaje ma ne: «Nu nuy def ba amal ñi des jabar, gannaaw aw jigéen jeex na ci Beñamineen ñi?
17Beñamineen ñi mucc kat manuñoo ñàkk kuutaay. Lu ko moy genn giirug Israayil mooy réer.
18Nun nag dunu leen mana may jabar ci sunuy doom, nde noo giñoon ne: “Képp ku may ab Beñamineen jabar, yal na alku!”»
19Ci biir loolu seen xel ne yarr ci màggalu Aji Sax ju ñuy amal ci jant yooyu, te muy am at mu nekk ca Silo, ca bëj-gànnaaru Betel, ca penkub yoonu Sikem wa jóge Betel, ca bëj-saalumu Lebona.
20Ñu sant Beñamineen ña ne leen: «Dangeen di dem, waajal am tëru ca tóokëri reseñ ya.
21Yeeruleen, bu janqi Silo ja dikkee, di wàllisi pecc ma rekk, ngeen ne pëll génne ca tóokëri reseñ ya, ku nekk gëf jabaram ca ñoom, ngeen daldi ñibbi Beñamineen.
22Bu nu seeni baay, mbaa seeni càmmiñ àkksee rekk, nu wax leen, ne leen: “Ngalla waay, dimbalileen leen ngir nun, ndax jigéen ñu leen doy jabar ñoom ñépp lañu leen amalul woon ca xare ba. Te it gannaaw du yeena leen leen may, woruleen seen ngiñ.”»
23Beñamineen ña def noona. Ca waa pecc ma lañu gëfe ay jabar yu tollook seenub lim. Ñu daldi dellu ca seen céru suuf. Ba loolu amee ñu tabaxaat dëkk ya, dëkke.
24Jant yooyu la bànni Israayil bàyyikoo foofa, ku nekk ñibbi ca giiram ak ca làngam. Foofa lañu jóge, ku nekk dellu ca céru suufam.
25Jant yooyu nag buur amuloon ca Israayil. Lu neex waay rekk, def.