Ìwé Deutarónómì 33:1-29 BYB2014 - Bible AI

¹Èyí ni ìbùkún tí Móṣè ènìyàn Ọlọ́run bùkún fún àwọn ọmọ Ísírẹ́lì kí ó tó kú.

²Ó sì wí pé:

²“OLÚWA ti Sínáì wá, ó sì yọ sí wọn láti Ṣéírì wá ó sì tàn án jáde láti òkè Páránì wá. Ó ti ọ̀dọ̀ ẹgbẹgbàarùn ún àwọn mímọ́ wá láti ọwọ́ ọ̀tún rẹ̀ ni òfin kan amúbíiná ti jáde fún wọn wá.

³Nítòótọ́, ó fẹ́ràn àwọn ènìyàn an rẹ̀, gbogbo àwọn ènìyàn mímọ́ wà ní ọwọ́ rẹ̀. Ní ẹṣẹ̀ rẹ̀ ni wọ́n ti foríbalẹ̀, àti lọ́dọ̀ rẹ̀ ni wọ́n ti ń gba ọ̀rọ̀,

⁴òfin tí Móṣè fifún wa, ìní ti ìjọ ènìyàn Jákọ́bù.

⁵Òun ni ọba lórí Jéṣúrúnì ní ìgbà tí olórí àwọn ènìyàn péjọ pọ̀, pẹ̀lú àwọn ẹ̀yà Ísírẹ́lì

⁵

⁶“Jẹ́ kí Rúbẹ́nì yè kí ó má ṣe kú, tàbí kí ènìyàn rẹ mọ níwọ̀n.”

⁷Èyí ni ohun tí ó sọ nípa Júdà: “OLÚWA gbọ́ ohùn Júdà kí o sì mú tọ àwọn ènìyàn rẹ̀ wá. Kí ọwọ́ rẹ̀ kí ó tó fún un, kí ó sì ṣe ìrànlọ́wọ́ fún lọ́wọ́ àwọn ọ̀ta rẹ̀!”

⁸Ní ti Léfì ó wí pé: “Jẹ́ kí Túmímù àti Úrímù rẹ kí ó wà pẹ̀lú ẹni mímọ́ rẹ. Ẹni tí ó dánwò ní Másà, ìwọ bá jà ní omi Méríbà.

⁹Ó wí fún baba àti ìyá rẹ pé, ‘Èmi kò buyì fún wọn.’ Kò mọ àwọn arákùnrin rẹ̀, tàbí mọ àwọn ọmọ rẹ̀, ṣùgbọ́n ó dúró lórí ọ̀rọ̀ rẹ̀, ó sì pa májẹ̀mú rẹ̀ mọ́.

¹⁰Ó kọ́ Jákọ́bù ní ìdájọ́ rẹ̀ àti Ísírẹ́lì ní òfin rẹ̀. Ó mú tùràrí wá ṣíwájú rẹ̀ àti ọ̀tọ̀ọ̀tọ̀ ẹbọ sísun sórí i pẹpẹ rẹ̀.

¹¹Bù sí ohun ìní rẹ̀, OLÚWA, kí o sì tẹ́wọ́gba iṣẹ́ ọwọ́ rẹ̀. Lu ẹgbẹ́ àwọn tí ó dìde sí i; kí wọn kí ó má ṣe dìde mọ́.”

¹²Ní ti Bẹ́ńjámínì ó wí pé: “Jẹ́ kí olùfẹ́ OLÚWA máa gbé ní àlàáfíà lọ́dọ̀ rẹ̀, òun a máa bò ó ní gbogbo ọjọ́, ẹni tí OLÚWA fẹ́ràn yóò máa sinmi láàrin èjìká rẹ̀.”

¹³Ní ti Jóṣẹ́fù ó wí pé: “Kí OLÚWA bùkún ilẹ̀ rẹ, fún ohun iyebíye láti ọ̀run pẹ̀lú ìrì àti ibú tí ó ń bẹ níṣàlẹ̀;

¹⁴àti fún èso iyebíye tí ọ̀run mú wá àti ti ohun iyebíye tí ń dàgbà ní oṣooṣù;

¹⁵pẹ̀lú ohun pàtàkì òkè ńlá ìgbàanì àti fún ohun iyebíye ìgbà ayérayé;

¹⁶Pẹ̀lú ohun iyebíye ayé àti ẹ̀kún un rẹ̀ àti fún ìfẹ́ ẹni tí ó ń gbé inú igbó. Jẹ́ kí gbogbo èyí sinmi lé orí Jósẹ́fù, lórí àtàrí ẹni tí ó yàtọ̀ láàrin àwọn arákùnrin rẹ̀.

