Ìwé Òwe 30:1-33 BYB2014 - Bible AI

¹Àwọn ọ̀rọ̀ Ágúrì ọmọ Jákè, ọ̀rọ̀ ìṣọtẹ́lẹ̀ tí ọkùnrin yìí sọ fún Ítíélì, sí Ítíélì àti sí Úkálì:

²“Èmi ni aláìmòye ju nínú àwọn ènìyàn; N kò ní òye ènìyàn.

³Èmi kò tilẹ̀ kọ́ ọgbọ́n tàbí ní ìmọ̀ ẹni mímọ́ nì

⁴Ta ni ó ti gòkè lọ sí ọ̀run tí ó sì padà sọ̀kalẹ̀? Ta ni ó ti kó afẹ́fẹ́ jọ sí ihò àtẹ́lẹwọ́ rẹ̀? Ta ni ó ti ta kókó omi sétí aṣọ? Ta ni ó fi gbogbo ìpìlẹ̀ ayé lélẹ̀? Kí ni orúkọ rẹ̀, àti orúkọ ọmọ rẹ̀? Sọ fún mi bí o bá mọ̀.

⁴

⁵“Gbogbo ọ̀rọ̀ Ọlọ́run jẹ́ aláìlábùkù; oun ni ààbò fún gbogbo ẹni fi í ṣe ibi ìpamọ́ wọn

⁶Má ṣe fi kún ọ̀rọ̀ rẹ̀, àìṣe bẹ́ẹ̀ yóò bá ọ wí yóò sì sọ ọ́ di òpùrọ́.

⁶

⁷“Ohun méjì ni mo ń bèèrè lọ́wọ́ rẹ, OLÚWA; má ṣe fi wọ́n dù mí kí ń tó kú:

⁸Mú èké ṣíṣe àti irọ́ jìnnà sí mi; má ṣe fún mi ní òsì tàbí ọrọ̀, ṣùgbọ́n fún mi ní oúnjẹ òòjọ́ mi nìkan,

⁹Àìṣe bẹ́ẹ̀, mo lè ní àníjù kí n sì gbàgbé rẹ kí ń sì wí pé, ‘Ta ni OLÚWA?’ Tàbí kí ń di òtòsì kí ń sì jalè kí ń sì ṣe àìbọ̀wọ̀ fún orúkọ Ọlọ́run mi.

⁹

¹⁰“Má ṣe ba ìránṣẹ́ lórúkọ jẹ́ lọ́dọ̀ ọ̀gá rẹ̀ àìṣe bẹ́ẹ̀ yóò ṣẹ́ èpè lé ọ. Ìwọ yóò sì jìyà rẹ̀.

¹⁰

¹¹“Àwọn kan wá ṣépè fún àwọn baba wọn tí wọn kò sì ṣúre fún àwọn ìyá wọn:

¹²Àwọn tí ó mọ́ ní ojú ara wọn ṣíbẹ̀ tí wọn kò sì mọ́ kúrò nínú èérí wọn;

¹³Àwọn ẹni tí ojú wọn gbéga nígbà gbogbo, tí ìwolẹ̀ wọn sì kún fún ìgbéraga.

¹⁴Àwọn ẹni tí eyín wọn jẹ́ idà Àwọn tí èrìgì wọn kún fún ọ̀bẹ láti jẹ àwọn talákà run kúrò ní ilẹ̀ ayé àwọn aláìní kúrò láàrin àwọn ọmọ ènìyàn.

¹⁴

¹⁵“Eṣúṣú ni ọmọbìnrin méjì ‘Múwá! Múwá!’ ní wọn ń ké.

¹⁵“Àwọn nǹkan mẹ́ta kan wà tí kò ní ìtẹ́lọ́rùn láéláé, mẹ́rin tí kò jẹ́ wí láéláé pé, ‘Ó tó’:

¹⁶Ibojì, inú tí ó yàgàn, ilẹ̀, tí omi kì í tẹ́lọ́rùn láéláé, àti iná, tí kì í wí láéláé pé, ‘Ó tó!’

¹⁶

¹⁷“Ojú tí ń fi baba ṣẹ̀fẹ̀, tí ó kẹ́gàn ìgbọràn sí ìyá ẹyẹ àkálá ẹ̀bá odò ni yóò yọ ọ́, igún yóò mú un jẹ.

¹⁷

¹⁸“Àwọn nǹkan mẹ́ta wà tí ó jẹ́ ìyàlẹ́nu fún mi, mẹ́rin tí kò yé mi:

¹⁹Ipa idì ní òfuurufú ipa ejò lórí àpáta ipa ọkọ̀ ojú omi lójú agbami òkun àti ipa ọ̀nà ọkùnrin tí ó mú wúndíá lọ́wọ́.

¹⁹

²⁰“Èyí ni ọ̀nà alágbérè obìnrin ó jẹun o sì nu ẹnu rẹ̀ ó sì wí pé, N kò ṣe ohunkóhun tí kò tọ́.

²⁰

²¹“Lábẹ́ nǹkan mẹ́ta ni ile ayé ti ń wárìrì lábẹ́ ohun mẹ́rin ni kò ti lè mí fín ín.

²²Ìránṣẹ́ tí ó di Ọba aláìgbọ́n tí ó ní ọ̀pọ̀lọpọ̀ oúnjẹ́

²³Obìnrin tí gbogbo ènìyàn kórìíra tí ó sì wá lọ́kọ ìránṣẹ́bìnrin tí ó gbọkọ mọ́ ọ̀gá rẹ̀ lọ́wọ́.

²³

²⁴“Àwọn ohun mẹ́rin ló kéré láyé síbẹ̀ wọ́n gbọ́n gidigidi;

²⁵Àwọn èrà jẹ́ ẹ̀dá tí ó ní agbára díẹ̀ síbẹ̀ wọ́n kó oúnjẹ wọn pamọ́ ní àsìkò òjò

²⁶Ehoro jẹ́ ẹ̀dá tí kò ní agbára púpọ̀ ṣíbẹ̀ wọ́n ń ṣe ilé wọn sí ibi ihò àpáta;

²⁷Eṣú kò ní ọba ṣíbẹ̀ wọ́n ń jáde lọ papọ̀ ní ọ̀wọ̀ọ̀wọ́

²⁸a lè fi ọwọ́ mú aláǹgbá ṣíbẹ̀ a ń rí i ní ààfin ọba.

²⁸

²⁹“Àwọn ohun mẹ́ta ní n bẹ tí ń rìn rere, ohun mẹ́rin tí ń kọrí sí ibi rere,

³⁰Kìnnìún, alágbára láàrin ẹranko tí kì í sá fún ohunkóhun

³¹Ẹsin tí a dì lẹ́gbẹ̀ẹ́; àti òbúkọ, àti ọba pẹ̀lú àwọn ọmọ ogun rẹ̀ láyìíká rẹ̀.

³¹

³²“Bí ìwọ bá ti hùwà aṣiwèrè nípa gbígbé ara rẹ ga, tàbí tí o bá ti gbèrò ibi, da ọwọ́ rẹ bo ẹnu rẹ!

³³Nítorí bí fífún omi ọmú tí í mú wàrà wá tí fífún imú sì ń mú ẹ̀jẹ̀ jáde bẹ́ẹ̀ ni rírú ìbínú sókè í mú ìjà wá.”