¹⁷Ní ọlá ńlá ó dàbí àkọ́bí akọ màlúù; ìwo rẹ̀, ìwo àgbáǹréré ni. Pẹ̀lú wọn ni yóò fi ti àwọn orílẹ̀ èdè, pàápàá títí dé òpin ayé. Àwọn ní ẹgbẹẹgbàárùn-ún Éfúráímù, àwọn sì ní ẹgbẹẹgbẹ̀rún Mánásè.”

¹⁸Ní ti Ṣébúlúnì ó wí pé: “Yọ̀ Sébúlúnì, ní ti ìjáde lọ rẹ, àti ìwọ Ísákárì, nínú àgọ́ rẹ.

¹⁹Wọn yóò pe àwọn ènìyàn sórí òkè àti níbẹ̀ wọn yóò rú ẹbọ òdodo, wọn yóò mu nínú ọ̀pọ̀lọpọ̀ òkun, nínú ìṣúra tí ó pamọ́ nínú iyanrìn.”

²⁰Ní ti Gádì ó wí pé: “Ìbùkún ni ẹni tí ó mú Gádì gbilẹ̀! Gádì ń gbé níbẹ̀ bí kìnnìún, ó sì fa apá ya, àní àtàrí.

²¹Ó sì yan ilẹ̀ tí ó dára jù fún ara rẹ̀; ìpín olórí ni a sì fi fún un. Nígbà tí ó rí tí gbogbo àwọn ènìyàn péjọ, ó mú òdodo OLÚWA se, àti ìdájọ́ rẹ̀ pẹ̀lú àwọn ọmọ Ísírẹ́lì.”

²²Ní ti Dánì ó wí pé: “Ọmọ kìnnìún ni Dánì, tí ń fò láti Básánì wá.”

²³Ní ti Náfítánì ó wí pé, “Ìwọ Náfítánì, Náfítánì kún fún ojú rere Ọlọ́run àti ìbùkún OLÚWA; yóò jogún ìhà ìwọ̀ oòrùn àti gúṣù.”

²⁴Ní ti Áṣérì ó wí pé: “Ìbùkún ọmọ ni ti Áṣérì; jẹ́ kí ó rí ojú rere láti ọ̀dọ̀ àwọn arákùnrin rẹ̀ kí ó sì ri ẹṣẹ̀ rẹ̀ sínú òróró.

²⁵Bàtà rẹ̀ yóò jẹ́ irin àti idẹ, agbára rẹ̀ yóò sì rí bí ọjọ́ rẹ̀.

²⁶“Kò sí ẹlòmíràn bí Ọlọ́run Jéṣúrúnì, ẹni tí ń gun ọ̀run fún ìrànlọ́wọ́ rẹ àti ní ojú ọ̀run nínú ọlá ńlá rẹ̀.

²⁷Ọlọ́run ayérayé ni ibi ìsádi rẹ, àti ní ìsàlẹ̀ ni apá ayérayé wà. Yóò lé àwọn ọ̀ta rẹ níwájú rẹ, ó sì wí pé, ‘Ẹ máa párun!’

²⁸Ísírẹ́lì nìkan yóò jòkòó ní àlàáfíà, oríṣun Jákọ́bù nìkan ní ilẹ̀ ọkà àti ti ọtí wáìnì, níbi tí ọ̀run ti ń ṣẹ ìrì sílẹ̀.

²⁹Ìbùkún ni fún ọ, Ísírẹ́lì, ta ni ó dà bí ì rẹ, ẹni tí a gbàlà láti ọ̀dọ̀ OLÚWA? Òun ni àṣà àti ìrànwọ́ rẹ̀ àti idà ọlá ńlá rẹ̀. Àwọn ọ̀ta rẹ yóò tẹríba fún ọ, ìwọ yóò sì tẹ ibi gíga wọn mọ́lẹ̀.”